Fakahoungaʻi ʻa e Sāpaté

Palesiteni Henry B. Eyring, Tokoni ʻUluaki ʻi he Kau Palesitenisī ʻUluakí, “Loto Houngaʻia he ʻAho Sāpaté,” Liahona, Nōvema 2016, 100.

“ʻOku tau maʻu e faingamālie ke maʻu e sākalamēnití he uike takitaha—kuo teuteuʻi, tāpuakiʻi pea tufaki mai ʻe he kau tamaioʻeiki kuo fakamafaiʻi ʻe he ʻOtuá. Te tau lava ʻo houngaʻia he taimi ʻoku fakamoʻoniʻi atu ai ʻe he Laumālie Māʻoniʻoní, ʻoku tali heʻetau Tamai Hēvaní e ongo lotu tāpuaki sākalamēniti ʻoku fai ʻe he kau maʻu lakanga fakataulaʻeiki loto fakatōkilaló.

“… ʻOku tau ongoʻi ha ʻofa mo ha houngaʻia lahi ange ki he Fakamoʻuí, naʻe tuʻunga Heʻene feilaulau taʻengatá ʻa e malava ke fakamaʻa ʻetau ngaahi angahalá. ʻI heʻetau maʻu e maá mo e vaí, ʻoku tau manatuʻi ai naʻá Ne mamahi maʻatautolu. Pea ʻi heʻetau ongoʻi houngaʻia he meʻa kuó Ne fai maʻatautolú, te tau ongoʻi ai ʻEne ʻofa maʻatautolú pea mo ʻetau ʻofa kiate Iá.

“ʻE hanga ʻe he tāpuaki ʻo e ʻofá ʻoku tau maʻú, ʻo ai ke faingofua ange ʻetau tauhi e fekau ke ‘manatu maʻu pē kiate iá’ [Molonai 4:3; 5:2; T&F 20:77, 79]. Hangē ko e ongo ʻoku ou maʻú, te mou lava foki ʻo ongoʻi e ʻofa mo e houngaʻia koeʻuhí ko e Laumālie Māʻoniʻoní, ʻa ia ne talaʻofa mai e Tamai Hēvaní te tau maʻu maʻu pē kapau te tau tauhi faivelenga ai pē ʻetau ngaahi fuakavá. Te tau lava ʻo fakalau kotoa e ngaahi tāpuaki ko iá he Sāpate kotoa pē pea tau ongoʻi houngaʻia ai.