Salamat nga Imo Akong Gipaila-ila ngadto sa sa Ebanghelyo

Scott Edgar, Utah, USA

Paghulagway pinaagi ni Stan Fellows

Sa sayong bahin niadtong 1980, ang akong pamilya nagpuyo sa West Germany, ug miyembro kami sa Kaiserslautern Germany Servicemen Stake. Nianang higayona, ang among lokal nga mga lider mipasabut sa misyonaryo nga buhat. Giingnan mi nga sulod sa among pundok sa among mga higala, ang Ginoo mibutang sa pipila sa Iyang pinili nga espiritu nga mga anak kinsa nangita sa ebanghelyo ni Jesukristo.

Ang akong asawa, nga si Jenny, ug ako nagtuo nga kana tinuod. Ang among mga lider nag-awhag namo sa pag-ila og dili miyembro nga mga higala nga sa among hunahuna interesado nga maminaw sa ebanghelyo. Maghimo mi og lista sa 10 ka mga tawo ug dayon magpuasa ug mag-ampo bahin sa among lista sa mga higala ug mohukom kinsa ang unang duolon. Nakahukom mi nga kontakon ang duha ka lalaki kinsa kauban nako sa opisina. Una kong nakig-istorya sa usa ka batan-ong ulitawo nga ginganlan og Chris, apan dili kaayo siya interesado nianang higayuna. Sunod, nakahukom mi nga duolon nako si Bruce Hamby, usa ka buotan ug mabination nga tawo nga dunay bag-ong pamilya.

Hinoon, paglabay sa pipila ka adlaw ug akong nakaplagan ang akong kaugalingon nga gikulbaan sa pagpakigsulti kaniya mahitungod sa ebanghelyo. Sa katapusan, usa ka adlaw si Jenny nanawag nako sa opisina ug nangutana, “Naistorya na ba nimo si Bruce?” Miingon ko, “Wala, apan makig-istorya ko sa dili madugay.” Dayon nangutana siya kon naa ba sa opisina si Bruce nianang adlawa, ug miingon ko nga naa siya. Nianang puntoha miingon siya, “Scott, ibutang ang telepono. Maghulat ko samtang makigsulti ka kaniya!”

Gibutang nako ang telepono ug gikulbaan nga miadto ni Bruce ug nangutana, “Bruce, nasayud ka ba nga ako miyembro sa Ang Simbahan ni Jesukristo sa mga Santos sa Ulahing mga Adlaw?” Miingon siya oo; ug miingon ko, “Interesado ka bang makat-on pa og dugang mahitungod sa Simbahan?” Mitubag siya, “Oo, gusto ko.”

Sa misunod nga mga semana, si Bruce, ang iyang asawa, nga si Ella, ug ang ilang anak nga babaye, nga si Tanya, miadto sa among balay alang sa panihapon ug nakighimamat sa mga misyonaryo. Gitudloan sila sa mga leksyon, mitambong sa simbahan uban namo, midawat sa ebanghelyo, ug nabunyagan. Talagsaon ug malipayon kadto nga adlaw. Si Bruce mapasalamaton nga among gipaila sa iyang pamilya ang ebanghelyo. Bisan si Chris, ang batan-ong lalaki sa among opisina mitambong sa bunyag ug nadasig. Sa wala madugay, si Bruce ug Ella miduol ni Chris mahitungod sa ebanghelyo. Uban sa ilang pakigdait, si Chris gitudloan sa mga misyonaryo ug nagpamiyembro usab sa Simbahan.