Kita Naghisgot kang Kristo
Ang Paghigugma ngadto sa Uban nga Lahi og mga Mithi
Gipaningkamutan nako nga magdako ang akong mga anak nga magbaton og taas nga mga sumbanan sa moralidad. Apan dihang usa sa ilang mga role model mihimo og sayop nga mga pagpili, naghunahuna ko kon ang tanan nga gipaningkamutan nakong matudlo mapakyas lang ba.
Ang akong bayaw nga si Janey (ang ngalan giusab) nagtubo sa ebanghelyo ug mahalaron kaayo nga miyembro sa Simbahan. Human nga ang maingon og malipayon unta nga kaminyoon sa templo wala madayon, ang mga tawo sa gamay niyang komunidad nagsugod sa paghimo og mga istorya-istorya ug gihukman siya. Mipalayo siya sa daghan niyang mga higala ug sa kadugayan sa Simbahan.
Nagsugod siya sa pagpakig-date og usa ka batan-on, nga si Andy, nga sa wala madugay nakig-ipon kaniya. Nagproblema ko kon unsaon nako sa pagsulti sa akong mga anak. Gihigugma kaayo sa tulo nako ka batan-ong anak nga mga babaye ang ilang iyaan nga si Janey. Dili lamang suod kaayo ang among pamilya, apan siya ang ilang dance teacher, mao nga magkita sila daghang higayon sa usa ka semana.
Sulod sa pipila ka bulan, nagtuo lang sila nga kanunayng mobisita si Andy, apan gisultihan ra nako sila nga si Janey ug si Andy nagpuyo-puyo na. Akong gipasabut nga ang pagpili nga ilang gihimo usa ka seryuso nga sala. Ang akong mga anak ingon og nakasabut ra, ug duna mi maayo nga paghisgot mahitungod sa kaimportante sa pagsunod sa mga baruganan sa ebanghelyo.
Dayon may dakong nahitabo. Malipayon nga gipahibalo ni Janey sa pamilya nga siya ug si Andy hapit na dunay anak. Nabalaka na usab ako sa mahimong epekto niini nga balita ngadto sa akong mga anak. Nahibalo ba sila nga dili ingon niini nga paagi ang gusto sa Langitnong Amahan sa pagpadala og Iyang mga anak dinhi sa kalibutan? Kon sila ang anaa niini nga sitwasyon, maghunahuna ba sila nga madawat ra ug normal ra kini?
Nagsubo ko sulod sa mga semana, dili ko gustong mosulti sa akong mga anak niining bag-ong hitabo. Mga bulan ang milabay si Janey ug sa Andy nakahukom nga magminyo. Nganong wala man sila makahulat nga ipahibalo ang pagmabdos hangtud nga minyo na sila?
Miulbo ang akong kapungot. Sa unsang paagi ako mahigugma ni Janey apan dili ang iyang gihimo? Sa unsang paagi akong matudloan ang akong mga anak sa pagpadayon nga mohigugma sa ilang iyaan apan dili ang mga pagpili nga iyang gihimo?
Usa ka adlaw gisultihan ko sa akong igsoon mahitungod sa usa ka batan-ong babaye sa iyang ward nga namabdos. Kini nga batan-on padayon nga misimba ug ingon og malipayon ra ug mahinamon sa umaabut nga panghitabo sa iyang kinabuhi. Ang ubang mga batan-ong babaye naglibug sa ilang nakita kaniya nga ingon og wala ray nahitabo mahitungod sa sitwasyon.
Apan ang akong igsoon, nga maoy visiting teacher sa inahan sa batan-ong babaye, nahibalo sa dili maihap nga mga gabii nga naghilak ang batan-ong babaye atol sa iyang pagkatulog, sa labihang kasubo gumikan sa mga pagpili nga misangput niini nga sitwasyon. Paglabay sa pipila ka semana nga pag-antus, ang batan-ong babaye mihukom kon magpadayon ba siya sa iyang pagsubo, o mangita og paagi nga makapadayon ug magmalipayon. Tungod sa maulaong pagsakripisyo ni Kristo, madawat niya ang mga sangputanan sa iyang mga desisyon ug sa makausa mamahimong limpyo pinaagi sa paghinulsol.
Naghunahuna ko kon si Janey miagi ba sa susamang butang. Gimahayan ba niya ang iyang mga pagpili apan, dili mahimong mousab sa mga sangputanan, gidawat kini ug mihukom nga mangitag paagi sa pagpadayon?
Naulaw ko sa pintas nako nga mga paghukom ug sa wala nako paghigugma sama sa gilauman ni Jesukristo nga atong ipakita. Dihang gipamalandungan nako ang kinabuhi sa Manluluwas, nahinumdom ko nga kanunay Niyang gipangita ang mga makasasala, gitudloan sila pinaagi sa Iyang mga pulong ug ehemplo, ug sa paghigugma kanila. Mao kini ang gugma nga mipahumok sa mga kasingkasing ug miusab sa mga tawo.
Akong naamguhan nga sa kasagaran gayud higugmaon nako ang mga tawo kon sila naghimo sa unsay gituohan nako nga ilang buhaton, apan kon masayop na gani sila, gihimaraot nako sila sa akong kasingkasing. Hipokrito diay kaayo ako! Nahinumdom ko nga kinahanglan kong maghinulsol. Nagkinahanglan ko nga mohigugma sa makasasala nga dili mag-endorso sa sala. Sa katapusan, nawagtang ra ang gibati nakong kapungot ngadto kang Janey ug tinuod nako siyang gihigugma og balik.
Duna na usab akoy maayong panaghisgot uban sa akong mga anak. Akong gihatagan og importansya ang kaminyoon sa dili pa makaanak. Among gilantaw ang pagkatawo sa bag-ong bata diha sa pamilya. Tanan kami gustong mosuporta ni Janey ug mopakigbahin niining espesyal nga panahon sa iyang kinabuhi. Ang akong mga anak nakahibalo nga ang ilang Tiya Janey nakahimo og sayop, apan sila nahigugma gihapon kaniya ug sa ilang Tiyo Andy ug nanghinaot nga ang matahum nilang pamilya ugma damlag mohukom nga mobalik sa naghulat nga mga bukton sa atong Manluluwas, si Jesukristo.