Hangtud Kita Magkita Pag-usab
Espiritwal nga mga Buaya
“Binuang,” miingon ko. “Walay mga buaya diha.”
Image © iStock/Thinkstock
Gusto gyud kong moadto sa Africa ug motan-aw sa mga hayop, ug sa katapusan miabut kana nga oportunidad. …
Mihunong kami sa usa ka lungag nga may tubig aron tan-awon ang mga hayop nga mangadto aron sa pag-inom. Uga kaayo kadto nga panahon ug wala kaayoy daghang tubig, tinuod lapukon lang nga mga dapit. Dihang ang elepante mitikang ngadto sa humok nga lapok ang tubig mipundo ngadto sa gitumban ug ang mga hayop manginom gikan sa agi sa tunob sa elepante.
Ang antelope [usa], klaro, nga ginerbyus kaayo. Moduol sila sa lapukon nga lungag, apan managan sila palayo sa dakong kahadlok. Wala akoy nakitang mga leon sa palibut ug gipangutana ang tiggiya nganong wala sila manginom. Ang iyang tubag, ug mao kini ang leksyon, mao ang “mga Buaya.”
Basin nangomedya ra siya ug seryuso nako siyang gipangutana, “Unsa man diay problema?” Mao gihapon ang tubag: “mga Buaya.”
“Binuang,” miingon ko. “Walay mga buaya diha.” …
Nakabantay siya nga wa ko motuo niya ug gisiguro, sa akong pagtuo, aron matudloan ko og leksyon. Nangadto mi sa laing lokasyon diin ang sakyanan diha sa may pilapilan ibabaw sa lapukong nga lungag diin makatan-aw kami sa ubos. “Diha,” miingon siya. “Tan-awa aron imong masuta.”
Wala koy laing makita kondili ang lapok, gamayng tubig, ug gipangnirbyus nga mga hayop didto sa layo. Dayon sa kalit nakita ko kini!—dako kaayong buaya, nagluob sa lapok, naghulat og mga hayop nga giuhaw kaayo para moinom. …
Ang tiggiya mas mabination ngari nako kay sa angay nakong madawat. Ang akong “hibaloi ang tanan” nga hagit sa una niyang pamahayag nga, “mga buaya,” tingali nagdala sa pagdapit nga, “Ah sige, adtoa ug tan-awa aron imong masuta!”
Makaingon gyud ko nga wala koy makita nga mga buaya. Sigurado ko niana sa akong kaugalingon naghunahuna ko nga susihon ko kaha kon unsay anaa. Ang akong pagpakita nga mas kamao posibling makamatay! Apan pasensyuso kaayo siya sa pagtudlo kanako.
Batan-on kong mga higala, hinaot nga mas maalamon kamo sa pagpakig-istorya sa inyong mga tiggiya kaysa kanako niana nga okasyon. Kadto nga kawalay pagtahud o pagsalig dili angay kanako, gani dili usab angay kaninyo. Akong gimahayan ang akong gihimo niadtong higayuna, ug siguro maulaw kong mosulti ninyo mahitungod niini apan ang pagsulti niini makatabang kaninyo.
Ang nanag-una kaninyo niini nga kinabuhi makapahimangno bahin sa mga peligro nga mahimo ninyong masugatan. Dili lang ang dako, abuhon nga mga buaya nga makakunis-kunis kaninyo, apan ang espirituhanong mga buaya, nga labihan pa ka peligro, ug labaw ka malinglahon ug dili kaayo makita, gani, labaw pa ka maayong motakuban nga mga buaya sa Africa.
Kining espirituhanong mga buaya makapatay o makaguba sa inyong mga kalag. Makawagtang kini sa kalinaw sa inyong hunahuna ug sa kalinaw sa hunahuna sa mga nahigugma kaninyo. Mao kini ang angayan nga ipasidaan, ug walay dapit dinhi sa mortalidad karon nga wala puy-i niini. …
Bulahan lamang nga dunay mga giya sa kinabuhi nga igong makapugong nga mahitabo kining mga butanga kon kita andam nga modawat sa tambag karon ug unya.