Pōpoaki ʻa e Faiako ʻAʻahí
Ko e Fāmilí Ko e Tuʻutuʻuni Ia ʻa e ʻOtuá
Ako ʻi he faʻa lotu ʻa e fakamatala ko ʻení pea fekumi ki ha ueʻi fakalaumālie ke ʻiloʻi ʻa e meʻa ke vahevahé. ʻE fakatupulaki fēfē ʻe hono maʻu ha mahino ki he “Ko e Fāmilí: Ko ha Fanongonongo ki Māmaní” ʻa hoʻo tui ki he ʻOtuá mo faitāpuekina ʻa kinautolu ʻokú ke tokangaʻi ʻo fakafou ʻi he faiako ʻaʻahí? Ke maʻu ha fakamatala lahi ange, ʻalu ki he reliefsociety.lds.org.
Tuí, Fāmilí, Fakafiemālié
Faitā ʻi muʻa ʻi he Temipale Puenosi ʻAealisi ʻĀsenitiná
Naʻe pehē ʻe Kalo M. Sitīveni ko e Tokoni ʻUluaki ʻi he kau Palesitenisī Lahi ʻo e Fineʻofá, “ʻOku hanga ʻe he fakalea ʻo e [hiva ʻa e Palaimelí], ‘ʻOku ʻa e ʻOtuá ʻa e Fāmilí,’ … ʻo fakamanatu mai ʻa e tokāteline haohaoá.” “ʻOku ʻikai ngata pē heʻetau ako ai ʻoku ʻa e ʻOtuá ʻa e fāmilí, ka ʻoku tau kau atu foki ki he fāmili ʻo e ʻOtuá. …
“… Ko e palani ʻa e Tamaí maʻa ʻEne fānaú, ko ha palani ia ʻo e ʻofa. Ko ha palani ia ke fakatahaʻi ʻEne fānaú—ʻa Hono fāmilí—mo Ia.”1
Naʻe pehē ʻe ʻEletā L. Tomu Peuli (1922–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOku tau toe tui foki ʻoku ʻikai ke ngata pē he hoko ʻa e fāmili mālohi tukufakaholó ko e tefitoʻi ʻiuniti ia ʻo ha sosaieti ʻoku maʻumaʻuluta, malu fakaʻekonōmika mo ha taufatungamotuʻa mahuʻinga ʻoku pau—ka ʻoku nau toe hoko ko e tefitoʻi ʻiuniti ia ʻo e nofo taʻengatá pea mo e fonua mo e puleʻanga ʻo e ʻOtuá.
“ʻOku tau tui ko e faʻunga mo e puleʻanga ʻo e langí ʻe langa ia ʻi he nofo fakafāmilí mo e nofo ʻa kāingá.”2
Naʻe pehē ʻe Poni L. ʻOsikāsoni, Palesiteni Lahi ʻo e Finemuí, “ʻE lava ʻe he tokotaha kotoa pē neongo pe ko e hā hono tūkunga nofomalí pe tokolahi ʻo e fānaú, ke nau taukapoʻi e palani ʻa e ʻEikí ʻoku fakamatalaʻi ʻi he fanongonongo ki he fāmilí.” “Kapau ko e palani ʻeni ʻa e ʻEikí, ʻoku totonu ke hoko ia ko ʻetau palani!”3
Ngaahi Potufolofola Kehe
Tokāteline ʻo e Fāmilí
Naʻe akonaki ʻa Sisitā Suli B. Peki, Palesiteni Lahi mālōlō ʻo e Fineʻofá, ʻoku fakatefito ʻa e teolosia ʻo e fāmilí ʻi he Fakatupú, Hingá, mo e Fakalelei ʻa Sīsū Kalaisí:
“Naʻe ʻomi ʻe hono Fakatupu ʻo e māmaní ha feituʻu ke nofo ai e ngaahi fāmilí. Naʻe fakatupu ʻe he ʻOtuá ʻa e tangatá mo e fefiné ʻa ia ko e ongo konga mahuʻinga ia ʻo ha fāmilí. Ko e konga ʻo e palani ʻa e Tamai Hēvaní ke silaʻi ʻa ʻĀtama mo ʻIvi peá na faʻu ha fāmili taʻengata.
“… ʻI he Hingá naʻe lava ai ke na maʻu ha ngaahi foha mo ha ngaahi ʻofefine.
“ʻI he Fakalelei [ʻa Kalaisí], ʻoku malava ai ke silaʻi fakataha e fāmilí ke taʻengata. ʻOku lava ai ke maʻu ʻe he ngaahi fāmilí ʻa e tupulaki mo e haohaoa taʻengatá. Naʻe faʻufaʻu e palani ʻo e fiefiá, ʻa ia ʻoku toe ui ko e palani ʻo e fakamoʻuí, maʻá e ngaahi fāmilí. …
“… Ko e tokāteline ʻeni ʻa Kalaisí. … ʻOku ʻikai ke ʻi ai ha palani kapau ʻoku ʻikai ha fāmili; ʻoku ʻikai ha ʻuhinga ke ʻi ai ha moʻui fakamatelie.”4