Pagsabut sa Kabatan-onan nga Inyong Gitudloan

Ang Pagpaningkamot aron makat-on mahitungod sa kabatan-onan nga inyong gitudloan mao ang pamaagi ngadto sa ilang pagkakabig.

Daghang mga batan-on nga adunay kadasig ug kalagsik nga makahimo sa pagtudlo ug pagmatuto kanila nga makapahimuot. Apan ang uban mahimong mag-atubang usab og mga hagit samtang sila molambo ug mohingkod—ang tanang butang naggikan sa pag-adjust sa mga kausaban sa ilang mga lawas, ngadto sa kakapoy sa eskwelahan, ngadto sa pagpamugos sa kultura nga mag-awhag kanila nga dili mosunod sa ebanghelyo. Ang mga kabatan-onan nagkinahanglan og mga magtutudlo nga makasabut nila ug moatiman kanila. Nagkinahanglan sila og mga tigmatuto kinsa mag-awhag og luwas nga palibut alang kanila aron makat-on ug mobuhat sa unsay ilang makat-unan.

Ania ang pipila ka mga butang nga mahimong makatabang aron makahibalo mahitungod sa kabatan-onan samtang kamo magplano, mag-andam, ug magtudlo kanila diha sa pamaagi sa Manluluwas:

1. Ang mga kabatan-onan gusto ug nagkinahanglan nga makat-on sa doktrina. Sa kalibutan nga nagkalayo na gikan sa mga sumbanan sa ebanghelyo, ang kabatan-onan gutom sa mahangturon nga kamatuoran. Gusto nilang matudloan “sa mga butang ingon nga sila gayud mao, ug sa mga butang ingon nga sila gayud mahimo unya” (Jacob 4:13). Kini nga mga butang makaplagan diha sa doktrina sa ebanghelyo. Samtang kamo magtudlo, tutoki ang doktrina nga makita diha sa mga kasulatan, sa mga pagtulun-an sa buhi nga mga propeta ug mga apostoles, ug sa uban nga opisyal nga mga materyal sa Simbahan. Awhaga ang mga kabatan-onan sa pagtuon niining mga kapanguhaan diha sa ilang kaugalingon. Ang doktrina adunay gamhanang epekto (tan-awa sa Alma 31:5).

2. Ang mga kabatan-onan nag-establisar sa ilang pagkatawo. Naningkamot pa sila sa pagkaplag kon kinsa sila ug unsa ang ilang gusto nga sila mamahimo. Samtang sila nangandam alang sa mga katungdanan sa umaabut, mahimong maghunahuna sila kon unsa ang plano sa Ginoo alang kanila ug kon makahimo ba kaha sila sa tanan nga gilauman diha kanila. Isip ginikanan o magtutudlo, makapadasig ka sa kamasaligon mahitungod sa kaugmaon ug makahatag og giya sa pagpangandam alang niini. Tabangi sila nga mas mapaduol ngadto sa Dios ug mapalambo ang ilang kinabuhi diha sa mga sumbanan sa ebanghelyo. Tudloi sila sa importansya sa templo ug sa ilang mga katungdanan sa pagtukod sa gingharian sa Dios.

3. Ang mga kabatan-onan nasayud kon kamo nagpakabana. Alang sa mga kabatan-onan nga tinuoray nga moapil diha sa pagkat-on sa ebanghelyo, kinahanglan sila nga masayud nga kamo nahigugma kanila ug interasado diha kanila isip mga indibidwal. Paminawa sila. Pangitaa ang positibo nga kinaiya diha kanila ug palamboa kana. Ipadayag ang inyong pasalig diha kanila ug paghatag og kasigurohan nga sila bililhon ug gikinahanglan.

4. Ang mga kabatan-onan adunay daghang interes. Ang matag batan-on lahi nga indibidwal. Ila-ilaha ang ilang mga kaikag, panginahanglan, ug mga hagit. Kini mahimong nagkinahanglan og pagtabang nila pa sa regular nga eskedyul sa mga miting, klase, ug mga kalihokan. Pinaagi sa pag-ilaila nila, makabaton kamo og pagsabut ug pagdasig pinaagi sa Espiritu mahitungod sa ilang mga panginahanglan nga makaimpluwensya kon kamo magtudlo nila. Samtang ang kabatan-onan mobati sa inyong tinuod nga kaikag sa ilang mga kinabuhi, ang ilang mga kasingkasing mas bukas ngadto sa inyong mga pagtudlo ug pagpamatuod.

5. Ang kabatan-onan makakaplag og mga tubag sa ilang mga pangutana. Ang mga tigkat-on sa tanang edad malingaw sa pagdiskobre sa mga pagtulun-an sa ebanghelyo, apan kini importante ilabi na alang sa mga tin-edyer samtang sila nagpalambo sa ilang mga mithi ug tinuohan. Ang mga leksyon sa ebanghelyo adunay malungtaron nga epekto kon kini personal nga nakat-unan—ug nasunod. Imbis maghatag og tubag sa mga kabatan-onan, mahimo kamong mogamit og mga pamaagi sa pagtudlo nga magdapit ug magdasig kanila aron mangita sa ilang kaugalingong mga tubag. Kini mosangput ngadto sa mas lawom nga pagkakabig—ang labing importanting tumong sa tanang instruksyon sa ebanghelyo.

6. Ang kabatan-onan makatudlo sa usag-usa. Interesado ang mga kabatan-onan sa paghatag og ikatampo sa unsay gitudlo ug malipay nga mopakigbahin unsay ilang nahibaloan. Pinaagi sa inyong ehemplo ug instruksyon, makatabang kamo nila sa pagtudlo diha sa pamaagi sa Manluluwas. Uban sa inyong paggiya tingali magsugod sila sa pagtudlo og usa ka porsyon sa leksyon o mopasiugda og mubo nga hilisgutan. Samtang nagbaton sila og kasinatian ug pagsalig, mahimong makaangkon sila og panagsa nga mga oportunidad sa pagtudlo sa entiro nga leksyon. Kon ang kabatan-onan magkat-on sa usag usa, makatabang sila sa pagpalig-on sa usag usa batok sa mga pagpamugos niadtong wala mopakigbahin sa ilang mga mithi.

7. Ang kabatan-onan nagtuon sa pagkalider. Ang mga kapangulohan sa klase ug sa korum adunay sagrado nga mga calling nga mangulo sa ilang mga kaedad. Apan bisan kon aduna pa silay kasinatian sa pagkalider, magkinahanglan sila og mga giya gikan ninyo kon unsaon sa pagpahigayon sa mga miting, pagtabang sa uban nga makat-on ug pagpangalagad. Ang ubang mga oportunidad sa pagkalider mahimong mahitabo diha sa panimalay samtang ang mga kabatan-onan nahatagan og makahuluganon nga mga responsibilidad.

8. Ang kabatan-onan nagkat-on gikan sa mga ehemplo sa mga ginikanan ug sa ubang hingkod. Usa ka importanting bahin sa inyong responsibilidad isip usa ka magtutudlo mao ang pagtabang sa pagpalig-on sa relasyon tali sa kabatan-onan, sa ilang mga lider, ug sa ilang mga ginikanan. Makatabang kamo sa kabatan-onan nga makakaplag sa mga tubag sa daghan nilang mga pangutana, apan uban sa ilang mga pangutana mas maayong matubag sa ilang mga ginikanan o mga lider. Idirekta ang mga batan-on ngadto sa ilang mga ginikanan ug awhaga sila sa pagpalig-on sa relasyon sa pamilya. Regular nga makig-istorya sa mga ginikanan mahitungod sa unsay inyong natun-an sa klase ug ipakigbahin ang mga talento, paglambo, ug positibo nga mga kontribusyon nga inyong naobserbaran sa ilang anak nga mga lalaki ug babaye. Pangutan-a unsay inyong mahimo aron makatabang nila samtang sila magtudlo sa ilang mga anak.

Ang pagtabang sa kabatan-onan aron makabig nagkinahanglan og pagtinabangay sa mga paningkamot sa mga ginikanan, mga lider, mga tigtambag, ug mga magtutudlo lakip ang mga matutudlo sa seminary. Mag-uban kamo sa pagmugna og mas gamhanang kasinatian sa pagkat-on alang sa kabatan-onan kay sa imong mahimo nga buhaton nga mag-inusara.