Pōpoaki ʻa e Faiako ʻAʻahí
Ko e Fakalelei ʻa Kalaisí ko e Fakamoʻoni ia e ʻOfa ʻa e ʻOtuá
Ako ʻi he faʻa lotu ʻa e fakamatala ko ʻení pea fekumi ki ha ueʻi fakalaumālie ke ʻiloʻi ʻa e meʻa ke vahevahé. ʻE teuteuʻi fēfē e ngaahi ʻofefine ʻa e ʻOtuá ki he ngaahi tāpuaki ʻo e moʻui taʻengatá ʻi he mahino e taumuʻa ʻo e Fineʻofá?
Tuí Fāmilí Fakafiemālié
ʻOku tokoni e mahino ʻoku tau maʻu naʻe foaki ʻe heʻetau Tamai Hēvaní ʻa Hono ʻAlo Tofu Pē Taha Naʻe Fakatupú ka tau maʻu e moʻui taʻe-faʻa-maté pea malava ke maʻu mo e moʻui taʻengatá, ke tau ongoʻi e ʻofa taʻefakangatangata mo taʻemafakamatalaʻi ʻa e ʻOtuá kiate kitautolú. ʻOku ʻofa foki hotau Fakamoʻuí ʻiate kitautolu.
“Ko hai te ne fakamāvae ʻa kitautolu mei he ʻofa ʻa Kalaisí? …
“He ʻoku ou ʻilo pau, ʻe ʻikai ʻi he maté, pe ʻi he moʻuí, pe ʻi he kau ʻāngeló, pe ʻi he kau pulé, pe ʻi he ngaahi mālohí, pe ʻi he ngaahi meʻa ʻi hení, pe ʻi he ngaahi meʻa ʻe hokó,
“Pe ʻi he māʻolungá, pe ʻi he māʻulaló, pe ʻi ha meʻa kehe ʻe taha kuo ngaohi, ʻe ʻikai mafai ia ke fakamāvae ʻa kitautolu mei he ʻofa ʻa e ʻOtuá, ʻa ia ʻoku ʻia Kalaisi Sīsū ko hotau ʻEikí.” (Loma 8:35, 38–39).
Naʻe lea ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē: “ʻOku hanga ʻe he faingataʻaʻia ʻa e Fakamoʻuí ʻi Ketisemaní mo ʻEne mamahi he funga kolosí, ʻo huhuʻi kitautolu mei he angahalá ʻaki ʻene fakafiemālieʻi e fie maʻu ʻa e fakamaau totonú meiate kitautolú. ʻOkú Ne ʻaloʻofa mo fakamolemoleʻi kinautolu ʻoku fakatomalá. ʻOku toe fakalato foki ʻe he Fakalelei ʻa Sīsū Kalaisí ʻa e moʻua ʻo e fakamaau totonú kiate kitautolu ʻaki hono fakamoʻui mo totongi huhuʻi kitautolu ʻi ha mamahi ne tau fuesia ka ʻoku tau tonuhia ai. “Vakai, ʻokú ne kātakiʻi ʻa e ngaahi mamahi ʻa e kakai kotoa pē, ʻio, ʻa e ngaahi mamahi ʻa e kakai moʻui kotoa pē, ʻa e kakai tangata mo e kakai fefine fakatouʻosi, pea mo e fānau ʻa ia ʻoku kau ʻi he fāmili ʻo ʻĀtamá” (2 Nīfai 9:21; vakai foki ʻAlamā 7:11–12).”1
Kuo hanga ʻe Kalaisi ʻo “tohi tongi koe ʻi [Hono] ʻaofi nimá” (Īsaia 49:16). Naʻe pehē ʻe Linitā K. Peatoni ko e Palesiteni Lahi ʻo e Fineʻofá, “ʻOku totonu ke hanga ʻe he ngāue kāfakafa ʻo e ʻofa ko iá ʻo ʻai ke tau tūʻulutui hifo ʻo fakamālō ʻi he loto fakatōkilalo ki heʻetau Tamai Hēvaní ʻi Heʻene ʻofa ʻiate kitautolú ke ʻomi ai ʻa Hono ʻAlo Pē ʻe Taha Naʻe Fakatupú pea ko e ʻAlo haohaoá, ke mamahi maʻa ʻetau ngaahi angahalá, loto mamahí, mo e meʻa kotoa pē ʻoku ngali taʻe fakafiemālie ʻi heʻetau moʻui fakafoʻituituí.”2