Ko e Mana ʻo e Māfana Feʻungá
ʻOkú ke fie maʻu ia he taimí ni pē—pe ʻokú ke fie maʻu ke sai?
Fakakaukau ki ha talavou ʻoku nofo tokotaha ʻi ʻapi pea ʻoku fakaʻau ke fiekaia (ʻio, ʻoku faingataʻa ke fakakaukau ki ai, ka ke feinga pē ke fakakaukau loto ki ai). Tau pehē ʻoku fakakaukau ʻa e talavoú ni ke feinga ke ne ngaohi ha sanuisi siisi pea ko ʻene fuofua fai ʻeni1 Tau pehē kuo teʻeki ai teitei akoʻi ʻe he ongomātuʻá ʻa e talavoú ni he founga ngaohi ʻo e sanuisi sīsí pea naʻe teʻeki ai sio lelei ia ʻi he taimi naʻá na ngaohi ai iá.
Tau pehē, kuo maʻu kotoa ʻe he talavoú ni ʻa e ngaahi meʻa ki hono ngāhí: ʻa e maá, sīsí, kiʻi meʻi pata ʻosi vali ʻaki ʻa e maá (mo ha kiʻi meioneisi ʻi loto he ʻoku poto). Hokó, ʻokú ne toʻo mai ʻa e fakapakú ʻo hili ki he funga sitoú. (ʻOku tau toe fakakaukauloto foki ʻoku ʻikai ke ʻi ai haʻane fakapaku totonu pe ngaahi meʻa ngaahi-kai kehe ki hono ʻai ʻo e meʻa ko ʻení.)
Fakakaukau loto he taimí ni, ʻoku haʻu ki heʻene fakakaukaú ʻa e meʻa ko ʻení—ko ha fakakaukau ʻoku tokolahi ha kakai ʻoku ʻikai ke nau ʻiloʻi (pe taʻe-maaʻusia) ke fakakaukau: “Kapau te u tuku hake ʻa e mafaná, ʻe vave ange ʻene mohó.”
Fakakaukauloto ki he meʻa ʻe hoko maí. (Pe mahalo ʻoku ʻikai fie maʻu ia ke ke fakakaukau loto ki ai.)
Ko haʻane maʻu pē ha mā ʻoku pakupaku feʻunga, mo lanu melomelo pe siisi kuo molū pea hafu hifo—ka he ʻikai fakatou maʻu kinaua. ʻOku ngalingali, te ne maʻu ha mā ʻoku ngali mo ongo (pea mahalo ʻe ifo) hangē ha maka moʻunga afí pea mo ha siisi ʻoku mangumolū, ʻa ia ko e lelei taha ia ʻe ala maʻú.
Te ke lava ʻo fakatokangaʻi, ko ʻene palopalemá ʻoku tuifio ai ʻa e taʻe ʻiló (pea ʻoku makātakiʻi pē) mo e taʻe faʻa kātakí (neongo ʻoku mahino, ka ʻoku ʻikai fuʻu tali lelei). Kapau te ne toe fai e fehalaaki ko ʻení, ʻe toe lahi ange hono taʻe talí, koeʻuhí he ʻikai lava ke tukuakiʻi ʻa e taʻeʻiló ka ʻe tupu ia mei he taʻe faʻa kātakí.
Kuo pau ke ne ʻiloʻi ʻa e fakapulipuli ʻo e māfana feʻungá, kae tonu.
ʻOku ʻikai Taʻeoli ʻa e Feʻungá
ʻOku feʻunga lelei ʻa e māfana ʻo e sitoú ki hono ngaohi ʻo e [saniuisi] sīsí pea mo ha ngaahi toe meʻakai kehe he ʻokú ne tuku ke moho ʻa e meʻakaí ʻo ʻikai paku ʻa tuʻa. Ko hono palopalemá pē he ʻoku fie maʻu ha taimi mo ha tokanga lahi ange, ʻa ia ʻe fie maʻu ai ʻa e faʻa kātakí.
Kuo ʻosi folofola ʻa e ʻEikí, “Fai atu ai pē ʻi he faʻa kātaki kae ʻoua kuo fakahaohaoaʻi ʻa kimoutolu” (T&F 67:13). Ko ʻEne folofola ʻeni fekauʻaki mo e faʻahinga haohaoa ʻoku mahulu atu ia ʻi hono ngaohi ʻo e sanuisi siisi leleí; ʻokú Ne finangalo ke tau hangē ko Iá. Ko Sīsū Kalaisi ʻa e sīpinga fisifisimuʻa ʻo e faʻa kātakí. Pea ʻoku ʻuhinga ha konga ʻo e muimui ʻi Heʻene sīpingá ke fakalahi ʻetau fakakaukaú, ʻo mahulu atu ʻi he ngaahi meʻa ʻo e lolotongá, mo vakai ki he pale maʻongoʻonga ange ʻoku maʻu mei he mapuleʻi kitá, tuí, talangofuá, feinga maʻu pē mo taʻe-tūkuá, kātaki fuoloá, mo e ʻofá—ko hono ʻai ʻe tahá, ke faʻa kātaki.
Ko hono fakaʻuhingaʻí, ʻoku ʻuhinga ʻa e faʻa kātakí ke tatali, ʻa ia ʻe ongo taʻeoli, kae hangē ko hono akoʻi ʻe Palesiteni Tietā F. ʻUkitofa ko e Tokoni Ua ʻi he Kau Palesitenisī ʻUluakí, ʻoku mahulu hake ia ʻi he tatalí ʻataʻataá pē: “ʻOku ʻuhinga ʻa e faʻa kātakí ke tatali kakato mo ʻūkuma. ʻOku ʻuhinga ia ke nofo mo ha faʻahinga meʻa pea fai e meʻa kotoa ʻoku tau lavá—ʻo ngāue, ʻamanaki, mo fakaʻaongaʻi ʻa e tuí; kātekina ʻa e faingataʻá mo lototoʻa, ʻo aʻu ka toloi e ngaahi fakaʻamu hotau lotó. ʻOku ʻikai ko e faʻa kātakí ʻa e kātakí ʻataʻatā pē; ko hono kātakiʻi lelei!”2
ʻOku ʻikai ko e tuku pē sanuisi sīsí ki he fakapakú pea liʻaki ai; ko hono siofi mo fulihi ʻi he taimi totonu.
ʻOku ʻikai ko e ʻosi pē ʻo e akó pe seminelí pe ko e lotú; ko e ako mo e lotu moʻoni.
ʻOku ʻikai ko e tali ke foaki atu kiate koe ha fakamoʻoni ki he Tohi ʻa Molomoná he naʻá ke kole; ko e hoko atu ke lau, ako, fifili, lotu, pea mo moʻui fakatatau mo e ngaahi fakakaukau ʻo e tohí.
ʻOku ʻikai ko e tangutu pē ai kae fakakataʻaki ʻe ho kaungāmeʻá hoʻo tui fakalotú; ko e lotua kinautolu mo fie maʻu moʻoni kinautolu ke liliu honau lotó mo fai e meʻa te ke lavá ke hoko ia.
ʻOku ʻikai ko e tatali pē ki he taʻu 16 ke teiti; ko e feinga ke manako ʻi he talangofuá mo feinga ke mahino e founga ʻe tāpuakiʻi ai koe ʻe he muimui ki he faleʻi ʻa e kau palōfitá.
Holoki ʻa e Mafaná
Ko e faʻa kātakí mo e angamaluú, pe mapuleʻi kitá, ko e konga fakatouʻosi ia ʻo e “fua ʻo e Laumālié” (vakai, Kalētia 5:22–23. Neongo ʻoku ʻi ai ha ngaahi meʻa fakavavevave ʻoku fie maʻu ke ngāueʻi leva pe ha tali kuo ʻosi mateuteu (ʻo hangē ko e ʻi ai ha meʻakai ʻoku fie maʻu ha māfana lahi angé ʻoku velá), ʻoku totonu ke ke fakakaukau kiate koe ʻoku fakaʻau ke ke faʻa kātaki mo mapuleʻi lahi ange koe. Kapau ʻokú ke ongoʻi ʻoku hoko ʻeni, ko ha fakaʻilonga ia ʻoku ngāue ʻa e Laumālié ʻi hoʻo moʻuí.
ʻE hanga ʻe he mana ʻo e māfana feʻungá ʻo ʻoatu ha sanuisi siisi lelei, ha hemipeka ʻoku ʻikai fōtunga hangē ha kiʻi pate hokí ʻoku lanu pingikī ʻa lotomālie, ko e pateta melomelo kae ʻikai ko e pateta paku ʻuli, mo ha laise ʻoku molū mo movetevete kae ʻikai fefeka. Kae tuku ki he [faʻa kātakí] ke fai ʻene “ngāue haohaoá” (Sēmisi 1:4) ʻi hoʻo moʻuí, ʻo tokoni ke ke vilitaki atu ke ke hangē ange ko Sīsū Kalaisí, mo ʻomi ʻa e ivi tākiekina ʻo e Laumālie Māʻoniʻoní mo tokoni ʻo taki koe ki he moʻui taʻengatá.
ʻI hoʻo fakatokangaʻi ko ia ʻa e ngaahi meʻa ʻoku nau fakatupu ke ke taʻe faʻa kātakí, fakakaukau ki he sanuisi sīsí (pe ko ha toe meʻakai pē ʻe ʻuhinga lelei kiate koé) pea mo e meʻa te ke ala feilaulauʻi ʻi haʻo tuku ke tataki hoʻo ngaahi tōʻongá ʻe he taʻe faʻa kātakí. Kapau ʻokú ke halaia ʻi he faʻa tukulolo ki he taʻe faʻa kātakí, kau mai. Te ke lava ʻo fakatomala pea toe feinga ke muimui ʻi he sīpinga mo e ngaahi akonaki ʻa Sīsū Kalaisí. ʻOku lahi ʻa e ngaahi meʻa ia ʻe ala faí, pea ʻoku ʻikai fuʻu tōmui ke ke ʻilo ki he haohaoa ʻoku ala aʻusia ʻi he faʻa kātakí.