Toʻu Tupú
Ko e Afí mo e Ngaahi Lēsoni ʻo e Talangofuá
Naʻe vahevahe ʻe Palesiteni Tōmasi S. Monisoni he taimi ʻe taha ki ha taimi naʻá ne ako ai e mahuʻinga ʻo e talangofuá. ʻI hono taʻu valú, naʻe ʻaʻahi mo hono fāmilí ki honau kiʻi fale-sinoʻi ʻakau ʻi he ʻotu moʻungá. Naʻá ne loto mo hono kaungāmeʻá ke fakamaʻalaʻala ha feituʻu saafa ke tafu ai ha afi. Naʻá na feinga ke fakamaʻalaʻala ʻa e sāfá ʻaki hona nimá, ʻo fusi mo hamu ʻaki hona iví kotoa, ka ko e falukunga vao iiki pē ne na lava ʻo taʻakí. Naʻe fakamatalaʻi ʻe Palesiteni Monisoni ʻo pehē, “Ka ne haʻu ki hoku ʻatamai taʻu valú ha meʻa ne u pehē ko e founga tonu tahá ia. Naʻá ku talange leva kia Teni, ‘Ko e meʻa pē ʻoku fie maʻú, ke ta tutuʻi ʻa e vao ko ʻení. Ta tutuʻi pē ha foʻi siakale ʻi he vaó!’”
Neongo naʻá ne ʻiloʻi pē ʻoku ʻikai ngofua ke ne fakaʻaongaʻi ha masi, naʻá ne lele atu ki he fale-sinoʻi ʻakaú, peá na tutuʻi ha kiʻi afi siʻisiʻi ʻi he konga saafa ko iá. Naʻá na ʻamanaki ʻe mate hifo pē ʻiate ia pē, ka naʻe iku ia ko ha vela lahi mo fakatuʻutāmaki. Naʻá ne lele mo Teni ʻo ui tokoni, pea tuaiekemo kuo fakavave mai e kakai lalahí ʻo tāmateʻi ʻa e afí kimuʻa pea aʻu atu ki he ʻuluʻakaú.
Naʻe hoko atu ʻa Palesiteni Monisoni ʻo ne pehē, “Naʻá ku ako mo Teni ha ngaahi lēsoni faingataʻa ka naʻe mahuʻinga ʻi he ʻaho ko iá—ko e konga lahi ko e mahuʻinga ʻo e talangofuá.” (Vakai, “ʻOku ʻOmi ʻe he Talangofuá e Ngaahi Tāpuakí,” Liahona, Mē 2013, 90.)
Kuó ke ako nai ha lēsoni ʻi he talangofuá he founga faingataʻá ʻo hangē ko ia ne fou ai ʻa Palesiteni Monisoní? Ko e hā nai ha ngaahi taumuʻa te ke lava ʻo fokotuʻu ke haofakiʻi ai koe ʻi he kahaʻú ʻo fakafou ʻi he talangofuá?