“Pagtuon Kamo Gikan Kanako”

Ni Presidente Thomas S. Monson

Sa Ang Simbahan ni Jesukristo sa mga Santos sa Ulahing mga Adlaw, kitang tanan mga magtutudlo ug kitang tanan mga magkakat-on. Ang Ginoo mihatag niining malumo nga pagdapit ngadto sa tanan: “Pagtuon kamo gikan kanako … ug makakaplag kamog pahulay alang sa inyong mga kalag.”¹

Akong dapiton ang tanang mga Santos sa Ulahing mga Adlaw sa pagpamalandong sa ilang mga paningkamot sa pagtudlo ug sa pagkat-on ug sa pagtan-aw ngadto sa Manluluwas isip atong Giya sa pagbuhat niini. Kita nasayud nga kini nga “magtutudlo nga gikan sa Dios”² labaw pa sa usa ka yanong magtutudlo. Siya nga nagtudlo kanato sa paghigugma sa Ginoo nga atong Dios sa tibuok natong kasingkasing, tibuok natong kalag, tibuok natong kusog, ug tanan natong hunahuna, ug sa paghigugma sa atong silingan sama sa atong kaugalingon, mao ang Gamhanan nga Magtutudlo ug Ehemplo sa hingpit nga kinabuhi.

Siya kadto kinsa mipahayag: “Umanhi ka ug sumunod kanako.”³ “Ako nagpakita og usa ka panig-ingnan alang kaninyo.”⁴

Gawas kon Mangausab Kamo

Si Jesus mitudlo og usa ka yano apan lawom nga kamatuoran nga narekord sa Mateo. Human Siya ug ang Iyang mga disipulo minaug gikan sa Buntod sa Transpigurasyon, sila mihunong sa Galilea ug dayon miadto sa Capernaum. Didto ang mga tinun-an miduol kang Jesus, nangutana:

“Kinsa man ang labing dako sa gingharian sa langit?

“Ug gitawag ni Jesus ang usa ka gamayng bata ngadto kaniya, ug iyang gipatindog kini sa ilang taliwala,

“Ug kanila miingon siya, Sa pagkatinuod magaingon ako kaninyo, nga gawas kon mangausab kamo ug mangahimong sama sa mga gagmayng bata, dili gayud kamo makasulod sa gingharian sa langit.”⁵

Diha sa Simbahan, ang tumong sa pagtudlo sa ebanghelyo dili mao ang pagbu-bu og impormasyon ngadto sa hunahuna sa mga anak sa Dios, maanaa man sa panimalay, klasehanan, o sa natad sa misyon. Kini dili aron mapakita kon unsa kadaghan ang nahibaloan sa ginikanan, magtutudlo, o misyonaryo. Ni aron lang pagdugang sa kahibalo mahitungod sa Manluluwas ug sa Iyang Simbahan.

Ang nag-unang tumong sa pagtudlo mao ang pagtabang sa mga anak nga lalaki ug babaye sa Langitnong Amahan nga makabalik ngadto sa Iyang presensya ug makatagamtam og kinabuhing dayon uban Kaniya. Sa pagbuhat niini, ang pagtudlo sa ebanghelyo kinahanglang mag-awhag kanila subay sa dalan sa pagkadisipulo ug sagradong mga pakigsaad sa matag adlaw. Ang tumong mao ang pagdasig sa mga indibidwal sa paghunahuna, pagbati, ug dayon adunay buhaton mahitungod sa buhi nga mga baruganan sa ebanghelyo. Ang tumong mao ang pagpalambo og hugot nga pagtuo diha ni Ginoong Jesukristo ug makabig ngadto sa Iyang ebanghelyo.

Ang pagtudlo nga nagpanalangin ug nagkabig ug nagluwas mao ang pagtudlo nga nagsunod sa ehemplo sa Manluluwas. Ang mga magtutudlo nga nagsunod sa ehemplo sa Manluluwas naghigugma ug nagserbisyo niadtong ilang gitudloan. Sila nagdasig sa ilang mga tigpaminaw uban sa mahangturong mga leksyon sa balaang kamatuoran. Sila nagpuyo og mga kinabuhi nga angay sundon.

Paghigugma ug Pagserbisyo

Ang tibuok nga pangalagad sa Manluluwas naghulagway sa paghigugma sa silingan. Sa pagkatinuod, ang Iyang gugma ug serbisyo mao kanunay ang Iyang leksyon. Sa sama nga paagi, ang mga magtutudlo nga labing maayo nakong mahinumduman mao ang mga magtutudlo kinsa nakaila, nahigugma, ug naghunahuna sa ilang mga estudyante. Sila nangita sa nawala nga karnero. Sila mitudlo sa mga leksyon sa kinabuhi nga kanunay nakong mahinumduman.

Usa sa ingon nga magtutudlo mao si Lucy Gertsch. Siya nakaila sa matag usa sa iyang mga estudyante. Siya dili mapakyas sa pagbisita niadtong nakapalta og usa ka Dominggo o wala lamang gayud moadto. Nasayud kami nga naghunahuna siya kanamo. Walay usa kanamo nga nakalimot kaniya o sa mga leksyon nga iyang gitudlo.

Paglabay sa daghang katuigan, sa dihang si Lucy duol na sa katapusang bahin sa iyang kinabuhi, mibisita ko niya. Mihinumdom niadtong dugay na nga mga adlaw nga siya pa ang among magtutudlo. Nag-istorya mi mahitungod sa matag sakop sa among klase ug gihisgutan kon unsa na ang gibuhat karon sa matag usa. Ang iyang gugma ug pag-amuma milungtad sa tibuok kinabuhi.

Ganahan ko sa sugo sa Ginoo nga makita diha sa Doktrina ug mga Pakigsaad:

“Ako mohatag nganha kaninyo og usa ka sugo nga kamo motudlo sa usag usa sa doktrina sa gingharian.

“Pagtudlo kamo nga makugihon ug ang akong grasya mouban kaninyo.”⁶

Si Lucy Gertsch mitudlo nga makugihon tungod kay siya nahigugma sa walay pagkakapoy.

Pagtanyag og Paglaum ug Kamatuoran

Si Apostol Pedro mitambag, “Kinahanglan nga andam kamo kanunay sa pagtubag kang bisan kinsa nga mangutana sa hinungdan sa paglaum nga anaa kaninyo.”⁷

Tingali ang labing mahinungdanon nga paglaum nga matanyag sa usa ka magtutudlo mao ang paglaum nga makita diha sa mga kamatuoran sa ebanghelyo ni Jesukristo.

“Ug unsa kana nga kamo molaum?” Si Mormon nangutana. “Tan-awa ako moingon nganha kaninyo nga kamo magbaton og paglaum pinaagi sa pag-ula ni Kristo ug sa gahum sa iyang pagkabanhaw, aron mabanhaw ngadto sa kinabuhi nga dayon, ug kini tungod sa inyong hugot nga pagtuo diha kaniya.”⁸

Mga magtutudlo, pakusgi ang inyong mga tingog ug pagpamatuod sa tinuod nga kinaiya sa Dios nga Kapangulohan. Ipahayag ang inyong pagsaksi mahitungod sa Basahon ni Mormon. Ipasabut ang mahimayaon ug matahum nga kamatuoran nga anaa sa plano sa kaluwasan. Gamita ang mga materyal nga aprubado sa Simbahan, ilabi na sa mga kasulatan, sa pagtudlo sa mga kamatuoran sa gipahiuli nga ebanghelyo ni Jesukristo diha sa ilang kalunsay ug kayano. Hinumdumi ang sugo sa Manluluwas nga “Kamo nagasusi sa mga kasulatan kay nagahunahuna man kamo nga pinaagi niini makakaplag kamo sa kinabuhing dayon: ngani kini mao ang nagapanghimatuod mahitungod kanako.”⁹

Tabangi ang mga anak sa Dios nga makasabut unsa ang tinuod ug importante niini nga kinabuhi. Tabangi sila sa pagpalambo sa kalig-on sa pagpili sa dalan nga magpabilin kanila nga luwas diha sa dalan padulong sa kinabuhing dayon.

Itudlo ang kamatuoran, ug ang Espiritu Santo moabag sa inyong mga paningkamot.

“Pagtuon Kamo Gikan Kanako”

Tungod kay si Jesukristo hingpit nga masulundon ug manunuton sa Iyang Amahan, Siya “mitubo sa kaalam ug sa gidak-on ug sa kahimuot kaniya sa Dios ug sa tawo.”¹⁰ Aduna ba kitay determinasyon sa pagbuhat sa ingon? Sama nga si Jesus “nakaangkon og grasya ug dugang pa nga grasya,”¹¹ kita kinahanglang mapailubon ug makanunayon nga magtinguha sa kahayag ug kahibalo gikan sa Dios diha sa atong mga paningkamot sa pagkat-on sa ebanghelyo.

Ang pagpaminaw usa ka importante nga elemento sa pagkat-on. Kon mag-andam nga matudloan, kita mainampoong magtinguha og inspirasyon ug kumpirmasyon gikan sa Espiritu Santo. Mamalandong kita, mag-ampo kita, mogamit kita sa mga leksyon sa ebanghelyo, ug magtinguha kita sa kabubut-on sa Amahan alang kanato.¹²

Si Jesus “[mi]tudlo … sa daghang mga butang pinaagig mga sambingay,”¹³ nga nagkinahanglan og mga dunggan nga makadungog, mga mata nga makakita, ug mga kasingkasing nga makasabut. Samtang kita magpuyo nga takus, kita mas makadungog sa mga paghunghong sa Espiritu Santo, nga “magatudlo [kanato] sa tanang butang, ug magapahinumdom [kanato] sa tanan.”¹⁴

Kon kita motubag sa malumo nga pagdapit sa Ginoo, “Pagkat-on kamo gikan kanako,” kita mahimong mag-aambit sa Iyang balaan nga gahum. Busa, kita kinahanglan nga mopadayon diha sa diwa sa pagkamasulundon, mosunod sa atong Ehemplo pinaagi sa pagtudlo sama sa Iyang gusto nga kita motudlo ug pagkat-on sama sa Iyang gusto nga kita magkat-on.