Akoʻi ʻe he ʻEikí: Tuʻunga ko e Mātuʻa Taʻemali
Naʻe teʻeki ai ke u palani ke u hoko ko ha mātuʻa taʻemali ki heʻeku fānau ʻe toko faá ʻi hoku taʻu uofulu tupú, pea ʻoku ou kei fakatumutumu ai. Naʻe ʻi ai haku ʻapi ke tokangaʻi, fānau iiki ʻe toko fā pea ʻikai mo haʻaku tuʻunga fakaako hili e ako māʻolungá. Ne u fifili pe te u lava fēfē nai ʻo tauhi hoku kiʻi fāmili kei siʻí. Naʻe ʻikai hoko mai e ngaahi talí ʻi ha ngaahi ʻaho pe māhina, ka ʻi ha ngaahi taʻu lahi ʻo e talangofua ki he ngaahi ueʻi hokohoko ne u maʻú.
Meʻamālie ne u angaʻaki e tafoki ki he ʻEikí he ngaahi taimi ʻo e faingataʻá. ʻI he pō ʻe taha naʻe ʻosi mahino pē ʻa e talí ia: “ʻAlu ki he akó.” Ne u fifili pe ʻe malava fēfē ke fai ʻeni ʻi he ngaahi tufakanga fakapaʻanga ne u ʻi aí, ko ia ne u talanoa mo ʻeku ongo mātuʻá pea mo ʻeku pīsopé. Naʻa nau loto ki ai ʻo talamai ko e hala totonú ia ke u foki ki he akó, pea ne ʻikai fuoloa kuó u lesisita ke ako ʻi ha ʻunivēsiti pē homau feituʻú ʻo maʻu ai haku mataʻitohi he ako ki he toʻu lautohi puleʻangá pea mo e ako makehé.
ʻI heʻeku hoko ko ha faiakó, naʻe ʻikai pē ke u maʻu ʻe au ha paʻanga feʻunga mei he ngāué ke feau ʻaki e fie maʻu fakapaʻanga ʻeku fānau kuo tupu lalahí. Ne hokohoko atu pē ʻeku tautapa ki he ʻEikí fekauʻaki mo e ʻikai ha paʻanga feʻungá. ʻI heʻeku talanoa mo ʻeku pīsopé, naʻá ne fokotuʻu mai ke u foki ki he akó ke maʻu haku mataʻitohi MA. Ne u foki ki ʻapi ʻo lotua peá u toe lesisita leva he akó ki he semesitā hokó.
Hili ha ngaahi taʻu siʻi mei ai, ne u toe maʻu ha ongo ke u toe foki ki he akó. Ne u fakataimitēpileʻi ke fai e ngaahi sivi naʻe fie maʻú, ʻinitaviu ki he ngaahi polokalama he tafaʻaki fakataki he akó pea ne u toe lesisita, ki ha polokalama ako MA ʻi ha ʻunivēsiti kehe homau feituʻú pē. Ko ʻene lavá pē, kuo fakaava mai ha ngaahi faingamālie ngāue foʻou kiate au kuo fakatupulekina ai ʻeku moʻuí ʻaki ha ngaahi vā fetuʻutaki foʻou, tanumaki ai ʻeku tupulaki fakatāutahá pea tokoni ia ke u maʻu ha ngaahi talēniti foʻou.
ʻI he temipalé he pō ʻe taha, ne u vahevahe ai ki he ʻEikí ʻeku taʻefiemālié neongo ʻeku ngaahi feingá ka naʻe ʻikai pē ke u lava ʻe au ʻo feau e ngaahi fie maʻú. Ne u ongoʻi ha fetuʻutaki fakalangi ʻo fakamanatu mai ai kuo ʻosi feau kotoa e ngaahi fie maʻu hoku fāmilí, ʻo fakafou heʻeku ngāué pe ko e angaʻofa mai ʻa e niʻihi kehé, pea kapau te u kei moʻui talangofua ai pē, ʻe kei tokangaʻi pē au. ʻOku ou manatu ai ki he ʻAlamā 20:4, “ʻOku ou ʻilo ʻoku [ou] lava ʻo fai ʻa e ngaahi meʻa kotoa pē ʻi he māfimafi ʻo e ʻEikí.”
ʻOku ou houngaʻia moʻoni ki he Tamai Hēvaní he ngaahi ueʻi ke u fakakakato ʻeku akó kae pehē ki he ngaahi faingamālie fakaengāue hili ʻeku akó. ʻOku ou fakafetaʻi foki koeʻuhí ko e kakai heʻeku moʻuí kuo nau fakaʻatuʻi au he ngaahi taʻu kotoa ko iá. Kuó u ako ai te u lava ʻo fai ha meʻa lahi ange he meʻa ne u fakakaukau ʻe malavá, ʻi he tokoni ʻeku Tamai Hēvaní. Kuó u ako ke u tali fiefia ha ʻofa pea ke u foaki lahi foki ʻi he ʻofa, he ʻokú na mahuʻinga tatau pē.