Lokaʻi ʻi Tuʻa!

Naʻe mokoʻīʻī ʻa tuʻa, pea naʻe faʻaki mai e ʻea momokó ki he kouʻahe mo e ihu ʻo e fāmili Sitīvenisoní. Hili ha ʻaho fakafiefia ʻo e sikií, ne nau aʻa atu he sinoú ki heʻenau kaá. Ne nau hanganaki atu ke hū ki he loto kaá ʻo māfana ʻi he hitá.

Ka ʻi he taimi naʻe ala hifo ai ʻa ʻEletā Sitīvenisoni ki hono kató, kuo pulia e kií ia! Naʻá ne fakakaukau, “Ko feʻia e kií?” Naʻe tatali loto vēkeveke ʻa e tokotaha kotoa ke ne fakaava e kaá. Ka koeʻuhí naʻe ʻikai ke ʻi ai e kií, ne lokaʻi ai kinautolu ʻi tuʻa! He ʻikai lava ke nau fakaava pe fakamoʻui e kaá. He ʻikai lava ke fakamoʻui e meʻa fakamāfaná.

Ko e fuofua meʻa pē naʻe fai ʻe ʻEletā Sitīvenisoní, ko ʻene fai ha kiʻi lotu. Naʻá ne kole ki he Tamai Hēvaní ke tokoni ange ke maʻu e kī ʻo e kaá. Hokó, naʻá ne fakakaukau lahi ki he feituʻu ʻe ala tō aí. Naʻá ne manatuʻi leva ʻene foʻi puna pongipongia he sikií. Naʻá ne fakakaukau, “Mahalo ʻoku tanumia e kií ai he sinoú.”

Naʻe toe foki ha niʻihi ʻo e fāmilí mo ʻEletā Sitīvenisoni ki he ʻāfaki ki ʻolunga ʻo e sikií ʻo nau sikī hifo mei ai ki lalo. ʻI heʻenau aʻu ki he konga ki lalo ne nau puna sikī aí, kuo kamata ke tō e laʻaá ia. Ne nau fekumi holo ki he kií ʻi he fakaʻau ke fakapoʻuli angé. Naʻa nau ofo heʻenau maʻu e kií kimuʻa pea fuʻu fakapoʻulí!

Naʻe hanga ʻe he lotú mo hono maʻu e kī ʻo ʻenau kaá ʻo fakamanatu kia ʻEletā Sitīvenisoni he ʻikai tuku ʻe he Tamai Hēvaní ke tau tuʻu tokotaha he momokó. ʻOkú ne ʻomi e ngaahi kī mo e mafai ʻo e lakanga fakataulaʻeikí ki he kau taki ʻo e Siasí ke tokoni ʻi hono tataki kitautolu ke tau hao ki ʻapi kiate Iá.