Kae ʻOua Ke Tau Toe Fakataha Mai
Ko e Poto Fakalangi e Siasi ʻo e ʻEikí
“He Slumbers Not, nor Sleeps,” Ensign, May 1983, 5–8. Naʻe fakaleleiʻi ʻa e fakaʻilonga leá mo e faka-mataʻitohi lahí.
ʻOku lalanga ʻe he ʻOtuá ʻEne kupesí ʻo fakatatau ki Heʻene fokotuʻutuʻu maʻongoʻongá.
Faitaaʻi ʻe Mary Ouzounian, ʻi he angalelei ʻa e Musiume Hisitōlia ʻo e Siasí
ʻOku hā mahino e poto fakalangi ʻi hono fokotuʻutuʻu ʻo e ngāué ni pea mo e uiuiʻi ki he tuʻunga fakatakimuʻá. Ko e Kau Taki Māʻolungá ko e niʻihi fakafoʻituitui kātoa, ʻoku nau takitaha e ʻulungaanga. ʻOku nau takitaha ʻomi ki honau ngaahi fatongiá ha ngaahi taukei kehekehe mo e puipuituʻa. Ko e taimi ʻoku ʻi ai ai ha ngaahi meʻa ke aleaʻi ʻi he ngaahi fakataha alēlea pule ʻo e Siasí, ʻoku tauʻatāina ʻa e taha kotoa ke fakahaaʻi ʻene fakakaukaú. ʻOku mālie ke siotonu ʻi he mālohi tākiekina ʻo e Laumālie Māʻoniʻoní ʻi he kau tangatá ni, ʻi he sio ha taha ʻi he founga ʻo e ngāué. ʻOku kehekehe ʻenau ngaahi fakakaukaú ka ʻoku ʻikai ke nau teitei fakakikihi pea ʻoku molū ʻo aʻu ki hano fakahaaʻi ʻo e uouangatahá. Naʻe folofola ʻa e ʻEikí, “Ko hoku falé ko ha fale ia ʻo e maau” (vakai, T&F 132:8). ʻOku ou aʻusia hano fakafoʻou maʻu pē ʻo e tuí, ʻi heʻeku siotonu he foungá ni ʻi he ngāué. …
ʻOku fakahaaʻi ʻe ha niʻihi ʻenau hohaʻa he ʻoku ngalingali ko e Palesiteni ʻo e Siasí ko ha tangata motuʻa maʻu pē, pea ko ʻeku tali ki aí, “Hono ʻikai ko ha tāpuaki!” Ko e ngāue ʻi he kuonga fakakosipeli ko ʻení naʻe fuofua kamata ia ʻi hono meʻangāue ʻaki e Palōfita ko Siosefa Sāmitá. Ko e taimi ko iá naʻe kei talavou mo longomoʻui, pea naʻe ʻikai tuku ʻene fakakaukaú ʻi he ngaahi tukufakaholo ʻo hono kuongá. Ko ʻene fakakaukaú naʻe kei fakakaukau ʻo hangē ko e tou tupú ʻa ia ʻe lava ʻe he ʻEikí ʻo ngaohi ʻo hangē ha ʻumea foʻou mo moluú ʻi Heʻene kamata ʻEne ngāué.
Ko e tokotaha naʻá ne fetongi ʻa Siosefá naʻe kei talavou ʻi heʻene fehangahangai mo e fatongia mafatukituki hono taki e kakaí kotoa ʻi he maomaonganoá ki ha fonua foʻoú.
Ka kuo tokamālie ʻa e ngaahi tefitoʻi meʻa ʻo ʻetau tokāteliné, pea kuo fokotuʻu kitautolu ko ha kakai, kae ʻoua kuo tuʻutuʻuni ʻe he ʻEikí ha meʻa kehe. ʻOku ʻikai ke tau fie maʻu ke liliu foʻou. ʻOku fie maʻu ke tau līʻoa ʻi he talangofua ki he ngaahi tefitoʻi moʻoni fakalangi kuo fakahaá. ʻOku fie maʻu ke tau mateakiʻi hotau kau taki, ʻa ia kuo fokotuʻu ʻe he ʻOtuá. Ko ia hotau palōfita, hotau tangata kikite, mo e tangata maʻu fakahaá. He ʻikai teitei tuku ke taʻe ʻi ai hatau palōfita kapau te tau moʻui taau ke maʻu ha palōfita. ʻOku ʻikai fie maʻu ia ke anga fakatamaiki. Kuó Ne ʻai pea te Ne kei ʻai ha kau tangata kei talavou ange ke nau fefonongaʻaki ʻi he funga māmaní ke fakahoko ʻa e ngāué. Ko ia ʻa e taulaʻeiki lahi pulé, ko e tauhi ʻo e ngaahi kī kotoa ʻo e lakanga fakataulaʻeiki māʻoniʻoní, pea mo e leʻo ʻo e fakahā mei he ʻOtuá ki Hono kakaí.
ʻOku ʻi ai ha paloveape motuʻa ʻoku pehē, “Ko e toʻu tupú ki he ngāué. Matuʻotuʻá ki he fakapotopotó.”
Te u pehē ʻoku ʻi ai ha faʻahinga meʻa fakafiemālie moʻoni ʻi hono ʻiloʻi te tau maʻu ha Palesiteni kuo ʻosi fakatonutonu mo akoʻí, ʻahiʻahiʻi mo siviʻi, pea kuo ʻosi fakamālohia ʻi he ngāué ʻi heʻene tauhi ki he ngāué pea mo ʻene angatonú, pea matuʻotuʻa ʻene tuí, pea kuo tanumaki ʻene vāofi mo e ʻOtuá ʻi ha vahaʻataimi ʻo ha ngaahi taʻu lahi. …
ʻOku ʻikai fie maʻu ke tau manavasiʻi ki he kahaʻú kapau ʻoku tau pīkitai ki he ngaahi tefitoʻi moʻoni kuo fakahaá.