Pagtahud sa Dios pinaagi sa Pagtuman sa Atong mga Pakigsaad

Ni Elder Joseph W. Sitati

Sa Seventy

Ang labing mahinungdanon nga mga panalangin sa atong hugot nga pagtuo sa Dios makita diha sa pagtahud Kaniya pinaagi sa pagtuman sa atong mga pakigsaad.

Niadtong 1985 si Sister Sitati ug ako nakahimamat og tawo nga ginganlan og Roger Howard didto sa Nairobi, Kenya. Siya ug ang iyang asawa, nga si Eileen, nagserbisyo isip senior missionary couple. Gidapit kami nila sa pag-apil sa gamay nga kongregasyon nga magtigum sa ilang panimalay. Mao kadto ang unang higayon nga mitambong kami og miting sa mga miyembro sa Ang Simbahan ni Jesukristo sa mga Santos sa Ulahing mga Adlaw. Gibati namo ang Espiritu nianang unang miting, ug sukad niadto mosimba mi matag Dominggo.

Paglabay sa pipila ka bulan, si Roger mibunyag namo, uban sa among nuebe anyos nga anak nga lalaki. Sa wala madugay, si Roger ug Eileen mipauli sa paghuman sa ilang misyon. Padayon kaming makabalita kanila matag pipila ka tuig.

Sa sayong bahin niadtong 2010, si Sister Sitati ug ako sa katapusan nakakita pag-usab ni Roger. Hapit na siya moabut og 90 anyos. Tungod sa katigulangon ug dili maayong panglawas, nagsalig na lang siya sa iyang walker. Samtang nagbarug mi nga nag-atubangay sa unang higayon sa daghang mga tuig, gibati namo ang samang kalipay nga dili mahulagway. Mitulo ang mga luha samtang kami nagginaksanay. Gibati namo ang dakong pasalamat sa usag usa ug sa kahibulongang gasa sa ebanghelyo. Nagkahiusa kami sa hugot nga pagtuo isip isig katagilungsod sa gingharian sa Dios.

Samtang akong gitagamtam kana nga higayon, usa ka kasulatan ang miabut sa akong hunahuna: “Hinumdumi ang bili sa mga kalag mahinungdanon sa panan-aw sa Dios; …

“Ug kon kini mahimo nga ikaw manlimbasog sa tanan nimo nga mga adlaw sa pagsangyaw og paghinulsol ngadto niini nga mga katawhan, ug magdala, bisan usa ka kalag ngari kanako, unsa ka dako ang imong hingpit nga kalipay uban kaniya diha sa gingharian sa akong Amahan!” (D&P 18:10, 15).

Pipila ka labing mahinungdanong mga panalangin sa Dios gisaad ngadto niadtong kinsa modala og mga kalag ngadto sa Iyang gingharian. Ang Manluluwas misulti: “Kamo wala magpili kanako, hinonoa Ako mao ang nagpili kaninyo, ug nagtudlo kaninyo, aron managpanglakaw kamo ug managpamunga, ug magalungtad ang inyong bunga: aron nga pinaagi sa akong ngalan igahatag kaninyo sa Amahan ang bisan unsang butang nga inyong pangayoon kaniya.” (Juan 15:16).

Namatay si Roger sa ulahing bahin nianang tuiga. Duna koy pagbati nga siya usa ka tawo nga nagmalinawon uban sa Dios. Natandog niya pag-ayo ang among mga kinabuhi pinaagi sa pagpakigbahin sa ebanghelyo. Ang iyang ehemplo sa gipahinungod nga pagserbisyo sa iyang isigkatawo, uban sa mga kasundalohan sa batan-on ug senior nga mga misyonaryo nga nagserbisyo sa Simbahan, nagpakita nga kita nagtahud sa Dios.

Ang Atong Relasyon sa Pakigsaad sa Dios

Salamat sa among pagkasakop sa gipahiuli nga Simbahan ni Jesukristo, matag usa nato dunay nagbugkos nga personal nga relasyon uban sa Langitnong Amahan pinaagi sa mga pakigsaad. Ang matag pakigsaad gikumpirmar sa usa ka ordinansa, diin andam natong dawaton ug mapasaligon sa pagtuman sa pakigsaad. Si Jesukristo, pinaagi sa Iyang Pag-ula, makapahimo nato sa pagtuman sa atong mga obligasyon sa matag pakigsaad samtang kita mogamit sa hugot nga pagtuo diha Kaniya.

Atong gitahud ang Langitnong Amahan samtang atong gipalawman ang atong relasyon uban Kaniya pinaagi sa paghimo ug pagtuman sa tanang makaluwas nga mga pakigsaad ug mga ordinansa. Panalanginan Niya kadtong motuman sa ilang mga pakigsaad uban sa Iyang Espiritu sa paggiya ug paglig-on kanila. Ang mosunod mao ang labing importante nga mga relasyon sa pakigsaad nga atong maestablisar uban sa Langitnong Amahan.

Ang Pakigsaad sa Bunyag

Ang bunyag modala nato ngadto sa unang relasyon sa pakigsaad uban sa Dios. Kita mahimong sarang alang sa mga ordinansa kon kita “magpaubos sa [atong kaugalingon] sa atubangan sa Dios, … moduol uban ang masulub-on nga mga kasingkasing ug mahinulsulon nga mga espiritu, ug magpamatuod sa atubangan sa simbahan nga [kita] sa pagkatinuod naghinulsol sa tanan [natong] mga sala, … ug sa pagkatinuod magpakita pinaagi sa [atong] mga buhat nga [kita] makadawat sa Espiritu ni Kristo ngadto sa kapasayloan sa [atong] mga sala” (D&P 20:37).

Samtang magpakita kita sa atong mga lihok nga kita “andam sa pagdala diha [kanato] sa ngalan ni Jesukristo, nga adunay hugot nga tinguha sa pag-alagad kaniya ngadto sa katapusan” (D&P 20:37), “pagtambayayong sa usag usa nga mga alantuson, nga sila mahimo nga magaan; … pagbangutan uban niadto nga nagbangutan; … ug sa paghupay niadto nga nagkinahanglan sa kahupayan, ug mobarug ingon nga mga saksi sa Dios sa tanan nga mga panahon ug diha sa tanan nga mga butang ug diha sa tanan nga mga dapit nga [kita] mahimo nga maanaa, bisan hangtud sa kamatayon” (Mosiah 18:8–9), kita motuman sa pakigsaad.

Hinoon, ang Dios mopasidungog kanato sa gasa sa Espiritu Santo, diin kita makadawat sa kanunayng pagpakig-uban sa Espiritu Santo, kinsa naghatag og giya ug direksyon sa tanan natong kalihokan, naggiya kanato ngadto sa kinabuhing dayon (tan-awa sa Mosiah 18:9–10).

Ako mibati og hingpit nga kalipay ug pagkapuno sa Espiritu human sa akong bunyag, diin padayon nakong nasinati sa matag higayon nga ako duol sa Dios.

Ang Panumpa ug Pakigsaad sa Priesthood

Ang mga lalaki kinsa motuman sa pakigsaad sa bunyag mokwalipay sa pagsulod ngadto sa panumpa ug pakigsaad sa priesthood. Madawat nato kini pinaagi sa pagpandong sa mga kamot. Ang pakigsaad sa priesthood usa ka pakigsaad sa pagserbisyo alang sa kaluwasan sa mga anak sa Dios. Atong gitahud ang Dios kon atong palamboon ang atong mga calling (tan-awa sa D&P 84:33) ug “moalagad kaniya sa tibuok [nato] nga kasingkasing, gahum, hunahuna ug kusog” (D&P 4:2) ug uban sa “hugot nga pagtuo, paglaum, gugma nga putli ug pagmahal, uban ang bug-os nga tinguha ngadto sa himaya sa Dios” (D&P 4:5).

Ang mga panalangin sa Ginoo nga moabut sa matinud-anong mga naghupot sa priesthood maglakip sa pagkabalaan “pinaagi sa Espiritu ngadto sa pagbag-o sa ilang mga lawas” (D&P 84:33). Sila mahimong mga manununod sa mga panalangin ni Moises ug Abraham (tan-awa sa D&P 84:34). Ang mga propeta ug mga apostoles sa ulahing mga adlaw mao ang maayong mga ehemplo niadtong kinsa nagpalambo sa ilang priesthood. Ang ilang mga kinabuhi mao ang pagpamatuod nga ang Ginoo nagpasidungog kanila.

Ang mga Ordinansa ug mga Pakigsaad sa Templo

Ang mga lalaki kinsa takus nga naghupot sa labaw nga priesthood ug ang mga babaye kinsa takus makadawat sa sagrado nga mga ordinansa ug mohimo og sagrado nga mga pakigsaad didto sa templo. Pinaagi sa mga ordinansa ug mga pakigsaad sa templo, makat-unan nato ang pagsabut sa katuyoan niini nga kinabuhi ug mahimong andam sa kinabuhing dayon. Madawat nato ang ordinansa ug mosulod sa pakigsaad sa mahangturong kaminyoon ug sa pagbugkos sa atong mga pamilya. Mopasalig kita sa pagpahinungod sa atong mga kinabuhi ngadto sa Dios ug sa buhat sa kaluwasan alang sa Iyang tanan nga mga anak. Ang matinud-anon nga pagtuman niini nga mga pakigsaad naghatag nato og katungod sa padawat og espiritwal nga giya ug gahum sa pagbuntog sa mga pagsulay sa pagkamortal ug sa pag-angkon sa kahimayaan, ang labing mahinungdanong panalangin nga ikahatag sa Dios sa Iyang mga anak (tan-awa sa D&P 14:7). Ang kahimayaan, o kinabuhing dayon, mao ang pagtagamtam isip mga pamilya sa kalidad sa kinabuhi nga gipuy-an sa atong Langitnong Amahan.

Ang Sakrament

The Greatest of All, ni Del Parson

Alang sa mga miyembro sa Simbahan, ang pag-ambit sa sakrament sa takus nga paagi matag Igpapahulay nga adlaw importante. Pinaagi niini nga ordinansa, atong gikumpirmar ang atong padayon nga pagkaandam sa pagdala ngari nato sa pangalan ni Jesukristo ug sa pagbag-o sa atong pasalig sa pagtuman sa tanang mga pakigsaad nga atong gihimo. Atong gigamit ang gahum sa Pag-ula ni Jesukristo sa pagtabang nato nga makalahutay hangtud sa katapusan diha sa pagkamatarung. Kon atong buhaton, mokwalipay kita sa tanang mga panalangin sa tanang mga pakigsaad nga atong gihimo.

Matarung nga mga Tinguha

Ang paglapas sa usa ka pakigsaad makapasilo sa Dios ug makapawalay epekto sa gisaad nga mga panalangin (tan-awa sa D&P 82:10).

Sa 1 Samuel 2:12–17, 22–34, atong nahibaloan ang dautan nga gibuhat sa anak nga mga lalaki ni Eli ang pari. Ilang gipahimuslan ang katungdanan sa ilang amahan sa paglapas sa pakigsaad sa priesthood. Nagtinguha sila sa pagtagbaw sa ilang mahigalon nga mga tinguha samtang naghimo sila og imoral nga binuhatan uban sa mga babaye nga nagsimba ug samtang ilang gikuha sa dinautan nga paagi alang sa ilang mga kaugalingon ang pagkaon sa mga sakripisyo sa katawhan sa Israel. Ang Ginoo mihatag og grabe nga mga paghukom batok sa anak nga mga lalaki ni Eli ug batok ni Eli mismo tungod sa pagkapakyas sa pagpugong kanila.

Ang maong lawasnong mga tinguha mahimong mabuntog pinaagi sa determinasyon sa pagtuman sa atong mga pakigsaad uban sa Dios, sama sa gipakita ni Jose sa Ehipto sa dihang giatubag sa mahigalon nga dili tumutuo (tan-awa sa Genesis 39:9, 12). Gipasidunggan sa Dios si Jose ug gitabangan siya sa pagbuntog sa tanang mga plano sa dautan batok kaniya. Nahimo siyang ikaduhang labing gamhanang tawo sa Ehipto ug instrumento sa mga kamot sa Dios sa pagpreserbar sa pamilya ni Israel (tan-awa sa Genesis 45:7–8).

Kon kita mabuntog sa tintasyon, ang tinguha sa pagpahiuli sa atong relasyon uban sa Langitnong Amahan mogiya kanato sa sinsero nga paghinulsol. Ang Pag-ula sa Manluluwas nga si Jesukristo nagtabang nato nga mahimong takus nga mag-usab.

Pagsunod sa mga Propeta

Sa dihang si Kristo miestablisar sa Iyang Simbahan, Siya mipili og mga apostoles, mga propeta, mga ebanghelista, mga pastor ug mga magtutudlo “alang sa paglig-on sa lawas ni Kristo:

“Hangtud makakab-ot kitang tanan sa pagkahiniusa sa pagtuo, ug sa kahibalo mahitungod sa Anak sa Dios, ug makakab-ot sa kahamtong sa pagkatawo, sa sukod sa gidak-on sa kahupnganan ni Kristo” (Mga Taga-Efeso 4:12–13).

Ang atong buhi nga mga propeta ug mga apostoles nagtudlo nga ang “ang kalipay diha sa kinabuhi sa pamilya labaw nga makab-ot kon kini gibase sa mga pagtulun-an sa Ginoong Jesukristo. Malampuson nga mga kaminyoon ug mga pamilya natukod ug napadayon diha sa mga baruganan sa hugot nga pagtuo, pag-ampo, paghinulsol, pagpasaylo, pagtahud, gugma, kalooy, buhat ug maayong makalingaw nga mga kalihokan” (“Ang Pamilya: Usa ka Pamahayag ngadto sa Kalibutan,” Liahona, Nob. 2010, 129).

Ang atong mga panimalay ug mga pamilya naghatag sa pundasyon alang sa paglig-on sa mga relasyon uban sa Dios base sa mga pakigsaad. Ang pagsunod sa dinasig nga mga pagtulun-an sa atong buhing mga propeta makatabang nato nga makabaton og lig-on nga mga pamilya, mohatag kanato og gahum sa pagtuman sa atong mga pakigsaad, ug mag-angkon sa labing mahinungdanon nga mga panalangin sa atong hugot nga pagtuo.