1 Kolinitō 10:13

Naʻe akoʻi kitautolu ʻe he ʻAposetolo ko Paulá ki he founga ke tau matuʻuaki ai e ʻahiʻahí.

13 ʻOku ʻikai ha ʻahiʻahi ʻe tō kiate kimoutolu ka ko ia ʻoku faʻa hoko ki he tangatá: ka ʻoku moʻoni ʻa e ʻOtuá, pea ʻe ʻikai te ne tuku ke lahi hono ʻahiʻahiʻi ʻa kimoutolú ʻi he meʻa te mou faʻa faí; ka ʻi he ʻahiʻahí ʻe tofa foki ʻe ia ha hala ke hao ai koeʻuhí ke mou faʻa kātakiʻi ia.

ʻAhiʻahí

“ʻOku ʻiloʻi ʻe he filí ʻa e feituʻu, taimi pea mo e founga ke ʻahiʻahiʻi ai kitautolú. Kapau ʻoku tau talangofua ki he ngaahi ueʻi ʻa e Laumālie Māʻoniʻoní, ʻe lava ke tau ʻiloʻi e ngaahi fakatauvele ko ia ʻa e filí. …

“ʻOku ʻikai ʻaupito fuatautau ʻetau lavameʻá mei he mālohi hono ʻahiʻahiʻi kitautolú ka ʻi he founga faivelenga ʻoku tau tali ʻaki iá. Kuo pau ke tau kole tokoni mei heʻetau Tamai Hēvaní pea fekumi ki ha mālohi ʻo fakafou ʻi he Fakalelei ʻa Hono ʻAlo ko Sīsū Kalaisí.”

‘Eletā Robert D. Hales ‘o e Kōlomu ‘o e Kau ‘Aposetolo ‘e Toko Hongofulu Mā Uá, Konifelenisi lahi ʻo ʻEpeleli 2009.

Angaʻaki ʻe he Tangatá

Neongo ʻoku kehekehe kotoa hotau ngaahi ʻahiʻahí, ka ʻoku ʻahiʻahiʻi kotoa pē kitautolu. ʻOku fie maʻu ke ʻi ai ha ʻahiʻahi he kuo pau ke “ʻahiʻahiʻi ʻe he tēvoló ʻa e fānau ʻa e tangatá, pe ʻe ʻikai lava ke nau hoko ko e niʻihi ke fili maʻanautolu pē” (T&F 29:39).

ʻOku Angatonu ʻa e ʻOtuá

Angatonú—falalaʻanga, mateaki. Te tau lava ʻo falala ki he ngaahi talaʻofa ʻa e ʻOtuá te Ne tokoni ke tau fuesia mo hao mei he ʻahiʻahí.

Mahulu Hake he Meʻa Te Mou Malavá

ʻOku totonu ke tau feinga ke fakaʻehiʻehi mei he ʻahiʻahí. Taimi ʻe niʻihi ʻoku tau faingataʻaʻiá pē ko e ʻikai ke tau fakafisingaʻi e ʻahiʻahí heʻene aʻu maí pē. Hangē ko ia ne akoʻi mai ʻe ʻEletā Niila A. Mekisuele (1926–2004) ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko e moʻoni naʻe ʻafioʻi ʻe Sīsū e ngaahi ʻahiʻahi faingataʻa naʻá Ne aʻusiá, ka naʻe ʻikai ke Ne fakakaukau pe toe fakakaukau ki ai. Naʻá ne fakafisingaʻi leva pē kinautolu. Kapau ʻoku tau talitali tuʻu e ngaahi ʻahiʻahí, he ʻikai fuoloa kuo nau fakafiefiaʻi kitautolu!” (Konifelenisi lahi ʻo ʻEpeleli 1987)

Ko ha Haoʻanga

ʻOku ʻi ai maʻu pē ha haoʻanga—ha fili ʻe taha, ha feituʻu ʻe taha ke hao ki ai, pe ko ha meʻa ʻe taha ke fai. Ka hili hono fai e meʻa kotoa pē, muimui ki he sīpinga ʻa Siosefa ʻo ʻIsipité, ʻo hola mei ai (vakai, Sēnesi 39:7–12).

Lava ke Fuesia Ia

ʻOku ʻomi ʻe he folofolá ha ngaahi founga ke tokoniʻi ai kitautolu ʻi hotau fatongia ke fakaʻehiʻehi mei he ʻahiʻahí ka tau lava ʻo fuesia ia:

Leʻo mo lotu maʻu pē (vakai, Mātiu 26:41; ʻAlamā 13:28; 31:10; 34:39; 3 Nīfai 18:18; T&F 31:12).
Fakafalala kia Sīsū Kalaisi (vakai, ʻAlamā 37:33), he “ko e meʻa ʻi heʻene mamahi ʻaʻana ʻi hono ʻahiʻahiʻí, ʻokú ne faʻa fai ke tokoniʻi ʻa kinautolu ʻoku ʻahiʻahiʻí” (Hepelū 2:18; vakai foki, ʻAlamā 7:11).
“Ka ke mou fakavaivaiʻi ʻa kimoutolu ʻi he ʻao ʻo e ʻEiki” (ʻAlamā 13:28) pea “vakai telia ʻa e loto-hīkisiá” (T&F 23:1).
“Tokanga ki he folofola ʻa e ʻOtuá, mo … piki maʻu ki aí” (1 Nīfai 15:24).