Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko e Ongo ʻĀngelo ko Misa mo Mīsisi Taní
Tā fakatātaaʻi ʻe Wilson Ong
Naʻá ku lolotonga sio TV he taimi naʻe tā mai ai ʻeku faʻeé ke talamai naʻe puke hono tuongaʻané, ko ʻeku faʻē-tangata taʻu 92 ko Foloití, mo hono uaifi ko Milí, ʻi he toʻu mahaki (flu) pea naʻe ʻikai ha meʻakai ʻi hona falé. Naʻe ʻikai mālohi feʻunga ha taha ʻiate kinaua ke ʻalu ki falekoloa ke ʻomi ha meʻa. Naʻe ʻikai ofi atu ha kāinga ʻo Foloiti mo Mili, pea naʻe ʻikai ha taha ke tokoni kiate kinaua.
Naʻe fakakaukau ʻeku faʻeé pe te u lava ʻo tokoni. Ko e mēmipa pē au ʻe tokotaha ʻo e Siasí ʻi hoku fāmili ko iá, pea kuo ʻosi hoko kiate au ha ngaahi meʻa peheni kimuʻa. Ko e palopalemá he naʻá ku nofo ʻi ʻIutā, ʻi he USA, ka naʻe nofo ʻeku faʻē-tangatá mo hono malí ʻi Hēmiti ʻi Kalefōnia ʻi he USA.
Naʻá ku talaange ki heʻeku faʻeé ke tuku mai haku kiʻi taimi ke u fakakaukauʻi e meʻa ke faí. Naʻe ʻi ai haku kaungāmeʻa naʻe nofo ʻi Hēmiti, pea naʻá ku tā leva ki ai ʻo ʻeke pe ʻokú ne ʻilo ha taha ʻi Hēmiti. Naʻá ne fakamatala mai ki ha fefine naʻe ngāue mo ia ʻi he Temipale Letileni Kalefōniá ko Sisitā Tani, ko e palesiteni ia ʻo e Fineʻofá aí.
Ko e taimi naʻe tali mai ai ʻe Sisitā Tani ʻa e telefoní, naʻá ku pehē ange, “Mālō lelei, Sisitā Tani. ʻOku ʻikai ke ke ʻiloʻi au, ka ko hoku hingoá ko Nenisī Lītolo, pea ʻoku ou nofo ʻi ʻIutā. Ko ha mēmipa au ʻo e Siasí, ka ʻoku ʻikai Siasi ʻeku faʻē-tangatá mo hono malí ʻa ia ʻokú na nofo ʻi Hēmití. ʻOkú na puke pea ʻoku ʻikai ha meʻakai ʻi hona falé.” Naʻá ku talaange ʻa e feituʻu ʻokú na nofo aí, ʻa ia naʻe mamaʻo mei ai, pea mo fakamatalaʻi ange ʻoku ou fie maʻu pē ha fakamatala fekauʻaki mo ha falekai ofi kiate kinaua te nau lava ʻo ʻave ha meʻakaí.
Ka, naʻe vivili ʻa Sisitā Tani te na ō mo hono husepānití ʻo ʻave ha meʻakai ki heʻeku faʻē-tangatá mo hono malí. Naʻe ʻi ai haʻana supo mo ha mā naʻe ʻosi taʻo, pea naʻe toki taʻo heʻene faʻeé ha kūkisi. Naʻá ku talaange ʻikai, ka naʻe vili pē.
Hili ha ngaahi houa siʻi mei ai, ne tā mai ʻa Sisitā Tani ʻo fakamahino mai kuo lelei ʻa e meʻa kotoa. Naʻe telefoni mai ʻeku fineʻeikí kimui ange ke talamai e meʻa naʻe talaange ʻe he faʻētangata ko Foloití fekauʻaki mo ʻena ʻaʻahi angé. Naʻá ne pehē, “Ne aʻu mai ha ongo ʻāngelo ko Misa mo Mīsisi Tani ki hoku ʻapí. Naʻá na omi mo ha ngaahi meʻakai kehekehe: foʻiʻakau, vesitapolo, supo kuo ʻosi ngaohi, mā, mo e kūkisi. Ko e kūkisi lelei taha ia kuó u kai.” Naʻe talanoa ʻa e ongomātuʻa Taní mo ʻeku faʻē-tangatá, tokoniʻi kinaua heʻena ngaahi fie maʻú, pea fua leva ʻe Misa Tani ʻa Mili, ʻa ia naʻe puke ʻi he loto ngalongaló, mei hono mohengá ki ha sea ʻi he peitó ke fafanga ʻe Sisitā Tani.
Ko e taimi naʻe tā mai ai ʻeku faʻē-tangatá ke fakamatala ki heʻeku faʻeé fekauʻaki mo e ʻaʻahi ko ʻení, naʻá ne tangi. Naʻá ne pehē kuo teʻeki ai ke fetaulaki mo ha kakai angaʻofa mo tokanga pehē. Naʻá ne talange ki heʻeku faʻeé ʻoku ou monūʻia ke nofo ʻi ʻIutā ʻo takatakaiʻi ʻe he “Kau Māmonga ko iá.”
Hili ha ʻaho ʻe fā mei he ʻaʻahí ni, ne hū atu ki tuʻa ʻa e faʻētangata ko Foloiti ki heʻene puha meilí pea hekea ia ʻo tō. Naʻe tau lahi hono ʻulú pea siʻi mate hili ha ʻaho ʻe fā mei ai. Makehe mei he neesi tauhí, ko Misa mo Mīsisi Tani ʻa e kakai fakamuimui taha ne mamata ki ai ʻeku faʻē-tangatá kimuʻa peá ne maté.
ʻOku ou fakamālō ʻi he sīpinga faka-Kalaisi ʻa ha taha hoku ngaahi tokoua ʻi he Fineʻofá naʻe nofo mamaʻo ʻi ha maile ʻe laungeau, ko ha taha ʻoku teʻeki ai pē ke u fetaulaki mo ia, naʻe tokoni ki heʻeku faʻē-tangatá mo hono malí.