Ko e Maʻu ha Nonga ʻi he Sākalamēnití
Tā fakatātā ʻe Allen Garns
ʻI heʻeku hoko ko ha faʻē kei talavoú, ne u feinga lahi ai ke maʻu ha momeniti nonga lolotonga e ngaahi ʻaho taulōfuʻu ʻo e moʻuí ne u tokangaʻi ai ha fānau longomoʻui ʻe toko nima. Ka maʻu ha kiʻi miniti ʻe nima pe 10, ko e meʻa pē ia ne u lavá, ka ne u fakamahuʻingaʻi e kiʻi momeniti longonoa kotoa pē.
Ne u faʻa tafoki ki heʻeku Tamai Hēvaní he lotu ʻo kolea ha ivi, kātaki pea mo ha nonga. Naʻe tautefito e hohaʻá he Sāpaté ʻi hono tokangaʻi ha pēpē valevale, fakatui e vala ʻo ha kiʻi pēpē lahilahi hake pea mo tokangaʻi e teuteu ʻa e fānau lalahi angé ki he lotú. Ka ko e meʻa mālié, ko e tali ki heʻeku palopalemá ne maʻu ia ʻi ha ʻaho Sāpate femoʻuekina.
ʻI heʻeku fakafanongo ki he ongo lotu sākalamēnití he ʻaho ko iá, naʻe toe mahuʻinga makehe ange ʻa hono fakaleá: “… ke ʻiate kinautolu maʻu ai pē ʻa hono Laumālié” (T&F 20:77).
Naʻe ʻi ai ʻeku totonu ke u maʻu e Laumālie ʻo e ʻEikí. Naʻe anga fēfē ʻa e teʻeki ai ke u fakatokangaʻi kimuʻa ʻa hono mahuʻinga ʻo e talaʻofa ko iá?
Naʻe hoko e sākalamēnití ko e momeniti fakalongolongo mo fakatupu fakakaukau taha heʻeku moʻui fonu longoaʻá. Ne u maʻu ʻi he ouau sākalamēnití ʻa e nonga ne u fekumi ki aí.
Neongo ne u hū kituʻa mei he sākalamēnití mo ʻeku kiʻi pēpē longoaʻá hili pē hono maʻu e maá mo e vaí, ka ne u fakapapauʻi te u ʻi ai he momeniti makehe ʻoku tau fakamanatua ko iá. Ne u hanganaki atu ki he ngaahi momeniti pelepelengesi ko iá ʻi he loto vēkeveke kuo teʻeki ai ke u aʻusia kimuʻa.
Ko ʻeni kuo lalahi ʻeku fānaú, pea ʻoku ou maʻu leva ha ngaahi momeniti lōngonoa lahi fau. Ka ʻoku ou kei fakamahuʻingaʻi pē ʻa e ngaahi momeniti ko ia ʻoku ou maʻu ai e sākalamēnití.