‘I ha Tuʻunga Fakatu ʻutāmaki mo Hoku Kaungāmeʻá
Fai ʻe Stephen W. Owen
Palesiteni Lahi ʻo e Kau Talavoú
Naʻá ku fakatokangaʻi ʻeku toutou taukapoʻi hoku kaungāmeʻa ki heʻeku mātuʻá mo hono taukapoʻi ʻeku ongomātuʻá ki hoku kaungāmeʻá.
Tā fakatātā ʻe Christopher Thornock
ʻI hoku taʻu 14, naʻá ku fai ai ha fili naʻá ne liliu e meʻa kotoa pē. Naʻá ku lue atu he halá mo ha ngaahi kaungāmeʻa ʻi ha pō Falaite, pea naʻa mau fiefia, ʻo hangē ko e angamahení. Ka naʻe ʻi ai ha palopalema he pooni, pea naʻá ku ʻilo naʻe pau ke u fai ha meʻa. Naʻe ʻikai pē ke u fakapapauʻi te u lava.
Naʻe kamata ke ifi tapaka mo maʻu kava mālohi hoku ngaahi kaungāmeʻá,ʻi he ngaahi taʻu kuo maliu atú. Naʻe ʻuluaki kamata māmālie pē, ʻo tuʻo taha pe tuʻo ua, ka ʻi he hokosia mai e Falaite ko ʻení, naʻa nau ifi mo inu maʻu pē he taimi naʻa mau ʻalu aí.
Naʻá ku fakakaukau, te u kei lava pē ʻo fiefia mo hoku ngaahi kaungāmeʻá, koloa pē ke u tauhi au ke maʻa. Ko e moʻoní, naʻe lava pē ke tala ʻe heʻeku ongomātuʻá ne ʻi ai ha meʻa ne fehalaaki mo hoku ngaahi kaungāmeʻá. Pea naʻe lava ke tala ʻe hoku ngaahi kaungāmeʻá naʻe ʻikai saiʻia ʻeku ongomātuʻá ʻiate kinautolu. Naʻe tupu ai haʻaku taʻefiemālie: naʻá ku fakatokangaʻi ʻeku toutou taukapoʻi hoku kaungāmeʻa ki heʻeku mātuʻá mo hono taukapoʻi ʻeku ongomātuʻá ki hoku kaungāmeʻá.
Ko ia naʻa mau lue atu he halá he pō Falaite ko iá. Naʻe kamata ke inu mo ifi hoku ngaahi kaungāmeʻá, pea naʻe faifai peá u fakatokangaʻi ʻeku taʻefiemālie ʻi honau ʻulungāngá. Ko ia ai ne u fai ha fili.
Naʻá ku lue ki he tafaʻaki ʻe taha ʻo e halá.
Naʻe kataʻi au ʻe hoku ngaahi kaungāmeʻá. Naʻa nau ui au ko ha “taha fie failelei.” Pea nau pehē kapau te u nofo ai, he ʻikai ke u toe hoko ko honau kaungāmeʻa.
Sai, naʻa mau aʻu ki he ngataʻanga ʻo e halá. Naʻe afe hoku ngaahi kaungāmeʻá ki toʻohema pea naʻá ku afe au ki toʻomataʻu. Naʻá ku mamaʻo ʻaki mei ʻapi ha maile ʻe ua (km ʻe 3), pea ko e maile ʻe ua lōloa taha ia kuó u lue aí. Mahalo te ke fakakaukau naʻá ku ongoʻi fiemālie ʻi hono fai ha fili lototoʻa peheé, ka naʻá ku ongoʻi taʻefiemālie he momeniti ko iá. Naʻá ku ʻā hake he pongipongi hono hokó mo e ilifia ʻi he ʻiloʻi naʻe ʻikai haʻaku kaungāmeʻá pea naʻá ku toko taha pē. Naʻe fakamamahi ia ki ha taha taʻu 14.
Ko ha Kaungāmeʻa Foʻou
Naʻe ʻikai fuoloa mei ai, naʻá ku maʻu ha telefoni mei ha mēmipa ʻo e Siasí naʻá ku ʻiloʻi ko Teivi. Naʻá ne fehuʻi mai pe te u fie ʻalu ange ki hono ʻapí he pō Tokonakí. Naʻá ne toe fakaafeʻi foki au ke u maʻumeʻatokoni efiafi mo hono fāmilí he ʻaho hono hokó. Naʻe ongo fakafiefia ange ia he tuʻunga ne u ʻi aí, ʻa ia naʻe ʻikai haʻaku kaungāmeʻá, ko ia naʻá ku tali ia.
Naʻá ma fiefia fakataha mo Teivi—pea moʻoni, naʻe ʻikai ha sikaleti pe kava mālohi. ʻI heʻeku fakafanongo ki he lotu ʻa e tamai ʻa Teiví he maʻumeʻatokoni efiafí, naʻá ku ongoʻi fiemālie ʻaupito. Naʻe kamata ke u fakakaukau—mahalo pē—naʻe fakaʻau ke lelei ange.
Naʻá ku hoko mo Teivi ko ha kaungāmeʻa mamae. Naʻá ma vaʻinga ʻakapulu (american football) fakataha, ʻalu fakataha ki he akó, fetokoniʻaki ke ngāue fakafaifekau. ʻI heʻema foki maí, naʻá ma loki fakataha ʻi he ʻunivēsití. Naʻá ma fetokoniʻaki ke maʻu e fefine totonu ke mali mo iá pea tokanga ke ma nofo maʻu he hala fāsiʻi mo lausiʻí ʻo aʻu ki he temipalé pea hoko atu ai. ʻI he ngaahi taʻu lahi ko ʻeni kimui angé, naʻá ma kei kaungāmeʻa lelei pē. Pea naʻe kamata kotoa ia ʻaki ha telefoni faingofua, ʻi he taimi pē naʻá ku fie maʻu aí.
Ko e Ivi Tākiekina ʻo ha Faʻeé
Ko e founga ia naʻá ku fakakaukau naʻe kamata kotoa aí. Fakakaukau angé ki heʻeku ʻohovalé, he taimi naʻá ku ʻilo ai, he ngaahi taʻu kimui ange, ko ʻeku faʻeé naʻá ne fokotuʻutuʻu fakapulipuli homa vā fakakaungāmeʻá! Hili pē ʻeku mavahe mei hoku ngaahi kaungāmeʻa motuʻá, naʻá ne fakatokangaʻi naʻe fehalaaki ha meʻa ʻiate au, ko ia naʻá ne fetuʻutaki ai ki he faʻē ʻa Teiví ke vakai pe te na lava ʻo ʻilo ha founga ke tokoni ai. Naʻe fakalotoʻi leva ʻe he faʻē ʻa Teiví ia ke fetuʻutaki mai mo fakaafeʻi aú. Ko e taimi ʻe niʻihi ʻoku maʻu e ngaahi ueʻi ke tokoniʻi ha taha faingataʻaʻiá mei he Laumālie Māʻoniʻoní; taimi ʻe niʻihi ʻoku maʻu ia mei ha ʻāngelo—hangē ko ha faʻē—ʻoku “lea ʻi he mālohi ʻo e Laumālie Māʻoniʻoní” (2 Nīfai 32:3).
Kuó u faʻa fifili pe naʻe mei kehe fēfē ʻa e moʻuí—kiate au mo Teivi—kapau naʻe ʻikai ʻiloʻi ʻe heʻeku faʻeé ʻeku faingataʻaʻiá pea fai ha meʻa. ʻIkai ʻokú ne fakamanatu atu ai e founga ʻoku tāpuekina ai kitautolu ʻe he Tamai Hēvaní? ‘Okú Ne ʻafioʻi ʻetau fie maʻu kotoa pē, pea ʻokú Ne ʻomi “ʻa e tāpuaki mei ʻolungá, [ʻo fakafou ʻi he] lea mo e ngāue [ʻa kinautolu ʻoku] ʻofá” (“Ko e Taki ki he Leleí,” Ngaahi Himí, fika 186).
Tau ʻAʻeva Fakataha
Ko hono aofangatukú, ʻoku tau haʻisia kotoa ki heʻetau ngaahi filí. Hangē ko ia kuo toutou lea ʻaki ʻe Palesiteni Tōmasi S. Monisoní, “ʻOku hanga ʻe he ngaahi fili ʻoku tau faí ʻo fakapapauʻi mai hotau ikuʻangá,”1 pea ko e lahi taha ʻo e ngaahi fili ko iá kuo pau ke fakahoko fakataautaha, mo fakafoʻituitui. ʻOku faʻa ʻai ʻe heʻetau ngaahi filí ke tau ongoʻi tuenoa, ʻo aʻu ʻo liʻekina. Ka naʻe ʻikai ʻomi kitautolu ki heni ʻe heʻetau Tamai Hēvaní ke tau toko taha.
Naʻe tāpuekina mo tataki ʻeku moʻuí kotoa ʻe he ngaahi fili naʻá ku fai he ngaahi momeniti mahuʻingá. Ka naʻe ueʻi fakalaumālie mo fakaivia e ngaahi fili ko iá ʻe he ngaahi feinga ʻeku faʻeé ʻi he faʻa lotu pea mo e poupou mo e fakakaungāmeʻa ʻa Teiví.
ʻOku kehe e sivi ʻoku tau ui ko e moʻui he māmaní mei he ngaahi sivi ʻoku tau faʻa fakahoko he akó—ʻa ia kuo pau ke ke sio tāfataha pe ki ho sivi ʻaʻaú pea ʻikai ngofua ke ke tokoni ki ho kaungāʻapí. ‘Ikai, te tau lava pea kuo pau ke tau fetokoniʻaki ʻi he sivi ko ʻení; ko hono moʻoní ko e konga ia ʻo e siví. Ko ia neongo mahalo ʻe ʻave koe ʻe hoʻo ngaahi filí ki he tafaʻaki tuenoa ʻo e halá, kātaki ʻo ʻiloʻi ʻoku ʻi ai ha niʻihi kehe ʻi he hala ko iá kuo fai ʻenau fili faingataʻa ke ʻi he tafaʻaki ʻo e ʻEikí. Te nau ʻaʻeva fakataha mo koe, pea ʻoku nau fie maʻu ke ke ʻaʻeva mo kinautolu.