Ko e Ngāue ʻi he Siasí
Ko Hoku Ngaahi Sāpate-Fonu ʻi he Ngāue Tokoní
ʻOku nofo e tokotaha naʻá ne fai e talanoá ʻi Kalefōnia, USA.
ʻOku ou femoʻuekina ʻi he ngaahi ʻaho Sāpaté, ka ʻoku ou ongoʻi houngaʻia ʻi heʻeku lava ʻo tokoni ʻo ʻikai ha ngaahi faingataʻa hangē ko ia ne fehangahangai mo e kau taki kimuʻa ʻo e Siasí hangē ko ʻEletā Paʻale P. Palatí.
Ngaahi tā fakatātā ʻa Chidy Wayne
Ko e pongipongi Sāpate ʻeni. ʻOku ou teuteu atu ki ha taimi-tēpile houa ʻe 12 ʻo ha ngaahi fakataha, ʻinitaviu, hilifakinima, mo ha ngaahi fakanofo. Te u kamata ʻi ha senitā fakasiteiki ʻe taha peá u fakaʻosi ki ha falelotu ʻe taha ʻi he tafaʻaki ʻe taha ʻo e koló—kotoa ia ʻi ha ʻaho vela ʻaupito.
ʻOku ou hanganaki atu ki he fakataha, ʻinitaviu, hilifakinima, mo e fakanofo takitaha. Ka, ʻi heʻeku fakakaukau ʻaneafi ki heʻeku fuʻu femoʻuekiná, ne u fakaʻatā au ke u ongoʻi fakaʻofaʻia ʻiate au—ka ne taʻeʻoua ʻeku fakaava hake e Autobiography of Parley P. Pratt pea kamata ʻeku laukongá mei he meʻa ne u ngata aí. Naʻe puke pōpula ʻa ʻEletā Palati, fakataha mo Siosefa mo Hailame Sāmita mo ha niʻihi kehe, lolotonga ʻa e ngaahi ʻaho faingataʻa ʻi Mīsulí. Hili hono ʻave kinautolu ki Tauʻatāiná, naʻe tauhi kinautolu ʻi ha hōtele ke nau mohe ʻi he falikí ʻo ʻolunga ʻi ha kupuʻi ʻakau.
ʻI ha pongipongi momoko, mo sinou lahi ne ofo hake ai ʻa ʻEletā Palati pea, ne ʻikai fakatokangaʻi, ka ne moulu atu ia mei he hōtelé. Naʻá ne huʻu fakahihifo atu ʻi he loto koló peá ne aʻu atu ki he ngaahi loto ʻataʻatā ne ofi mai. Hili haʻane lue ʻi ha maile nai ʻe taha (1.6 km), naʻe hū atu ʻa ʻEletā Palati ki ha vaotā, kuo ʻufiʻufi ʻe he sinoú hono halangá peá ne fūfuuʻi ia ʻe he ʻuluʻakaú.
Naʻá ne fakakaukau ki he tuʻunga faingataʻa ʻokú ne tofanga aí. Ke hoko atu ʻene fononga fakahahaké te ne hao atu ai ki ha siteiti ʻe taha, ʻa ia te ne lava ai ʻo ʻomi hono fāmilí. Kapau te ne foki ki he hōtelé ʻe puke pōpula ia pea fehangahangai mo ha ngaahi tukuakiʻi ki ha ngaahi hia mamafa. ʻI hono ʻahiʻahiʻi ia ke ne holá, naʻe fakakaukau ʻa ʻEletā Palati ʻe iku “faingataʻaʻia lahi, ʻo aʻu ki he maté” ʻa e toenga ʻo e kau pōpulá kapau te ne hola.
Lolotonga ʻene veiveiuá, naʻá ne fakakaukau ai ki ha potufolofola: “He ko ia ia ʻoku loto ke kalofaki ʻene moʻuí, ʻe mole ia: ka ko ia ia ʻe mole ʻene moʻuí koeʻuhí ko aú, te ne toe maʻu ia, ʻio ʻa e moʻui taʻengatá” (vakai, Maʻake 8:35; T&F 98:13).
Naʻe toe foki atu ʻa ʻEletā Palati ki he hōtelé. Ne hoko mai ai ha ngaahi māhina ʻo e pukepōpula fakamamahi—ʻo ʻikai ʻi ai e fāmilí, feohi mo e Kāingalotú, pe malava ke fuesia hono uiuiʻi fakaeʻaposetoló.1
ʻI heʻeku tāpuni ʻa e tohí, naʻá ku fakalaulauloto ki he ngaahi faingataʻa ne fekuki mo e ʻuluaki Kāingalotú—ko e niʻihi ʻo kinautolu ko ʻeku ngaahi kui. Koeʻuhí ko ʻenau fakamoʻoni ki he ongoongoleleí mo ʻenau tui kia Sīsū Kalaisí, naʻa nau kātekina e fakamamahí mo e fakatangá. Koeʻuhí ko ʻenau kātaki-fuoloá, ʻoku ou lava ai ʻo ngāue mo lotu tauʻatāina he ʻahó ni, ʻo kau fakataha mo kinautolu ʻi he tui mo e fakamoʻoni.
ʻI heʻeku teuteu atu ki he ʻaho Sāpate ko ʻení, ʻoku malu pē hoku fāmilí, ʻo hanganaki atu ki ha ʻaho ʻo e moihū ʻi ha fale fakatahaʻanga lelei. ʻE tokoni e fakafeohi ʻa e Kāingalotú ke tau fiefia ange. Te tau fiefia fakataha mo kinautolu ʻi he ngaahi hilifakinimá mo e ngaahi ouau fakanofo ʻoku fakahokó, fakahoko e ngaahi fatongiá, pea fakamālohia e tuí. Te tau maʻu ʻa e sākalamēnití, ʻo manatua hotau Fakamoʻuí mo ʻEne feilaulau fakaleleí. Pea te tau fakatahataha ʻi hotau ʻapí he pooni ke lau e Tohi ʻa Molomoná mo lotu fakataha kimuʻa pea tau tokoto hifo ki hotau mohenga leleí pea ʻolunga ʻi he ngaahi pilo moluú.
ʻOku ou femoʻuekina ʻi he ngaahi ʻaho Sāpaté. ʻOku ou houngaʻia mo tāpuekina ai.