Founga Ke Hoko ʻa Kalaisi ko e Uho ʻo ʻEtau Moʻuí

Fai ʻe ʻEletā D. Todd Christofferson

ʻO e Kōlomu ʻo e Kau ʻAposetolo ʻe Toko Hongofulu Mā Uá

Mei ha fakataha fakalaumālie ʻi he ʻUnivēsiti Pilikihami ʻIongi–ʻAitahoó ʻi he ʻaho 27 ʻo Sānuali 2009.

“Ne aʻusia ʻe Sīsū ʻa e uouangataha haohaoa mo e Tamaí ʻaki ʻEne tukulolo ʻi he sinó mo e laumālié fakatouʻosi ki he finangalo ʻo e Tamaí. Ne folofola ʻa Sīsū ʻo kau ki Heʻene Tamaí ʻo pehē, “ʻOku ou fai maʻu ai pē ʻa e ngaahi meʻa ʻoku lelei ai ia” (Sione 8:29). Naʻe tukulolo ʻa Sīsū ʻo aʻu ai pē ki he maté he ko e finangalo ia ʻo e Tamaí, “pea folo hifo ʻa e finangalo ʻo e ʻAló ʻe he finangalo ʻo e Tamaí” (Mōsaia 15:7). Ko ʻEne tokanga ki he Tamaí ko e taha ia ʻo e ngaahi tefitoʻi ʻuhinga naʻe mahino mo mālohi pehē ai e ngāue ʻa Sīsuú. Naʻe ʻikai ha toe fakakaukau fakaʻalongaua ʻiate Ia.

Te ta lava ʻi he founga tatau pē ʻo tuku ʻa Kalaisi ʻi he lotolotonga ʻo ʻetau moʻuí pea hoko ʻo taha mo Ia ʻo hangē ko ʻEne taha mo e Tamaí (vakai, Sione 17:20–23). Te tau lava ʻaki hano kamata toʻo mei heʻetau moʻuí ʻa e meʻa kotoa pea toe fakafoki ʻo fakamuʻomuʻa ʻa ia ʻoku mahuʻingá pea uho ʻaki ʻa e Fakamoʻuí. Te tau ʻuluaki fokotuʻutuʻu maau ʻa e ngaahi meʻa te tau lava ai ke manatuʻi maʻu pē Iá—ʻa e faʻa lotú, akó mo e fakalaulauloto ki he folofolá, ako mo fakakaukau ki he ngaahi akonaki ʻa e kau ʻaposetoló, teuteu fakauike ke maʻu ʻa e sākalamēnití ʻi he moʻui taau, lotu ʻi he Sāpaté, hiki pea mo manatua e meʻa kuo akoʻi kiate kitautolu ʻe he Laumālié mo ia ʻoku tau aʻusia fekauʻaki mo e tuʻunga fakaākongá. Mahalo te ke manatuʻi ha ngaahi meʻa kehe ʻe feʻunga lelei mo koe ʻi he taimi ko ʻení ʻi hoʻo moʻuí. Ko ʻene ʻi ai pē ha taimi feʻunga mo ha founga ke hoko ai e ngaahi meʻá ni ko e fakatefito ʻetau moʻuí ʻia Kalaisi ʻi he ngaahi meʻá ni mo fokotuʻu totonu te tau lava ʻo kamata ke tānaki atu ha ngaahi fatongia mo ha ngaahi meʻa mahuʻinga kehe ʻo fakatatau ki he meʻa ʻe lava ʻi he taimí mo e maʻuʻanga tokoní, hangē ko e ngaahi fatongia fakaakó mo fakafāmilí, mo e ngaahi ngāue fakatāutahá. ʻI he foungá ni, he ʻikai toʻo mei heʻetau moʻuí ʻa e ngaahi meʻa mahuʻingá ʻe he ngaahi meʻa ʻoku lelei pē pea ko e ngaahi meʻa ʻoku siʻi ange hono mahuʻingá te ne toʻo atu ʻa e meʻa ʻoku ʻikai fakamuʻomuʻá pe mole kotoa.

Neongo he ʻikai ala faingofua, ka te tau lava ʻo vilitaki [maʻu pē] ʻi he tui ki he ʻEikí. Te u lava ʻo fakamoʻoniʻi atu ʻe tupulekina ʻa e loto holi mo e ivi ʻo ha taha ke manatu maʻu pē mo muimui ʻi he Fakamoʻuí. ʻOku totonu ke tau ngāueʻi ʻi he faʻa kātaki ʻa e ikuʻanga ko iá pea lotua maʻu ai pē ʻa e faʻa ʻiloʻilo mo e tokoni fakalangi ʻoku tau fie maʻú (vakai, 2 Nīfai 32:9).