“Tan-awa ang Inyong Gagmay nga mga Bata”: Pagkat-on sa Pagtudlo sa mga Bata

“Si [Jesus] mikuha sa ilang gagmay nga mga bata, sa tinagsa, ug mipanalangin kanila, ug nag-ampo ngadto sa Amahan alang kanila. … Ug siya namulong ngadto sa pundok sa mga katawhan, ug miingon ngadto kanila: Tan-awa ang inyong gagmay nga mga bata” (3 Nephi 17:21, 23).

Kon ikaw usa ka ginikanan o natawag aron magtudlo sa mga bata, nahatagan ka og usa ka talagsaong gasa. Si Elder M. Russell Ballard sa Korum sa Napulog Duha ka mga Apostoles mitudlo, “[Ikaw] man ang gipili sa Dios nga mopalirong sa mga bata karon uban sa gugma ug sa kalayo sa hugot nga pagtuo ug sa panabut kon si kinsa sila.”¹

Ang mga bata maghatag kanimo og hingpit nga kalipay ug mag-aghat nimo nga mahimong usa ka maayong ehemplo. Samtang imong maamguhan ang kamatinud-anon, gugma, pagsalig, ug paglaum sa mga bata, mas mapaduol ka ngadto sa Ginoo ug mas masabtan ang Iyang sugo nga “mangahimong sama sa mga gagmayng bata” (Mateo 18:3).

Ania ang walo ka mga butang nga angayang hinumduman mahitungod sa mga bata samtang maningkamot ka sa paghigugma ug pagtudlo nila sa paagi nga gihimo sa Manluluwas

1. Ang mga bata matuohon. Dali silang modawat sa kamatuoran. Tudloi sila sa husto nga doktrina sa yano ug klaro nga paagi, uban sa pinulongan ug ehemplo nga sila makasabut.

2. Ang mga bata makaila sa impluwensya sa Espiritu. Tudloi sila nga ang mga pagbati sa kalinaw, gugma, ug kalipay nga anaa nila naggikan sa Espiritu Santo kon sila mag-istorya o magkanta mahitungod ni Jesukristo ug sa Iyang ebanghelyo. Tabangi sila sa pagsabut nga kini nga mga pagbati mao ang kabahin sa usa ka pagpamatuod.

3. Ang mga bata makasabut sa tinuoray nga mga ideya. Komplikadong mga sambingay mahimong makapalibog nila. Kon ikaw magtudlo, ipasabut ang pamilyar nga mga panghitabo ug mga kalihokan: sa balay, pamilya, ug ang kalibutan nga naglibut kanila.

4. Ang mga bata matinguhaon sa pagkat-on. Sila malingaw sa pagkat-on pinaagi sa nagkadaiyang kasinatian ug daghang mga pagbati. Espesyal silang motubag sa mga biswal nga tabang ug pagpaapil diha sa mga leksyon. Tuguti sila sa paglihok, pag-explore, ug pagsulay og bag-ong mga butang.

5. Ang mga bata matinguhaon nga mopakigbahin ug motabang. Aduna silay mga butang nga sila makatudlo sa usag usa ug kanimo. Dapita sila sa pagpakigbahin unsa ang ilang nakat-unan. Hatagi sila og mga oportunidad sa pagbasa sa mga kasulatan, mogunit og mga litrato, motubag sa mga pangutana, o mosulat diha sa pisara.

6. Ang mga bata mahigugmaon ug gustong higugmaon Pangita og mga oportunidad sa pagpalig-on sa kamabination ug kamahigugmaon nga kinaiya nga natural nga naggikan diha nila. Palamboa ang ilang pagsalig sa kaugalingon pinaagi sa pagpahayag sa imong gugma ug pagpasalamat ug pinaagi sa pagpaminaw og maayo sa unsay ilang isulti.

7. Ang mga bata mosunod sa imong ehemplo. Ikaw kanunayng nagtudlo, bisan kon wala kamo makabantay niini. Ang mga bata makabantay kon sa unsang paagi nga imong gisunod ang mga baruganan nga imong gitudlo. Ang imong matarung nga ehemplo adunay gamahanang impluwensya sa ilang naglambo nga mga pagpamatuod.

8. Ang mga bata kasagaran mubo lang ang atensyon. Ang kinaiya nga dili manumbaling mahimong nagpasabut nga gikapoy sila o gigutom, nga dili sila makasabut sa butang nga imong gisulti, nga kinahanglan silang molihok, o gilaay sila. Sila malingaw sa pagkat-on pinaagi sa pagbalik-balik, lain-lain, yano nga mga istorya, mga kanta, ug mga kalihokan. Awhaga sila sa pag-apil diha sa leksyon.