Mga Profile sa Young Adult
Pagpabilin nga Lig-on didto sa France
Isip miyembro sa Simbahan sa French Army, si Pierre misalig sa pag-ampo ug pagtuon sa kasulatan nga mamahimong ehemplo sa iyang tinuohan.
Ang bansayon nga mahimong piloto sa helicopter usa ka oportunidad nga dili makuha sa kadaghanan. Apan dihang si Pierre O., 24, nakahukom nga magpasakop sa French Army, iya kana nga nakuha. Karon sa iyang ikaduhang tuig sa upat ka tuig nga pagbansay, gipaningkamutan ni Pierre nga magpakabuhi nga ehemplo sa mga tumutuo, bisan sa iyang palibut.
Ang iyang station biyahion og mga usa ka oras og tunga gikan sa Bordeaux, sa southwestern France, si Pierre layo sa iyang mga higala, pamilya, ug sa iyang gipuy-an sa Rennes. Ang pinakaduol nga meetinghouse usa ka oras ang gilay-on, nagpasabut nga dili kaayo niya ikauban ang mga miyembro atol sa semana. “Dili sayon nga miyembro ka Simbahan nga naa ka sa army,” miingon si Pierre, “tungod kay dunay daghang tintasyon ug duha kini ka magkalahi gayud kaayo nga kalibutan. Hukman ka kanunay diha sa army dili tungod sa imong gihimo kondili kon si kinsa ka.” Gusto ni Pierre nga makita sa uban nga dili siya moinom og makahubog, dili manabako, dili motan-aw og pornograpiya, og mag-party—komon nga kalihokan sa army—tungod sa iyang pagka-siya: nga miyembro sa Simbahan. Samtang naglisud siya nga makuha ang pagtahud sa iyang mga kaubanan, ang pag-ampo ug pagtuon sa kasulatan nagtabang nga magpadayong lig-on ang iyang pagpamatuod. “Gipaningkamutan nako nga dili matulog nga dili pa makabasa sa akong mga kasulatan,” pasabut niya, “ug gipaningkamutan nako nga mag-ampo kutob sa akong mahimo.”
“Ang pagbasa sa mga kasulatan ug pag-ampo nakatabang og dako sa akong pag-eskwela aron mahibalo nga adunay Dios, ug Siya anaa—nga wala magkinahanglan og dako kaayong panabut sa uban pa sa ebanghelyo,” pasabut ni Pierre. “Nahibalo lang ko nga anaa ang Dios, mao nga nakatabang kini nga magpabilin ko sa eksakto nga dalan.”
Kana nga pundasyon sa pagtuon sa kasulatan nakatabang ni Pierre sa tibuok niyang pag-eskwela ug bisan karon sa iyang pagbansay sa army. Sa wala pa makaapil, nakaserbisyo si Pierre og misyon sa Montreal, Quebec, Canada, diin ang iyang pagpamatuod ug panabut sa ebanghelyo mas nalig-on.
“Ang mga kasulatan mao ang usa ka klaro kaayong paagi sa Langitnong Amahan sa pagtubag kanato,” miingon siya.
Pinaagi sa inadlaw niyang pag-ampo ug pagtuon sa kasulatan, wala lamang si Pierre makadawat og inspirasyon apan nahimo usab siyang ehemplo didto sa unit sa iyang pagka-army. Samtang siya ug ang iyang mga classmate walay daghang pagkaparehas gawas sa ilang garbo sa nasud, nasayud si Pierre nga pinaagi sa pagsunod sa mga pagtulun-an sa mga kasulatan, usa siya nga ilang matahud tungod niana ug dili tungod sa iyang mga gituohan.