Leʻo ʻo e Kau Māʻoniʻoni ʻi he Ngaahi ʻAho Kimui Ní
Tautapa ki ha ʻAloʻofa
Tā fakatātaaʻi ʻe Stan Fellows
ʻI haʻaku ʻaʻahi ki ha kolo ofi mai ʻi ʻEsitōnia, naʻá ku mamata ki ha tangata kolekole. Naʻe fakaʻohovale, he naʻá ku ʻiloʻi ia mei he taimi naʻá ku ngāue fakafaifekau ai ʻi he kolo ko iá ʻi ha taʻu ʻe 10 kimuʻá. Naʻá ne toʻotoʻo ha fuʻu milemila hina pelesitiki, ʻo hangē pē ko ia naʻá ne faʻa fai kimuʻá, ke tānaki ke fua ke maʻu ai ha paʻanga. Naʻá ku manatuʻi naʻá ne faʻa kole maʻu pē pe ʻoku ʻi ai ha kiʻi toenga silini, pea kapau te te ʻoange kiate ia te ne toe fehuʻi mai pe ʻoku toe ʻi ai ha toenga.
Naʻá ku ʻohovale ke sio kiate ia. Pea ʻi he hili ha taʻu ʻe 10 ʻokú ne kei ʻi he tuʻunga tatau pē––naʻá ne kiʻi ʻulu hinā ange, ka naʻe hangē kuó ne kei ʻi he moʻui tatau pē ʻo kolekole he ʻaho kotoa pē. Naʻá ku fakakaukau ki he taʻu fakalata ʻe 10 kuó u moʻui ai ʻi he taimi tatau ko ʻení, ʻa ia naʻe kau ai ʻeku mali ʻi he temipalé, ʻalu ʻo ako, maʻu ha ngāue lelei, mo fiefia ʻi he moʻui leleí.
Ne u pehē pē mahalo ko ʻeku sio fakaʻosi pē ʻeni kiate ia, pea naʻá ku ongoʻi ʻoku totonu ke u foaki ange ha meʻa kiate ia. Ko e melé pē, ne u maʻu pē ha laʻi paʻanga pepa ne lahi ange ʻi he meʻa ne u fakaʻamu ke u foaki angé. Naʻá ku loto mamahi ʻi he fili ke u faí––ko e ʻikai ke u ʻoange ha meʻa pe ko hono ʻoange ʻo hulu ange ʻi he meʻa ne u fie foakí. Naʻá ku fakakaukau he ʻikai ha fuʻu faikehekehe ia kiate au ka te ne fiefia, ko ia ne u foaki ange kiate ia ʻa e paʻangá.
Ne ʻikai aʻu ʻo ʻaho ʻe ua mei ai ne u moʻua ʻi ha tūkunga tatau, ka ʻi he taimi ko ʻení ko au ia ne u tautapa ki ha ʻaloʻofá. Ne u fetoʻoaki e ʻaho ne ʻosi ki ai ha tohi sikolasipi mahuʻinga. Ne u pehē ne u fakahū ia ʻi ha uike ʻe ua kimuʻa, ka naʻá ku manavasiʻi ʻi heʻeku toe vakaiʻi tuʻo ua e ʻahó peá u ʻilo ai ne tōmui ʻeku fakahū atu iá ʻaki ha ʻaho ʻe taha.
Ko e mahuʻinga fakakātoa ʻo e sikolasipí naʻe liunga teau ia ʻi he lahi ʻo e paʻanga ne u foaki ki he tokotaha kolekolé, pea naʻe ʻikai puli ʻiate au ʻa e mahuʻinga ʻo e meʻá ni. Naʻá ku tautapa ki ha ʻaloʻofa, ʻi he lotu ki heʻeku Tamai Hēvaní pea ʻi he fetuʻutaki ʻīmeili ki he kau ʻōfisa ngāue ʻi he ʻunivēsití fakatouʻosi. Naʻa nau talamai te nau fakakau ʻa e tohi kolé kae fakaʻilongaʻi ai naʻe tōmui.
Naʻe tali ʻeku lotú pea ne faitāpuekina au ke u maʻu ʻa e sikolasipí, ʻa ia naʻá ne tokoniʻi fakapaʻanga lahi au mo hoku uaifí. Kae mahuʻinga angé, naʻe akoʻi mai ʻe he aʻusia ko ʻení ha lēsoni mahuʻinga fau: ʻikai ko e kau kolekole kotoa kitautolu ʻi he ʻao ʻo e ʻOtuá? (vakai, Mōsaia 4:19).