Kumi, ʻAve, Akoʻi: Kau Mai ki he Tukupā Fakatemipalé

Fai ʻe Carlisa Cramer

ʻOku nofo e tokotaha naʻá ne fai e talanoá ʻi ʻIutā, USA.

Kuo tuku atu e tukupā ko ʻení—kuó ke tali ia?

ʻĪmisi

Artist rendering of the Lisbon Portugal Temple

Kuo fakaafeʻi ʻe ʻEletā Niila L. ʻEnitasoni ʻo e Kōlomu ʻo e Kau ʻAposetolo ʻe Toko Hongofulu mā Uá, ʻa e toʻu tupú ke nau “teuteu e lahi taha ʻo e ngaahi hingoá ki he temipalé ke nau fai e papitaisó he temipalé pea tokoni ki ha tokotaha kehe ke fai ʻa e meʻa tatau.”¹ Naʻe palōmesi foki ʻa ʻEletā Teili G. Lanileni ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻe lava ke hoko e kau atu ki he tukupā fakae-ʻAposetolo ko ʻení ha maluʻi mo ha fakamoʻui fakalaumālie ki he ngaahi fāmilí.²

Fakakaukau ki ai—Kuo poupouʻi mai ʻe he kau ʻAposetolo ʻa e ʻEikí e tokotaha kotoa pē ke kau mai ki he ngāue hisitōlia fakafāmilí ʻaki ʻenau ʻave ʻenau ngaahi hingoa fakafāmilí ki he temipalé. ʻIkai ko ha meʻa lelei ia kapau ko e ouau kotoa pē naʻá ke fai he tempalé, naʻe fai ia ki ho fāmili tonú? Kuo fakaafeʻi ʻe ʻEletā ʻEnitasoni e toʻu tupu he funga ʻo e māmaní ke nau fai e meʻa ko iá mo tokoni ki honau kaungāmeʻá mo e fāmilí ke nau fai e meʻa tatau pē.

ʻI hoʻomou tali e tukupā ko ʻení, te mou lava ʻo ongoʻi ai e Laumālié, fakatupulaki hoʻomou fakamoʻoní pea mo e meʻa te mou aʻusia he temipalé. ʻIkai ke ke fakapapauʻi e founga ke kamata aí? Tau fakaikiiki angé ʻa e tukupaá:

Kumi

ʻUluakí, kumi ʻa e ngaahi hingoá ke ʻave ki he temipalé pea tānaki atu kinautolu ʻi he FamilySearch.org. Kapau kuo laka hake he toʻu tangata faá ʻa e meʻa kuo kakató, feinga ke ke sio ki he tafaʻaki ki he Hakó, ʻi he FamilySearch. Pe kapau ʻoku ʻikai pē ha meʻa ia ʻe tohi ʻi hoʻo fuʻu ʻakau fakafāmilí, te ke lava ʻo kamata ʻaki haʻo vakaiʻi ʻa e FamilySearch.org/findnames.

ʻAve

Hili hono talifaki mo paaki e ngaahi ouaú ʻo fakafou ʻi he FamilySearch.org, te ke ʻalu leva mo hoʻo lekomení ʻo ʻave ʻa e hingoá ki he temipalé ke papitaiso mo hilifakinima! Fakaafeʻi e fāmili pe kaungāmeʻa kuo maʻu ʻenitaumení ke nau fakakakato e toenga ʻo e ngaahi ouaú, pe fakahū kinautolu ki he temipalé ʻo fakafou ʻi he FamilySearch ke fai ki ai e ngāué.

Akoʻi

Vahevahe ʻa e fiefia ʻo e hisitōlia fakafāmilí ki he niʻihi ʻoku mou feohí! Fokotuʻu ha pō hisitōlia fakafāmili mo ho ngaahi kaungāmeʻá pe te ke tangutu hifo mo hoʻo ongomātuʻá mo e ngaahi tokouá pe tuongaʻané pe tuofāfiné ʻo fakafonu fakataha hoʻomou fuʻu ʻakau fakafāmilí. Te ke lava ʻo vahevahe atu hoʻo aʻusiá ʻi he mītia fakasōsialé ʻaki haʻo fakaʻaongaʻi e #TempleChallenge.

Kuó ke Maau?

Tatau ai pē pe ko e hā e meʻa kuó ke aʻusia ʻi he hisitōlia fakafāmilí, ʻoku lahi fau ha ngaahi founga te ke lava ʻo kau ai hono fakahoko e tukupaá ni. Fakakaukau ki he founga te ke lava ʻo tokoni ai ke ʻunuakiʻi kimuʻa e ngāue ʻa e ʻEikí.