Ang mga Propeta ug mga Apostoles Namulong Karon

Pabor sa Relihiyuso nga Kagawasan

Bisitahi ang news.lds.org alang sa dugang nga balita ug panghitabo sa Simbahan.

Ang katawhan sa tanang kanasuran kinahanglan magtambayayong sa pagdasig og relihiyuso nga kagawasan, gibalikbalik sa pagsulti sa mga lider sa Simbahan.

“Ang mga miyembro sa Simbahan nagtinguha sa pagmugna og kaayohan diha sa mga tawo sa tanang relihiyusong pagtuo, politikanhong hunahuna, ug sa matag kaliwatan,” matud ni Presidente Dieter F. Uchtdorf, Ikaduhang Magtatambag sa Unang Kapangulohan, atol sa Religious Symposium ni John A. Widtsoe sa University of Southern California sa Los Angeles, California, USA, niadtong Abril 2015.

“Ang paningkamot sa pagwagtang sa mga tradisyon sa kawalay pagsalig ug kawalay panginlabut ug tinud-anay nga mosabut sa usag usa uban sa bag-ong pagtan-aw—motan-aw sa usag-usa dili isip mga langyaw o kaaway apan isip isig ka biyahero, kaigsoonan, ug mga anak sa Dios—mao ang kinadak-ang hagit samtang sa samang higayon labing magantihon ug makapadasig nga mga kasinatian sa atong tawhanong pagpakabuhi,” miingon si Presidente Uchtdorf. Ang usa sa iyang mga hangyo alang sa pagtahud ug pagsabut sa kasamtangan nga gihimo sa mga propeta ug mga apostoles.

“Kinahanglan walay pagpang-atake tali sa relihiyon ug sa gobyerno,” miingon si Elder Dallin H. Oaks sa Korum sa Napulog Duha ka mga Apostoles diha sa Court/Clergy Conference sa Congregation B’nai Israel didto sa Sacramento, California, USA, niadtong Oktuber 2015. “Mapildi kitang tanan kon ang pagbati sa kasuko o pagpang-atake o panagbingkil magpatibabaw,” siya miingon.

“Ang mga Pangagamhanan ug ang mga balaud niini maghatag og mahinungdanong pagpanalipod alang sa mga tumutuo ug relihiyusong mga organisasyon ug sa ilang mga kalihokan,” siya miingon, milakbit nga ang mga relihiyusong baruganan, pagtulun-an ug mga organisasyon “makatabang sa pagmugna og mga kondisyon diin ang mga publiko nga mga balaud ug mga institusyon sa pangagamhanan ug sa mga katagilungsod makapalambo,” aron ang tanan “magpuyo sa kalipay, pag-uyonay, ug kalinaw.”

Si Elder Oaks namulong usab mahitungod sa relihiyusong kagawasan diha sa usa ka panagtigum didto sa Argentina (tan-awa sa “Mga Balita sa Simbahan,” Liahona, Ene. 2016, 16).

Si Elder Jeffrey R. Holland sa Korum sa Napulog Duha ka mga Apostoles namulong ngadto sa tanang Partido sa Parliamentary Group on Foreign Affairs didto sa House of Lords sa London, England, niadtong Hunyo 2015. “Pinaagi sa pagdani sa kahiladman nga mithi sa tawo,” siya miingon, “ang mga relihiyon ug relihiyusong mga organisasyon adunay lahi nga kapasidad sa pagdasig sa mga tawo ug, sa samang higayon, sa pag-ugmad sa mga kinaiya sa pagpasaylo, pagpakig-uli, ug kagustohan sa pagpaningkamot usab alang sa gilauman sa ilang personal nga mga kinabuhi ug sa katilingban.”

“Ang relihiyusong kagawasan mao ang bato sa pamag-ang sa kalinaw sa usa ka kalibutan nga daghan ang nag-indigay nga mga pilosopiya,” si Elder D. Todd Christofferson sa Korum sa Napulog Duha ka mga Apostoles misulti sa usa ka grupo sa interfaith sa Brazil Mosque didto sa São Paulo, Brazil, niadtong Abril 2015. Namulong siya sa Portuguese ngadto sa mga nanambong nga naglakip sa mga Muslim, mga Katoliko, mga Sabadista, mga Hudeo, mga Evangelical, mga Latter-day Saint, mga lumad nga spiritwalista, mga tawo nga walay partikular nga tinuohan, ug uban pa, atol sa usa ka panghitabo sa pagsaulog sa lig-ong pagsuporta sa relihiyusong kagawasan sa nasud. “Hinaut atong ipatuman ang kalinaw,” siya miingon, “pinaagi sa pagtambayayong sa pagpreserbar ug pagpanalipod sa kagawasan sa tanang tawo sa paghupot ug pagpakita og usa ka relihiyon o tinuohan nga ilang gipili, sa indibidwal nga paagi o sa komunidad apil sa uban, sa panimalay o langyaw, sa publiko o pribado, ug diha sa pagsimba, pag-obserbar, sa gipraktis ug sa pagtulun-an.”

“Ang mga tawo sa Hugot nga Pagtuo kinahanglan gayud nga mag-una diha sa pagpanalipod sa relihiyusong kagawasan—usa ka kagawasan diin daghang mahinungdanon nga mga kagawasan nga moabut,” matud ni Elder Quentin L. Cook sa Korum sa Napulog Duha ka mga Apsotoles samtang siya namulong sa Annual Religious Liberty Lecture sa Universidad sa Notre Dame Australia didto sa Sydney, Australia, niadtong Mayo 2015. “Dili lamang kita manalipod sa atong abilidad sa pagpamahayag sa atong relihiyon apan panalipdan usab nato ang katungod sa matag relihiyon sa pagpangalagad sa kaugalingong mga doktrina ug mga balaod niini,” siya miingon.

Si Elder Ronald A. Rasband sa Korum sa Napulog Duha ka mga Apostoles nagserbisyo isip Senior President sa Seventy sa dihang namulong siya ngadto sa mga estudyante sa Brigham Young University sa Provo, Utah, USA niadtong Septyembre 2015.

“Ang uban sa inyong grupo sa kaedad mahibulong nganong ang relihiyusong mga grupo nalambigit sa politiko sa unang bahin, ug sila sa kasagaran madudahon sa mga motibo sa relihiyuso nga mga tawo kon sila mobuhat sa ingon” siya miingon. Ang tiningub nga tingog sa mga grupo kinsa mibati nga ang relihiyon kinahanglan dili modala og katungdanan sa politikanhon nga mga hilisgutan nga nagkakusog na sa bag-ohayng katuigan, nagsaka ang “kakuyaw sa paglalang og laing klase sa biktimahon: mga tawo sa pagtuo, sama ninyo ug nako.”

Si Elder Rasband miingon sa mga estudyante nga ang kalibutan nagkinahanglan og aktibo nga kalambigitan gikan sa ilang henerasyon dinhi niining hilisgutan. “Nagkinahanglan kami sa inyong natural nga pagsabut sa kapuangod, pagtahud, ug kaangayan nga gikan sa inyong henerasyon. Nagkinahanglan kami sa inyong kapositibo ug sa inyong determinasyon sa pagtrabaho pinaagi niining komplikado nga mga sosyal isyu.” Ang tubag, siya miingon, magsugod sa mga sugo sa Manluluwas nga “maghigugmaay kamo ang usa sa usa maingon nga ako nahigugma kaninyo” (Juan 13:34).