Walay Paglubad nga mga Istorya sa Ebanghelyo
Pagsimba nganha sa Templo: Ang Mahinungdanong Paagi sa Pagkaila sa Dios
Gikan sa usa ka pakigpulong niadtong Pebrero 1993 sa Brigham Young University; ang tibuok nga teksto giimprinta sa Temples of the Ancient World, ed. Donald W. Parry (1994).
Sa templo atong makat-unan ang pagpakabuhi sama sa pagpakabuhi ni Kristo dinhi sa kalibutan ug maandam sa pagpakabuhi sama Kaniya ug sa Amahan karon.
Photograph of Tijuana Mexico Temple
Mahinumduman kaayo nako ang mahinamon ug mainiton nga pakigsultihanay ngadto sa temple attender human sa akong pagserbisyo isip temple president sa Salt Lake Temple. Usa ka mahunahunaon kaayo nga batan-ong babaye mibasa sa mahinungdanon kaayo nga mga bersikulo mahitungod sa gamit sa templo isip balay sa pagkat-on ug instruksyon. Igo kaayo ang iyang pagsabut aron mahibalo nga ang pagkaila sa Dios ug kang Kristo, “ang bugtong tinuod nga Dios, ug kang Jesukristo nga imong gipadala,” mao ang “kinabuhing dayon” (Juan 17:3). Nahibalo sab siya nga nagkat-on kita aron makaila sa atong Amahan ug sa katapusan makabalik ngadto Kaniya pinaagi kang Kristo.
Ang akong pagpamatuod ngadto kaniya mao nga, alang kanako, ang tanan diha sa templo nagtumong gayud kang Kristo ug sa atong Amahan. Ang kaepektibo sa mga ordinansa ug mga pakigsaad anaa sa Iyang maulaon nga gugma ug sa gidelegar nga awtoridad—ang awtoridad sa “Balaan nga Pagkapari, sunod sa Kapunongan sa Anak sa Dios” (D&P 107:3). Apan ang batan-ong babaye wala pa makahimo og klaro nga koneksyon sa kaugalingon niyang hunahuna ug kasingkasing kon sa unsang paagi ang pagsimba nganha sa templo mamahimo nga usa ka mahinungdanon kaayo nga yawe sa pagkaila sa Ginoo. …
Kristo, Mga Kasulatan, Templo, Panimalay
Ang templo mao ang pinakaimportante sa tanan sa pagsangkap og dapit nga mahimong lunsay ug mabalaan ang atong mga kaugalingon, diin, kon kita magkat-on mahitungod ni Kristo, makagiya kini kanato ngadto sa personal nga kahibalo mahitungod Kaniya ug makasaksi mahitungod Kaniya nga mogiya ngadto sa pinakabililhong mga gasa sa kinabuhi.
Ang pagkat-on ug pagsimba didto sa templo mahimo nga unibersidad sa mahangturong kinabuhi pinaagi ni Jesukristo. Sa pagpahinungod nga pag-ampo sa Kirtland, kini nga pangaliyupo gihalad ngadto sa Ginoo: “Himoa nga ikaw motugyan, Balaan nga Amahan, nga tanan kadto kinsa mosimba dinhi niini nga balay matudloan unta sa mga pulong sa kaalam … ;
“Ug aron unta sila magtubo diha kanimo, ug modawat sa usa ka kahingpitan sa Espiritu Santo” (D&P 109:14–15).
Matuman ba kini pinaagi sa mga seremonya ug ritwal? Oo, sa ubang bahin, kon kita makasabut sa katuyoan, sa simbolo, gani sa dihang si Adan ug si Eva gipasabut bahin niini sa pinakaunang mga panahon sa mortalidad. Apan sa pinakauna kita makakat-on pinaagi sa pasalig sa mensahe, sa mga baruganan sa mahangturong paglambo, sa kinabuhing dayon. Diha ra nianang pipila ka yanong mga baruganan nga kita mohimo og mga pakigsaad sa Ginoo. Hinumdumi ang pamahayag ni Pablo ngadto sa mga taga-Roma nga kita magpasig-uli [reconcile] ngadto sa Dios pinaagi sa kamatayon ni Kristo, ug luwason “pinaagi sa iyang kinabuhi” (Mga Taga-Roma 5:10). Alang kanako nag-ingon kini nga ang mga baruganan sa Iyang balaan nga kinabuhi naggiya kanato ngadto sa kahingpitan sa kaluwasan sa nailhan nga kahimayaan—paghigugmaay, pagkat-on, pagserbisyo, paglambo, sa mamugnaong kinabuhi sa Diosnon nga matang uban sa mga minahal ug sa Amahan ug sa Anak. Sa templo atong makat-unan ang pagpakabuhi sama sa pagpakabuhi ni Kristo dinhi sa kalibutan ug maandam sa pagpakabuhi sama Kaniya ug sa Amahan.
Mahinungdanong mga Baruganan sa Kinabuhi ni Kristo
Unsa nga mga baruganan ang mahinungdanon sa Iyang kinabuhi nga gitudlo diha sa templo ug may kalabutan sa mga pakigsaad nga atong gihimo uban sa Ginoo? …
Siya nahigugma sa paagi nga tingali Siya ra ug ang Amahan ang nakasabut sa pagkakaron. Apan ania kita dinhi aron makat-on nga, ang pagkat-on sa paghigugma usa ka butang nga igo nga ikahatag. Sa natad sa panggubatan ug sa mga lawak sa ospital ug sa mahilum nga bayanihong mga sirkumstansya sa dili hinakog nga debosyon sa ginikanan o sa anak, gipakita diri kanako nga dunay mga tawo kinsa nakakat-on sa tinuoray nga paghigugma ug pagsakripisyo sama sa Iyang pamaagi.
Rise, and Walk, ni Harry Anderson
Samtang mopili kita ug mosubay sa dalan sa kamanggihatagon, sa kamapinanggaon, sa kamabination ug kamanggiloy-on, atong masabtan nga dili kini usa ka opsyunal nga elemento sa ebanghelyo; mao kini ang pinakamahinungdanon nga bahin niini. Ang kaligdong ug ang dungog, dili hinakog, maayong pamatasan, ug kamaayo og gawi maoy gilauman gikan kanato. Ang gikinahanglan gayud sa tanan, mao nga kon unsa nga matang sa mga tawo kita, kon unsay andam nato nga ihatag. … Kini ang atong hukman sa matag adlaw, matag takna, samtang magkat-on kita ug modawat sa direksyon sa Ginoo.
Human sa Paglansang, Pagkabanhaw, ug Pagkayab sa Manluluwas, dunay nahitabo sa mga nakasugakod nga mga disipulo, nga gipangulohan ni Pedro, kinsa sa panahon sa kaluya mipakyas Kaniya. Ang pentecostes nahitabo—ang pag-abut sa Espiritu—ug kadtong mga nagduha-duha mibarug nga lig-on sa pagpamatuod ug nagpamatuod. Ang mga kapitulo 1 ngadto sa 5 sa basahon sa Mga Buhat misaysay sa istorya. Ang katapusang mga bersikulo sa kapitulo 5 dunay mahinuklugong epekto. Si Gamaliel mipakgang uban sa iyang mga kaubanan aron hatagan ang mga disipulo og lahing higayon, usa ka gamay nga higayon. Mao nga sila gipasidan-an og usab nga hunungon ang pagpanudlo ug pagsangyaw bahin ni Kristo, gipasakitan sa makausa pa, ug gibuhian. Ang rekord nag-ingon nga mibiya sila sa maong dapit nga nagmaya nga nakita silang takus nga mag-antus tungod ug alang kang Kristo. Dayon, “sa tanang adlaw, sa templo ug sa binalaybalay, sila wala mag-undang sa pagpanudlo ug sa pagwali nga si Jesus mao ang Kristo” (Mga Buhat 5:42).
Sa samang paagi dunay mahitabo kanato kon kita mopalayo sa templo sama sa gitudlo sa 3 Nephi 17:3: “Busa, pamauli kamo sa inyong mga panimalay, ug palandunga kini nga mga butang nga Ako miingon, ug pangayoa sa Amahan, pinaagi sa akong ngalan, aron kamo makasabut, ug i-andam ang inyong mga hunahuna alang sa ugma, ug Ako moanha kaninyo pag-usab.”
Ang Makapalimpyo nga Gahum sa Pagsimba nganha sa Templo
Ang makalimpyo nga espiritu makahimo kanato, nga makahibalo sa espesyal nga paagi sa dalan nga gisubay ug gipahayagan sa Ginoo—ug ang paghigugma Kaniya—ang pagkahimong bag-o nga mga tawo, nanagpundok sa paghigugmaay ug panag-igsoonay, nanagsunod sa kabubut-on sa Ginoo, nagserbisyo, nagbinahinay, naghigugmaay, matinuoron sa maayo nga mga sumbanan, giuna sa pagpangita ang gingharian sa Dios.
Gikinahanglan nato nga limpyuhon ang mga kinabuhi sa atong pamilya ug himoon ang atong mga panimalay diin didto atong “itudlo ug isangyaw” si Jesuksristo matag adlaw bisan ang pagsunod Kaniya sa kanunay. Ang atong mga panimalay, atong mga pamilya, atong indibidwal nga kinabuhi kinahanglang mahimo nga sentro sa pagkat-on, sentro sa kawalay hinakog ug sa pagserbisyo. Sa mga pulong ni Rufus Jones, “ang mga Santos wala himoa nga tan-awon kanunay nga daw mga anghel ug sa pagpasiugda og dili makita nga mga inspirasyon. Gihimo sila nga mahimong sentro sa kahayag ug gahum. Ang tinuod nga santos mao ang usa ka maayo nga inahan, maayo nga silingan, tawo nga molihok para sa kalamboan sa katilingban, tawo nga makapahimuot ug makapanalangin. Ang tinuod nga santos usa ka lagsik nga Kristiyano kinsa mopakita og pipila ka piho nga matang sa kinabuhi nga hingpit nga makab-ot unya didto sa langit.”1
Ikonsiderar kon unsay para nako maoy klaro ug mahinungdanong punto aron masabtan ang kahulugan sa mga templo ug pagsimba nganha sa templo. Ang Ginoo mipadayag kang Propeta Joseph Smith niadtong 1836 sa pag-ampo nga gihalad atol sa pagpahinungod sa Kirtland Temple. Ang pag-ampo nahimo nga seksyon 109 sa Doktrina ug mga Pakigsaad. Ang tawo nga sinserong nagtinguha nga makasabut sa nag-unang kahulugan sa templo mahimong mobalik-balik sa pagbasa og tarung niini, ilabi na sa unang makatandog, impluwensyal nga duha ka dosena nga mga bersikulo. Ang bersikulo 5 usa ka matahum nga pamahayag nga angayang hunahunaon pag-ayo: “Kay ikaw nasayud nga kami mihimo niini nga buhat diha sa dako nga kalisdanan; ug gikan sa among kakabus kami mihatag sa among mga kabtangan sa pagtukod og usa ka balay nganha sa imong ngalan, aron ang Anak sa Tawo adunay usa ka dapit sa pagpakita sa iyang kaugalingon ngadto sa iyang mga katawhan” (D&P 109:5; emphasis gidugang).
Sa unsang paagi Siya mopakita sa Iyang kaugalingon ngadto sa Iyang mga katawhan diha sa templo?
Una sa tanan, mituo ako, pinaagi sa katahum ug sa katuohan nga impluwensya sa mga baruganan sa templo, mga ordinansa, ug mga pakigsaad, pinaagi sa pagsimba nganha sa templo—pinaagi sa espiritu sa pagpadayag ug ubang mga panalangin sa Espiritu nga anaa didto alang niadtong mga tawo kansang mga hunahuna ug kasingkasing nahiangay, ug niadtong kinsa mapailubon ug mahinamon nga makakat-on ug magpadayon sa ilang kinabuhi ngadto sama kang Kristo nga mga baruganan (tan-awa sa 3 Nephi 27:21, 27).
Usa ka ehemplo ang tingali igo nga makahulagway sa esprituhanong kalig-on nga moabut niadtong kinsa magmatinguhaon sa pagserbisyo sa Ginoo diha sa mga templo. Miadto ko sa templo usa ka buntag mga alas 4:30 sayo sa buntag, mapasalamaton nga nakalatas ko sa baga nga snow gikan sa among balay aron makaabut didto. Didto sa usa ka hilum nga kwarto, may naglingkud nga mahunahunaon samtang nag-akbo sa iyang sungkod, nakita nako ang gulangon, gidayeg kaayo nga higala. Sama nako, nagsul-ob siya og puti, puti nga isul-ob sa mga temple worker. Gitimbaya nako siya uban sa kamaya ug gipangutana unsay iyang gibuhat didto nianang orasa sa buntag.
Miingon siya, “Kahibalo ka unsay akong gibuhat dinhi, President Hanks. Usa ko ka ordinance worker dinhi nga motuman sa akong assignment.”
“Nahibalo ko niana,” miingon ko, “apan naghunahuna lang ko kon giunsa nimo pag-abut dinhi gikan sa nagbagyo nga snow. Bag-o lang kong nakadungog sa radyo nga ang Parley’s Canyon gisarad-an sa tanang moagi, gani giatangan.”
Miingon siya, “Duna koy four-wheeler nga makakatkat og kahoy.”
Miingon ko, “Ako usab naa, o kon wala, wala unta ko dinhi karon, ug nagpuyo ko pipila lang ka milya gikan dinhi.”
Dayon nangutana ko kon unsay iyang gihimo nga nakalusot man siya sa may canyon nga gibalita nga giatangan. Dili komon ang tubag niining ransero ug stake president nga sa una nakong pagkakita niya kaniadto usa ka himsog, kusgan nga tawo nga mobikang sakay sa iyang kabayo dihang nagkuyog mi usa ka hapon sa wala pa ang mga miting sa komperensya sa stake. Ang artraytis ug pangidaron ang nakapaluya niya karon ug sa dili madugay biyaan niya kining kinabuhia. Sakit na kaayo kaniya ang paglihok-lihok. Ang tubag niya niadtong buntaga mao, “Karon, President Hanks, nakaila ko sa mga opisyal niana nga highway, kadaghanan nila, sukad pa sa ilang pagkatawo. Nahibalo sila nga kinahanglan gyud ko nga moagi ug kon gikinahanglan dili ko magsubay og karsada! Nahibalo sab sila sa akong trak ug akong kasinatian, ug iwaling lang nila ang mga atang kon gikinahanglan nila.”
Didto siya, matinud-anon ug maunungon sa oras sa buntag, sa pagsugod sa iyang sagrado nga buhat. Ang ingon niana nga mga tawo nga may ingon niana nga pagpamatuod ug debosyon gitabangan sa mga templo nga molambo.