Te titeti tape’araa pereoo
Te ora nei te taata papa’i i Baja California, Mexico.
Fátima !
Faahoho’araa na Bryan Beach
Ua haere au i te teataraa e te tahi mau hoa to’u no te ekalesia. I to matou tomoraa’tu i roto i teie fare toa rahi, ua horo’ahia mai te hoê titeti tape’araa pereoo no matou. Ia faoti a’era te teataraa, ua ite a’era matou e, ua mo’e te titeti tape’araa pereoo. I te haamataraa, ua feruri matou e, e nehenehe noa ta matou e aufau i te titeti, tera râ, aore hoê o matou e vai ra 180 toata e titauhia no te aufau i te utu’a.
Te faahopearaa no te oreraa e aufau i te tape’araa pereoo, o te vaiihoraa ïa i te pereoo i te fare toa e ia tavere-ê-hia, e rahi atu ïa te moni e aufau. Ua pe’ape’a roa to’u mau hoa, te taata faahoro ihoa râ i te pereoo i te mea e, no to’na metua tane te pereoo. Ua faaatea ê atu vau i te hoê vahi no te faahiti i te hoê pure. Ua ani au i te Metua i te ao ra ma to’u faaroo atoa e te haehaa no te horo’a mai ia matou i te hoê rave’a no te tatara i to matou fifi e ia ho’i ma te hau i to matou mau fare. E ore roa e mo’ehia ia’u te ohipa tei tupu tau setoni noa i muri iho i te otiraa ta’u pure.
A ho’ i mai ai au i piha’i iho i te pereoo, ua pii maira te hoê taata i muri mai ia’u i to’u i’oa. O Francisco, hoê hoa no te te fare haapiiraa tuarua. Ua ui maira oia ia’u e, e aha ta’u ohipa e rave ra, e ua parau atu vau ia’na i te ohipa tei tupu. Ma te oti’ati’a ore, ua iriti maira oia i ta’na farii moni e ua horo’a maira i te moni e nava’i no te aufau i te titeti mo’e. Ua riro teie ohipa aau maitai ei pahonoraa oioi i ta’u taparuraa i te Metua i te ao ra.
Aita paha o Francisco i ite e ua riro oia ei tautururaa rahi, tera râ, ua ite au e, e vai noa te mauruuru rahi i roto ia’u e hope noa’tu to’u oraraa.
I te tahi mau taime, e mea maere roa te mau huru no to te Metua i te ao ra pahonoraa i ta tatou mau pure, tera râ, e ere roa’tu te reira i te mea hape noa. Ua ite hope roa to tatou Metua i te ao ra e o Iesu Mesia ia tatou e na raua e huti nei i te mau taura o to tatou oraraa.
Ua ite au e, i te taime e ora tatou ma te parau ti’a, e farii tatou i te mau haamaitairaa e rave rahi o ta te Metua i te ao ra ana’e e nehenehe e horo’a mai ia tatou nei, e tae noa’tu i Ta’na parau fafau ia tatou e, « E ua na reira [tatou], e faateiteihia ïa [tatou] ia tae i te mahana hopea ra » (Alama 37:37).