Paghinumdom sa Manluluwas

Ni Eric B. Murdock

Mga Magasin sa Simbahan

Daghang mga panalangin ang moabut sa atong paghinumdom ni Jesukristo pinaagi sa pag-ambit sa sakrament.

Matag semana, napanalanginan kita sa oportunidad sa pag-ambit sa sakrament kon mosimba kita. Gani, mao kini ang pinakaimportante nga rason nga mosimba kita sa Dominggo. Apan nasayud ba kamo ngano nga ang sakrament importante kaayo? Adunay usa ka butang nga atong gisaad nga buhaton nga nakapahimo niini nga labing importante ug sagrado nga mga ordinansa diha sa Simbahan: hinumdumi si Jesukristo.

Hunahunaa kini: ang paghinumdom sa Manluluwas usa ka importante nga bahin sa mga pag-ampo sa sakrament. Kanila misaad kita nga kita sa “kanunay mohinumdom kaniya” (D&P 20:77, 79), dili lang sa Dominggo apan sa kanunay. Kon hinumduman nato kanunay ang Manluluwas, ang atong mga kinabuhi modan-ag sa Iyang mga sumbanan ug mga pagtulun-an, ug kita makakita usab og gamhanan ug mapaluyuhon nga impluwensya sa atong mga kinabuhi.

Sa Unsang Paagi nga ang Paghinumdom Nakatabang sa Usa ka Batan-ong Lalaki

Pananglit, sa dihang ang usa ka anghel sa Dios mitawag ni Alma ang Batan-on sa paghinulsol, natumba si Alma sa yuta ug dili makasulti o makalihok sulod sa daghang mga adlaw. Niining higayuna, gihasol siya sa hunahuna sa iyang mga sala, apan dayon siya “nahinumdom … nga nakabati sa [iyang] amahan nga nanagna … mahitungod sa pag-anhi sa usa ka Jesukristo, usa ka Anak sa Dios, aron sa pag-ula sa iyang dugo alang sa mga sala sa kalibutan.” Dayon miingon siya: “Karon, samtang ang akong hunahuna naghinuktok niini nga panumduman, ako nangamuyo sulod sa akong kasingkasing: O Jesus, ikaw nga Anak sa Dios, malooy ka kanako, kinsa ania sa apdo sa kapaitan, ug ako giliyokan sa walay katapusan nga mga kadena sa kamatayon. Ug karon, tan-awa, sa diha nga ako naghunahuna niini, ako wala na mahinumdom sa akong mga kasakit” (Alma 36:17–19).

Ang paghunahuna lang ni Kristo migiya ni Alma sa pag-ampo alang sa kalooy, nga nakapawala sa iyang sala, nakapawagtang sa iyang kasakit, ug nakatabang niya sa paghinulsol. Sama ni Alma, atong isalig ang atong mga kinabuhi ngadto ni Kristo ug makasinati sa kalipay nga moabut tungod sa pagsunod sa ebanghelyo. Magsugod kini sa atong pagpili sa paghinumdom ni Jesukristo ug sa gahum sa Iyang Pag-ula.

Ania ang lima pa ka mga panalangin nga moabut tungod sa atong pagtuman sa saad sa kanunay nga paghinumdom sa Manluluwas.

Ang Iyang Espiritu Magauban Kanato

Kon kamo moambit sa sakrament sa Dominggo, kamo gipahinumduman sa saad nga, kon kamo mahinumdom ni Kristo, maghupot sa Iyang mga sugo, ug modala sa Iyang ngalan diha kaninyo, kamo sa kanunay makabaton sa Iyang Espiritu uban kaninyo. Sa kalibutan nga puno sa mga hagit, sayon ra nga mahisalaag. Apan kon anaa kaninyo ang Espiritu Santo, “pinaagi sa gahum sa Espiritu Santo kamo mahimo nga masayud sa kamatuoran sa tanan nga mga butang” (Moroni 10:5). Ang Espiritu sa Ginoo mahimo ninyong giya ug mopanalangin kaninyo uban sa direksyon, panudlo, ug proteksyon.
Siya Makahatag Kanato og Kalig-on sa Pagbatok sa mga Tintasyon

Ang atong labing maayo ug sigurado nga depensa batok sa tintasyon mao ang atong hugot nga pagtuo ni Jesukristo (tan-awa sa Alma 37:33). Sa atong pag--focus sa atong mga hunahuna diha kang Kristo, makaila kita sa mga bakak ni Satanas ug makabantay sa iyang pagsulay sa pag-ilad kanato. Tungod kay si Jesus nag-atubang og tintasyon apan wala gayud magpadala niini, makasalig kita Kaniya kon kita mag-atubang og mga tintasyon. Si Nephi mitudlo nga kadtong kinsa “mopatalinghug [sa pulong sa Dios] dili gayud sila malaglag; ni ang mga pagtintal ug ang nagdilaab nga mga panâ sa kaaway makabuntog kanila” (1 Nephi 15:24). Kon kita mahinumdom sa Manluluwas ug sa Iyang mga pagtulun-an, Siya makabayaw nato ug molig-on nato batok sa mga tintasyon.
Ang Iyang Ehemplo Mogiya Nato

Dili lamang si Jesus mosulti nato asa paingon alang sa kinabuhing dayon; Siya mogiya sa agianan. Siya miingon, “Ako mao ang dalan, ang kamatuoran, ug ang kinabuhi” (Juan 14:6). Si Kristo ang atong hingpit nga ehemplo. Panahon sa Iyang mortal nga pangalagad, si Jesus mitudlo ug mipakita og gugma, kaaghup, kamapainubsanon, ug kapuangod. Iyang gigahin ang Iyang panahon sa pagtudlo, pagserbisyo ug paghigugma sa uban.

Sa tanan nga Iyang gibuhat, nagsunod Siya sa kabubut-on sa Iyang Amahan (tan-awa sa Juan 5:30). Sa tanang mga butang, ang Manluluwas mihan-ay sa sumbanan kon unsaon nato sa pagpakabuhi, ug midapit Siya natong tanan sa pagsunod sa Iyang ehemplo.

Kon makamatikod mo nga wala mo makahibalo asa moadto o unsay buhaton, hinumdumi ang Manluluwas. Miingon Siya, “Ako mao ang kahayag alang sa kalibutan: siya nga magasunod kanako dili gayud magalakaw sa kangitngit, hinonoa magabaton siya sa kahayag nga magahatag og kinabuhi” (Juan 8:12).
Makatabang Siya Kanato sa Pagserbisyo sa Uban

Kanunay nga giuna ni Jesus ang mga panginahanglan sa uban kay sa Iyang kaugalingong mga panginahanglan. Siya “nangadto-adto sa paghimog mga kaayohan” (Mga Buhat 10:38). Giayo Niya ang masakiton ug mitabang niadtong anaa sa Iyang palibut. Kon hinumduman nato si Jesus, atong mahinumduman ang mga buhat sa pagserbisyo nga wala maghunahuna sa kaugalingon nga maoy makita sa Iyang kinabuhi. Makahinumdom usab kita nga Siya mihangyo kanato sa pagserbisyo Kaniya pinaagi sa pagserbisyo sa uban. “Kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17).

Ang Ginoo moabli sa inyong mga mata aron makakita niadtong anaa sa inyong palibut nga makagamit sa inyong panabang. Magiyahan usab kamo kon sa unsa nga paagi kamo makaserbisyo og maayo kanila. Ang inyong kinabuhi mas malipayon ug mas maanindot kon kamo mohatag og gagmay ug yanong mga buhat sa mabinationg pagserbisyo. Ang pagserbisyo sa uban makahatag og pagbati sa kalinaw ug kalipay sa inyong kinabuhi.
Kita Makahinulsol

Kitang tanan masayop sa pagsunod sa mga sugo, bisan og sinsero kitang naningkamot, apan tungod sa kinabuhi ug misyon ni Jesukristo, adunay paagi sa pagbalik.

Ang paghinumdom ni Jesukristo nagpahinumdom nato sa gasa sa paghinulsol nga gitanyag pinaagi sa Iyang Pag-ula. Gidapit kitang tanan ni Jesus sa paghinulsol, ug kita makasinati og kalipay kon kita mobiya sa sala ug mobalik ngadto Kaniya. Kon kita dunay sinsero nga tinguha nga mag-usab ug magsunod sa mga sugo, ang Ginoo misaad, “Siya kinsa naghinulsol sa iyang mga sala, ang mao gipasaylo, ug Ako, ang Ginoo, dili na mahinumdom kanila” (D&P 58:42).

Sa inyong pag-ambit sa sakrament, kamo misaad nga sa kanunay mahinumdom sa Manluluwas. Kon ibutang ninyo kanunay sa inyong hunahuna si Kristo, mas mahimo Siyang sentro sa inyong kinabuhi ug mas mogiya ug modirekta Siya kaninyo aron sa pagkab-ot sa inyong tanang potensyal. Ang kanunay nga paghinumdom sa Manluluwas makapanalangin kanunay sa inyong kinabuhi.