Ngaahi Lēsoni mei he Fineʻeikí
Fai ʻe ʻEletā Jairo Mazzagardi
ʻO e Kau Fitungofulú
ʻI heʻeku tupu haké, ko e taimi kotoa pē ne mau maʻu ai ha paʻanga ʻe ʻave maʻu pē ʻe heʻeku faʻeé ʻa e lauʻi paʻanga fakaʻofoʻofa tahá—ʻa ia ne ʻikai fuʻu manusinusi pe ʻulí—peá ne foaki ia ki he faifekau ʻo e siasi ne mau kau ki aí. Naʻá ne fai pehē ʻi he kotoa ʻo ʻene moʻuí. Naʻá ne pehē, “Ko e meʻa ʻeni ʻa e ʻOtuá.” Talu mei ai mo ʻeku kumuni e ngaahi lea ko iá. ʻI he taimi naʻá ku papitaiso ai ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi heʻeku fuʻu lahí, naʻe ʻikai ke faingataʻa kiate au ke u totongi vahehongofulu koeʻuhí ne ʻosi akoʻi au ʻe heʻeku faʻeé ke u talangofua ki he fono ko iá.
Naʻe akoʻi foki au ʻe heʻeku faʻeé ke u faitotonu, ʻo tatau ai pē kapau ko ha meʻa ʻoku faingataʻa ke fakahoko. Naʻe tō ʻe homau kaungāʻapí ha faʻahinga fuaʻiʻakaú mo e vesitapolo kehekehe. ʻI he taimi ʻe niʻihi ʻoku faʻa tupu mai ʻene fuaʻiʻakaú ia ʻaʻana ʻi homau tafaʻaki ʻaá. Naʻe ʻi ai ha taimi ne u toli ai ha niʻihi ʻo e fuaʻiʻakaú ko ʻení ʻo ʻave ki heʻeku faʻeé. Naʻá ne sio mai kiate au peá ne pehē, “ʻOku ʻikai ko ha meʻa ia ʻatautolu.” Ne ʻikai ke u faʻa tui ki ai! Ne u pehē atu, “Ko e hā hoʻo ʻuhingá? ʻOku ʻi he tafaʻaki ʻā ia ʻotautolú!” Naʻá ne toe sio mai peá ne pehē, “ʻOku ʻikai ko ha meʻa ia ʻatautolu.” Naʻá ne puke leva hoku nimá, peá ma lue atu ki he fale homau kaungāʻapí. Naʻá ma kole fakamolemole ange ʻi hono toli ʻene fuaʻiʻakaú. Naʻe talamai ʻe heʻeku faʻeé kapau te mau fie maʻu ha meʻa, ʻoku fie maʻu ke mau maʻu ia ʻi he faitotonu.
Mahalo pē ʻoku ʻikai kau hoʻo ongomātuʻá ki he Siasí, pe ʻikai ke mou faʻa fakakaukau tatau. Te ke kei lava pē ʻo ako ha ngaahi tefitoʻi moʻoni moʻoni meiate kinaua, ʻo hangē ko e faitotonú, fua fatongiá, moʻui fakafalala pē kiate kitá, mo e ngāue mālohí. ʻE hoko e ngaahi tefitoʻi moʻoni ko iá ko ha tāpuaki maʻongoʻonga ʻi hoʻo moʻuí.