Relief Society

Ni Linda K. Burton

Kinatibuk-ang Presidente sa Relief Society

Sa unsang paagi nga kamo isip Relief Society nga mga sister makatabang sa paggiya sa “bag-ong mga sister” nga molampus sa atong mahinungdanong bahin sa buhat sa kaluwasan? Makatabang kamo kanila nga makasabut nga sila mga importante nga bahin sa sagrado nga buhat sa gingharian sa Dios. Ang pagpakigbahin sa basahon o online nga link sa Anak nga mga Babaye sa Akong Gingharian makatabang sa paghulagway sa atong sagrado nga buhat sa Relief Society.

Mahimo kamong makigtambayayong sa uban ug makighigala sa batan-ong mga babaye samtang dungan kita nga mangandam alang sa panalangin sa kinabuhing dayon. Mahimo ninyong mapalapdan ang inyong mga grupo sa mga higala sa paglakip sa batan-ong mga babaye. Pinaagi sa pagbuhat niini, nagtuman kamo sa tinguha ni Lucy Mack Smith ngadto sa iyang unang mga sister sa Relief Society: “Kinahanglan nga atong ampingan ang usag usa, bantayan ang usag usa, mohupay sa usag usa ug modawat og panudlo aron kitang tanan makaadto sa langit.”³

Unsa Man ang Mabuhat sa mga Lider ug mga Sister sa Relief Society?

Ilha nga ang batan-ong mga babaye adunay matampo nga mga talento, mga gasa, ug kadasig nga mopakigbahin. Siguroha nga kon ang batan-ong mga babaye mosulod sa Relief Society, aduna silay higala nga makatupad sa paglingkod. Hatagi sila og mga oportunidad nga madugang ang ilang makadasig nga impluwensya ngadto sa Relief Society. Timan-i nga dili lamang nga aduna kamoy gamhanang impluwensya niining batan-on nga mga sister, apan nga sila mamahimo nga mahigugmaong mga ehemplo kaninyo. Kon nagtudlo kamo sa mga leksyon sa Relief Society, siguroha nga ilakip ang mga sitwasyon sa tanang grupo sa mga edad nga imong gitudloan—dili lamang mga inahan. Ang batan-ong mga babaye mahatagan pa gani og mga oportunidad sa pagtudlo sa Relief Society. Mahimo ninyong sulayan sa pagpares ang batan-ong mga sister ug edaran nga mga sister sa visiting teaching ug sa mga oportunidad sa pagserbisyo. Mahimo kamong usa ka panalangin ug makatabang sa pagwagtang sa mga babag tungod sa edad.