Mga Miting sa Council sa Unang Dominggo

Sa unang Dominggo sa matag bulan, ang mga miting sa korum, grupo, ug Relief Society dili maglakip og leksyon nga itudlo sa usa ka magtutudlo. Hinoon, ang mga lider sa kapangulohan o grupo maghimo og council meeting. Ang matag korum, grupo, o Relief Society magtinambagay bahin sa lokal nga mga responsibilidad, mga oportunidad ug mga hagit; magkat-on gikan sa mga ideya ug mga kasinatian sa matag usa; ug magplano og mga paagi sa pagbuhat sa mga impresyon nga nadawat gikan sa Espiritu.

“Ang pagpadayag gisabwag tali kanato.”¹

Elder Neil L. Andersen

Sa Dili pa ang Council Meeting

Ang mga lider mangita og lokal nga mga responsibilidad, mga oportunidad, ug mga hagit ug mainampoong mopili og hilisgutan nga hisgutan.
Ang tanan magtinguha sa giya sa Espiritu.
Ang tanan mangandam sa pagpakigbahin sa mga hunahuna ug mga kasinatian.

Atol sa Council Meeting

Ang mga lider modapit sa mga miyembro sa pagpakigbahin og mga kasinatian nga gihimo sumala sa mga impresyon nga ilang nadawat gikan sa miaging mga miting.
Ang tanan magtinambagay bahin sa hilisgutan, maminaw sa usag usa, ug magtinguha sa giya sa Espiritu.
Ang mga lider mo-summarize sa importante nga mga punto ug modapit sa pagbuhat niini.

Council Meeting sa Melchizedek Priesthood

Human sa Council Meeting

Ang tanan mobuhat sa mga impresyon ug mga imbitasyon, ang tanan ug tagsa-tagsa.
Ang tanan mangandam sa pagpakigbahin sa ilang mga kasinatian sa umaabut nga mga miting.

“Kita ang Iyang mga Kamot.”²

Presidente Dieter F. Uchtdorf

Mga Baruganan sa Pagtinambagay

Dili tanang mga council meeting pareha. Tuguti nga ang Ginoo motudlo kaninyo. Aniay pipila ka mga baruganan aron makasugod mo:

Ang katuyoan sa council meeting mao ang pagtinambagay bahin sa lokal nga mga responsibilidad, mga oportunidad, ug mga hagit; magkat-on gikan sa mga ideya ug mga kasinatian sa usag usa; ug magplano og mga paagi sa pagbuhat sa mga impresyon nga nadawat gikan sa Espiritu.
Ang council meeting kinahanglan mogiya sa buhat—mga plano sa indibidwal ug sa grupo, dinasig sa Espiritu, sa pagbuhat sa gawas sa miting sa pagtuman sa buhat sa Ginoo (tan-awa sa DP 43:8–9).
Ang mga council kinahanglang mogamit sa mga kasulatan ug sa mga pulong sa mga propeta ug mga apostoles sa ulahing mga adlaw, sa ubang mga General Authority, ug Kinatibuk-ang mga Opisyales sa paggiya ug pagsuporta sa panaghisgutan. Niining paagiha, ang mga pulong sa dinasig nga mga lider sa Simbahan makatabang sa mga korum, mga grupo, ug mga Relief Society pagtubag sa importante nga mga panginahanglan.
Ang mga panaghisgutan kinahanglang dili mohisgot sa kompidensyal o sensitibo nga mga isyu bahin sa indibidwal nga mga miyembro o mga pamilya.
Bisan og ang council meeting gigiyahan sa usa ka sakop sa kapangulohan o mga lider sa grupo, siya dili modominar sa pagpakigbahin. Ang lider mohisgot sa isyu alang sa panaghisgutan ug modapit sa tanan sa pagpakigbahin og mga hunahuna ug mga kasinatian, sumala sa giya sa Espiritu.
Samtang walay usa nga mobati nga na-pressure nga moapil, ang tanan kinahanglang mobati nga luwas ang pagpakigbahin og mga komentaryo ug mga ideya nga dili mahadlok nga sawayon.
Kon posible, ang paglingkod nga magsirkulo makatabang sa pag-ugmad og espiritu sa pagpakigbahin ug dayag nga panaghisgutan.

Posible nga mga Hilisgutan alang sa Mga Council Meeting sa Unang Domiggo

Mga ideya alang sa mga hilisgutan nga hisgutan sa mga council meeting mahimong magagikan sa ward council, mga miting sa kapangulohan, sa plano sa area, mga impresyon sa mga lider gikan sa pagpangalagad sa mga miyembro, ug mga impresyon gikan sa Espiritu Santo. Ang mga hilisgutan sa ubos mao ang sugyot lamang. Ang mga lider mahimong nakahibalo og ubang mga panginahanglan nga gibati nila nga hisgutan.

Unsaon nato nga mas mauna ang tanan sa atong lain-laing mga responsibilidad?
Unsaon nato nga mas maduol ngadto sa Dios ug makadawat og dugang giya gikan sa Espiritu sa atong kinabuhi ug sa atong mga panimalay?
Unsaon nato nga mopakigbahin sa ebanghelyo sa atong mga higala ug mga silingan? (tan-awa sa Alma 17).
Unsaon nato sa pagpanalipod sa atong kaugalingon ug sa atong mga pamilya gikan sa dili angay nga media ug pornograpiya? (Tan-awa sa DP 42:22–23).
Unsay atong buhaton sa pagtabang sa pagtudlo ug pagpalig-on sa atong mga anak ug sa kabatan-onan sa atong ward?
Unsaon nato nga madugangan ang panaghiusa sa atong korum, grupo, o Relief Society? (Tan-awa sa Mosiah 18:19–22).
Unsaon nato nga mas makaapil sa buhat sa family history ug pagsimba sa templo?
Unsaon nato sa pagdapit sa tabang sa Ginoo samtang magtinguha kita og mga tubag sa atong mga pangutana ug mas lawom nga pagsabut sa ebanghelyo?
Sa unsa nga paagi nga ang mga ginikanan mas mahimong maayong mga lider sa panimalay?
Unsaon nato sa pagpalig-on sa atong mga pagpamatuod sa Ginoo ug sa Iyang ebanghelyo ug sa pagtabang sa atong mga pamilya nga mahimong self-reliant sa espirituhanong paagi?
Unsay buot ipasabut sa pagpangalagad? Giunsa nato sa pagpangalagad kadtong anaa sa atong palibut? (Tan-awa sa 1 Pedro 4:11).

Kon posible, ang mga lider mahimong mopahibalo og sayo sa mga miyembro sa hilisgutan aron sila moabut nga andam nga mohisgot niini.