Mangandam—ug Mobuhat

Elder Hugo E. Martinez

Sa Seventy

Ang pag-andam sa imong kaugalingon ug pagbuhat sa buluhaton sa Ginoo makausab sa imong kinabuhi.

Seminary teacher ko kaniadto sulod sa unom ka tuig. Magklase mi alas 6:00 kada buntag sa akong balay sa Puerto Rico. Dako nga trabahoon ang pag-andam og mga leksyon matag adlaw, Lunes hangtud sa Biyernes. Apan nalingaw ko niini, ug kini nakatabang nga akong mapalambo ang mas dako nga gugma para sa mga batan-on sa Simbahan.

Akong nabantayan nga kadaghanan sa nakat-unan sa mga estudyante sa seminary mag-agad sa ilang pagpangandam. Mao nga kon gusto kang makakat-on og daghan sa mga leksyon sa seminary, modapit ko nimo nga tun-an daan ang mga leksyon ug hinuktukan gayud. Moadto sa klase uban sa kauhaw sa kahibalo. Moadto sama sa usa ka gamayng bata, kanunayng gusto nga magkat-on. Mangandam aron makaapil aron magkatinudloay sa usag usa. Ug moadto nga may dala nga mga pangutana. Laing batan-on, usa ka kasulatan nga gibasa, o tingali usa ka komentaryo nga gihimo sa magtutudlo tingali maoy tubag sa imong mga pangutana.

Ang pinakamaayong instruksyon atol sa bisan unsang klase o miting sa Simbahan moabut kon ikaw nakaandam ug ikaw nakadawat og espirituhanong mga pag-aghat nga miabut isip mga hunahuna. Isulat kini, ug dayon buhata kini. Pangita og dugang pang mga kasulatan o mga pakigpulong sa kinatibuk-ang komperensya o mga artikulo gikan sa mga magasin sa Simbahan mahitungod niini nga mga ideya. Hinuktuki kini diha sa imong hunahuna ug kasingkasing ug pangandam sa pagserbisyo, kay sa higayon nga maanaa nimo kini nga mga kamatuoran sa sulod kanimo, gamiton ka sa Ginoo sa pagtabang sa uban.

Wala madugay, dihang nagserbisyo ko isip mission president uban sa akong asawa, akong naamguhan nga ang seminary usa ka talagsaong pagpangandam alang sa misyonaryo nga pagserbisyo. Sulod sa mga katuigan akong nakita ang katingalahang gahum sa ebanghelyo nga mipanalangin niadtong mga matinud-anong estudyante sa seminary. Ilang gigamit unsay ilang nakat-unan diha niana nga mga leksyon para sa daghang mga hagit sa ilang kinabuhi ug nalatasan ang mga hagit, gani mibalik sa Simbahan human sa panahon sa pagkadili kaayo aktibo.

Ikaw importante kaayo alang sa Ginoo. Tinuod kana. Ang buluhaton sa mga batan-on mao ang pagpangandam alang sa misyonaryo nga buhat ug dayon mohimo sa misyonaryo nga buhat. Karon, kinahanglan nga makasabut kamo nga kon padayon kamong mohimo sa misyonaryo nga buhat, ug kon padayon kamong mag-andam, kini modala ug mogiya kaninyo sa dugang nga kalamboan isip misyonaryo sa Ginoo. Wala nimo kinahanglana ang missionary name tag sa paghimo sa misyonaryo nga buhat, tungod kay gidala na nimo ang ngalan ni Jesukristo nga nakasulat diha sa imong kasingkasing tungod sa imong mga pakigsaad.

Mao usab sa buhat sa family history ug buhat sa templo. Sama pananglit, sa Caribbean Area, diin ko nagserbisyo, ang mga stake nga migamit og mga batan-on isip mga family history consultant dunay mas taas nga porsyento sa mga miyembro nga nangita og mga ngalan alang sa buhat sa templo ug paghimo sa buhat sa templo. Sa usa ka stake adunay 20 ka mga batan-on ang gitawag nga mga family history consultant nga moserbisyo og usa ka tuig sa dili pa mosakto ang ilang edad sa pagmisyon. Sa ilang pagbisita sa mga miyembro ngadto sa ilang mga panimalay aron ipakita unsaon sa paghimo ang family history, makig-istorya sila og mga tawo nga ilang maagian ug sultihan sila mahitungod sa family history ug sa templo. Mao kana ang misyonaryo nga buhat!

Manghinaot ko nga inig-serbisyo na nila og misyon, mibati na silang daan sa Espiritu sa impluwensyal nga paagi—unta diha sa ilang mga panimalay, apan kon dili man diha, nan labing siguro samtang sila mohimo sa misyonaryo, family history, ug buhat sa templo. Dayon, kon mosulod na sila sa missionary training center, manghinaot ko nga walay usa nila ang moingon nako nga, “Gibati nako ang Espritu nga mas kusog dinhi kay sa kaniadto sa akong kinabuhi.” Kinahanglan nga mabati na nila ang Iyang impluwensya nga mas kusog bisan sa wala pa kana.

Gihigugma ka sa Ginoo. Ang Iyang panan-awon nagtumong alang sa family history, templo, ug sa misyonaryo nga buhat nga mahitabo pinaagi kanimo. Aduna ka niana nga mga kahanas ug kahibalo. Kon mas maayo ang imong pagpangandam, mahimo nimo kini nga buhat. Mopanalangin kini ug makausab sa imong kinabuhi.