Leʻo ʻo e Kau Māʻoniʻoni ʻi he Ngaahi ʻAho Kimui Ní
Naʻe Tokoni ʻa e ʻEikitau ko Molonaí Ke u Faiako ʻi he Ako Lotolotó
Tā fakatātā ʻa Allen Garns
Naʻá ku ʻi he vaeuaʻanga ʻo ha taʻu faingataʻa ʻi hono akoʻi ʻo e kau taʻu 13 ki he taʻu 14. Naʻá ku toki foki mai pē mei he fakataha fakatupuʻita mo e tokoni puleakó ki hono toki vakaiʻi ʻeku faiakó. ʻI heʻeku hoko ko ha faiako foʻou mo fie maʻu ke faʻu e meimei kotoa ʻeku ngaahi lēsoní, naʻá ku fakatokangaʻi naʻá ku faingataʻaʻia he ʻai ʻa e fānau akó ke nau fai e ngāue totonú mo tokangá. Ko hono moʻoní, ko e fakaiku ʻo e talanoá ne u fakamālohiʻi ʻeku fānau akó ke nau fai ha fili—fai ʻa e ngāué pe tauteaʻi—pea ke u fai ki heʻeku ngaahi fakatokangá.
Naʻá ku mavahe mei he fepōtalanoaʻakí ni kuó u ongoʻi loto mamahi mo mafasia. Naʻá ku ʻai ʻa e fepōtalanoaʻaki ko ʻení ke hoko ia ko ha fehuʻi ʻo e ʻahó ʻi heʻeku ako folofola he ʻaho hono hokó. Naʻá ku maʻu ʻa e talí ʻi heʻeku lau e Tohi ʻa Molomoná.
Naʻá ku lotu ke ʻilo ʻi he folofolá he pongipongi ko iá ʻa e founga ke u hoko ai ko ha faiako lelei angé. Naʻe akoʻi au ʻe he Laumālie Māʻoniʻoní ʻi heʻeku laukonga fekauʻaki mo e ʻEikitau ko Molonaí ʻi he ʻAlamā 44. ʻI he konga ko ʻeni ʻo e talanoá, naʻe kapa ʻe he ʻEikitau ko Molonaí mo e kau Nīfaí ʻa e kakai Leimaná ʻi he vaitafe Saitoné pea fakailifiaʻi kinautolu ʻo ʻai ʻa e kau Leimaná ke laku ʻenau ngaahi meʻataú. Naʻe hoko atu ʻeku laukongá, mo fakakaukau ki heʻeku fie hangē ko e ʻEikitau ko Molonaí ʻi he lokiakó: ʻo fai tuʻutuʻuni, loto falala, mo lavameʻa.
Naʻá ku lau kotoa ʻa e talanoá mo fakatokangaʻi hono talaange ʻe Molonai kia Seilahemena mo e kakai Leimaná naʻe pau ke nau fai ha fili: “Mou ʻomi hoʻomou ngaahi mahafutau kotoa pē kiate kimautolu, pea … te mau fakamoʻui ʻa kimoutolu, kapau te mou ʻalu ʻo ʻikai toe haʻu ke tauʻi ʻa kimautolu” pea “kapau ʻe ʻikai te mou fai ʻeni, … teu fekau ki heʻeku kau tangatá ke nau ʻoho atu kiate kimoutolu” (ʻAlamā 44:6, 7). Naʻá ku fakatokangaʻi naʻá ne fakahoko ʻa e meʻa naʻe talamai ʻe hoku pulé ke u faí! Naʻá ne pehē, “ʻOange ha fili ʻe ua, pea muimuʻi pau.” ʻI heʻeku fakakaukau ki aí, naʻá ku fakaʻaongaʻi leva e moto ʻa Molonaí, “Vakai, te tau fakaʻosi ʻa e taú” (ʻAlamā 44:10).
Naʻá ku foki lotolahi ki he kalasí mo ʻeku palaní, kuó u mateuteu mo e ngaahi tefitoʻi moʻoni ne u ʻilo mei ha talanoa ʻi he folofolá. Naʻe ʻi ai ha īmisi ʻo e ʻEikitau ko Molonaí, naʻe ʻi he kato hoku soté ʻi he toenga ʻo e taʻu fakaakó, ko ha fakamanatu ki he founga hono akoʻi ʻe he ʻEikitau ko Molonaí au ke u puleʻi ha lokiako he ako lotolotó. Ko e taimi naʻá ku tukuange ai ki he fānau akó e foʻi fili ʻe uá, naʻe fakalakalaka honau ʻulungāngá, ne nau fakahoko ʻenau ngāué, pea mau toe vālelei ange. Naʻe ʻosi ʻa e taʻú, pea naʻe kei faingataʻa pē, ka ʻi hono tali ʻo e lotú mo e mālohi ʻo e folofolá, naʻá ku lava ʻo “fakangata ʻa e taú.”