Espiritwal nga Eklipse
Ni Elder Gary E. Stevenson
Sa Korum sa Napulog Duha ka mga Apostoles
Ayaw itugot nga ang mga kalinga sa kinabuhi mosalipud sa kahayag sa langit.
Sa Agosto 21 niini nga tuig, duha ka talagsaong hitabo nakadani sa atensyon sa mga tawo sa tibuok kalibutan. Ang una mao ang pagsaulog sa ika-90 nga adlawng natawhan sa atong minahal nga propeta, si Presidente Thomas S. Monson. Niana nga panahon, ako may assignment didto sa Pacific Area ug nalipay nga ang mga Santos sa Australia, Vanatau, New Zealand, ug French Polynesia wala lamang makahibalo sa iyang personal nga nindot nga hitabo, apan sila usab naglipay sa pagsaulog niini. Gibati ko ang ka swerte nga nakigbahin sa ilang mainitong mga pahayag sa hugot nga pagtuo ug gugma alang niining halangdon nga tawo. Unsa nga inspirasyon kini nga makita ang koneksyon sa mga Santos sa Ulahing mga Adlaw ngadto sa ilang propeta.
Dayag lamang, si Presidente Monson, mahunahunaon niadtong nagtinguha sa pagpanghinaut kaniya og malipayong adlawng natawhan, naghulagway unsay iyang gihunahunang nindot nga inadlawan: “Pangita og tawo kinsa anaa sa kalisud o nagsakit o nag-inusara ug pagbuhat og usa ka butang alang kanila. Kana mao ra ang akong pangayoon.”1 Kami nahigugma ug nagpaluyo kanimo, Presidente Monson.
Eklipse sa Adlaw
Ang laing talagsaon ug langitnong hitabo nahinabo sa samang adlaw ug nakadani og minilyon sa tibuok kalibutan, mao ang hingpit nga eklipse sa adlaw. Kini ang unang higayon ang mao nga eklipse mitadlas sa tibuok Estados Unidos sulod sa 99 ka tuig.2 Nakakita na ba kamo og eklipse sa adlaw? Tingali mahulagway ko kini og mas detalyado.
Mahitabo ang hingpit nga eklipse sa adlaw kon ang buwan mataliwad-an sa kalibutan ug sa adlaw, hapit masalipdan ang tanang kahayag gikan sa adlaw.3 Ang katinuod nga kini mahitabo katingalahan ngari kanako. Kon imong hunahunaon ang adlaw sama ka dako sa ordinaryong ligid sa bisikleta, ang bulan kon itandi dili gani ingon kadako sa gamay nga bato.
Sa unsa kaha nga paagi nga ang tinubdan sa atong kainit, kahayag, ug kinabuhi masalipdan og maayo sa butang nga kon itandi gamay ra gayud ang gidak-on?
Bisan og ang adlaw 400 ka pilo-pilo nga mas dako kay sa buwan, kini 400 ka pilo-pilo usab ang gilay-on gikan sa kalibutan.4 Gikan sa panglantaw sa yuta, kini nga geometry nagpakita sa adlaw ug sa bulan nga managsama ang gidak-on. Kon ang duha magtungod og maayo, ang buwan ingon og mosalipud sa tibuok adlaw. Ang mga higala ug ang akong pamilya nga nabantang sa hingpit nga eklipse mihulagway kon sa unsang paagi nga napulihan ang kahayag sa kangitngit, nakita ang mga bitoon, ug mihunong sa pag-awit ang mga langgam. Ang hangin tugnaw, kay ang temperatura sa eklipse mikunhod kapin sa 20 degrees Fahrenheit (11 degrees Celsius).5
Ilang gihulagway ang pagbati sa kahibulong, ug gani kabalaka, nasayud nga ang eklipse makahatag og mga kadaut. Hinoon, gibuhat nila ang tanang pag-amping aron malikayan ang permanenting pagkadaut sa mata o “nabuta sa eklipse” atol sa panghitabo. Kini nga kasiguroan posible tungod kay naggamit sila og mga antipara nga may espesyal nga lente nga nagpanalipod sa ilang mga mata gikan sa potensyal nga kadaut.
Ang Pag-agid-agid
Sa samang paagi nga ang gamay kaayo nga buwan makasalipod sa matahum nga adlaw, nagpalong sa kahayag ug kainit nini, usa ka espiritwal nga eklipse mahitabo kon motugot kita sa gagmay ug makasamok nga mga babag—kadtong atong giatubang sa atong inadlaw nga mga kinabuhi—nga maduol og maayo nga kini nagsalipod sa gidak-on, kasiga, ug kainit sa kahayag ni Jesukristo ug sa Iyang ebanghelyo.
Si Elder A. Maxwell mipasabut pa niini og maayo sa dihang siya mipahayag: “Bisan ang usa ka butang sama ka gamay sa kumagko sa usa ka tawo, kon ipaduol og maayo sa mata, makabuta kaniya sama gyud sa dako nga adlaw. Apan ang adlaw anaa ra gihapon. Ang pagkabuta mahitabo sa tawo pinaagi sa iyang kaugalingon mismo. Kon ipaduol nato pag-ayo ang mga butang, ipahimutang kini sa atubangan, atong gisalipdan ang atong panan-awon sa langit.”6
Klaro, nga walay usa kanato nga gustong motuyo sa pagsalipud sa atong panan-awon sa langit o motugot sa espirituhanong eklipse nga mahitabo sa atong kinabuhi. Akong ipakigbahin ninyo ang pipila ka mga hunahuna nga makatabang nato nga malikayan ang mga espiritwal nga eklipse nga makahimo kanato og espiritwal nga kadaot.
Gospel Glasses: Maintain a Gospel Perspective
Nakahinumdom ba kamo sa akong paghulagway sa espesyal nga antepara nga gamiton sa pagpanalipod niadtong nagtan-aw sa eklipse sa adlaw gikan sa pagkadaot sa mata o gani sa pagkabuta? Ang pagtan-aw sa usa ka espiritwal nga eklipse pinaagi sa makapanalipod nga lente sa Espiritu naghatag og usa ka panglantaw sa ebanghelyo, sa ingon nagpanalipod kanato gikan sa espiritwal nga pagkabuta.
Atong ikonsiderar ang pipila ka mga ehemplo. Uban sa mga pulong sa propeta diha sa atong mga kasingkasing ug ang Balaang Espiritu isip atong tigtambag, makatan-aw kita sa bahin nga gisalipdan nga langitnong kahayag pinaagi sa “mga antipara sa ebanghelyo,” malikayan ang kadaut sa espirituwal nga eklipse.
Busa unsaon nato pagsul-ob ang atong mga antipara sa ebanghelyo? Ania ang pipila ka mga ehemplo: Ang atong antipara sa ebanghelyo magpahibalo nato nga ang Ginoo gusto nga moambit kita sa sakrament matag semana ug nagtinguha Siya nga magtuon kita sa mga kasulatan ug mag-ampo matag adlaw. Nagpahibalo usab kini nato nga si Satanas motintal nato sa dili pagbuhat sa mao. Nakahibalo kita nga siya naningkamot sa pagkuha sa atong kabubut-on pinaagi sa mga kalinga ug kalibutanong mga tintasyon. Bisan sa panahon ni Job, adunay pipila kinsa nagsinati og espirituhanong eklipse, nga gihulagway isip: “Ang kadulom maoy ilang ihibalag sa maadlaw, ug sa udto magsukarap sila ingon sa magabii.”7
Mga kaigsoonan, kon mamulong ako bahin sa pagtan-aw pinaagi sa antipara sa ebanghelyo, palihug hibaloi nga wala ako magsugyot nga wala nato giila o hisguti ang mga hagit nga atong giatubang o maglakaw kita sa ka ignorante diha sa mga laang ug sa mga dautan nga gibutang sa kaaway diha sa atong atubangan. Wala ako mag-ingon nga magpakabuta—apan ang sukwahi. Nagsugyot ako nga atong tan-awon ang mga hagit pinaagi sa mga lente sa ebanghelyo. Naobserbahan ni Elder Dallin H. Oaks nga ang “panglantaw mao ang abilidad sa pagkakita sa tanang husto nga impormasyon diha sa usa ka makahuluganong relasyon.”8 Ang usa ka panglantaw sa ebanghelyo naglugway sa atong panan-aw ngadto sa mahangturong talan-awon
Kon inyong itaod ang mga antipara sa ebanghelyo, makita ninyo ang paglambo sa panglantaw, tumong, ug sa panan-awon sa paagi nga maghunahuna kamo sa inyong prayoridad, problema, tintasyon, ug gani sa inyong mga kasaypanan. Makita ninyo ang kahayag nga kamo dili makakita kon wala kini.
Dili lamang ang negatibo ang makahimo og mga espiritwal nga eklipse sa atong mga kinabuhi. Kasagaran, ang dalayegon o positibo nga mga paningkamot diin atong gihalad ang atong mga kaugalingon mahimong mapaduol og maayo nga kini magpapas sa kahayag sa ebanghelyo. Kini nga mga kakuyaw o mga kalinga maglakip sa edukasyon ug kaharuhay, gahum ug impluwensya, ambisyon, gani mga talento ug mga gasa.
Si Presidente Dieter F. Uchtdorf nagtudlo nga “bisan unsa nga hiyas kon gamiton nga manubra mahimo nga usa ka bisyo. … Moabut ang panahon diin ang mga kalampusan mahimong mga palas-anon ug mga ambisyon, mga pabug-at sa atong mga gipas-an.”9
Tuguti ako sa pagpakigbahin og mas detalyado nga mga ehemplo nga mahimong makapadasig sa atong kaugalingong mga espiritwal nga eklipse.
Social Media
Pila ka bulan ang milabay namulong ako sa Komperensya sa mga Babaye sa BYU.10 Akong gihulagway giunsa sa teknolohiya, lakip sa social media, pagpakaylap sa “kasayuran sa usa ka Manluluwas … ngadto sa matag nasud, kaliwat, pinulongan, ug katawhan.”11 Kini nga mga teknolohiya lakip ang mga website sa Simbahan sama sa LDS.org ug Mormon.org; mobile apps sama sa Gospel Library, Mormon Channel, LDS Tools, ug Family Tree; ug social media platforms, lakip sa Facebook, Instagram, Twitter, ug Pinterest. Kini nga mga sistema nakahimo og gatusan ka mga milyon sa likes, shares, views, retweets, ug pins ug nahimong epektibo kaayo ug hanas sa pagpakigbahin sa ebanghelyo ngadto sa pamilya, mga higala, ug mga kauban.
Ang tanan nga mga hiyas ug ang husto nga paggamit niini nga mga teknolohiya, adunay mga risgo nga nag-uban niini nga, kon ipaduol og maayo, makabutang kanato diha sa usa ka espiritwal nga eklipse ug may potensyal nga mosalipod sa kahayag ug kainit sa ebanghelyo.
Ang paggmit sa social media, mobile apps, ug mga dula hilabihan og makausik sa panahon ug makaminos sa inatubangay nga panagsultihanay. Kining pagkawala sa personal nga panagsultihanay makaapikto sa mga kaminyoon, mopuli sa bililhon nga mga espirituwal nga buhat, ug mopugong sa kalambuan sa sosyal nga kahanas, ilabi na sa mga kabatan-onan.
Duha ka dugang nga mga risgo kalabut sa social media mao ang pagtuo sa dili kompleto nga reyalidad ug makapaubos nga pagtandi sa kaugalingon ngadto sa uban.
Daghan (kon dili kadaghan) sa mga litrato nga gibutang diha sa social media nahilig sa pagpagpakita sa kinabuhi sa labing nindot niini—kasagaran dili katuohan. Kitang tanan nakakita og nindot nga mga larawan sa dekorasyon sa panimalay, nindot nga dapit bakasyunanan, mapahiyumong mga selfie, maayong pagkahikay nga pagkaon, ug ingon nga dili makab-ot nga mga larawan sa lawas.
Kini, pananglit, usa ka larawan nga inyo tingaling makita sa social media nga account sa usa ka tawo. Hinoon, kini dili kaayo makakuha sa tibuok hulagway sa unsa gyud ang hitabo sa tinuod nga kinabuhi.
Kon atong itandi ang atong kaugalingong sagad nga kinabuhi ngadto sa uban nga gi-edit, nga maayong pagkapahiluna, hingpit nga pagkahimo nga mga kinabuhi ingon nga girepresentar sa social media usahay kita adunay mga pagbati nga mawad-an og kadasig, masina, ug gani pagkapakyas.
Usa ka tawo kinsa mipakigbahin og daghang mga post sa iyang kaugalingon miingon, tingali tiaw-tiaw lamang og gamay, “Unsay kapuslanan nga malipay kon dili nimo kini i-post?”12
Samtang mipahinumdom si Sister Bonnie L. Oscarson nato karong buntaga, ang kalampusan sa kinabuhi dili moabut kon pila ka likes ang atong makuha o pila ka friends o sumusunod kita aduna. Hinoon, kini adunay usa ka butang nga mahimo sa pagkonektar sa makahuluganong paagi ngadto sa uban ug sa pagdugang og kahayag ngadto sa ilang mga kinabuhi.
Unta, makat-unan nato ang pagkamas tinuod, makaplagan ang daghang kahimuot, ug makasinati og minos nga pagkawalay kadasig kon giatubang ang mga hulagway nga nagpakita og gimithi nga reyalidad ug nga sa kasagaran modangat sa makaluya nga mga pagtandi.
Ang pagtandi dayag nga dili lamang timaan sa atong mga panahon apan sa milabay usab nga mga panahon. Ang Apostol Pablo mipasidaan sa mga katawhan sa iyang panahon nga “sila nga nagapakigsukdanay sa ilang masigkaugalingon, ug nagatandiay sa ilang masigkaugalingon, sila walay kabuot.”13
Sa daghang angay ug dinasig nga kagamitan sa teknolohiya, ato kining gamiton sa pagtudlo, pagdasig, ug sa pagbayaw sa atong mga kaugalingon ug sa pag-awhag sa uban nga mahimong labing maayo—kay sa gamiton kini sa pagpakita sa atong gimithi nga tinuod nga mga kaugalingon. Magtudlo usab kita ug magpakita sa matarung nga paggamit sa teknolohiya ngadto sa nagtubo nga henerasyon ug sa pagpasidaan batok sa nag-uban nga mga peligro ug makadaot nga paggamit nini. Ang pagtan-aw sa social media pinaagi sa mga lente sa ebanghelyo makapugong niini nga mahimong usa ka espiritwal nga eklipse sa atong mga kinabuhi.
Garbo
Ato karong hisgutan ang dugay na kaayong babag sa garbo. Ang garbo mao ang kaatbang sa pagkamapainubsanon, nga mao ang “pagkaandam sa pagsunod ngadto sa kabubut-on sa Ginoo.”14 Kon mapagarbuhon, hilig nato ang pagpasidungog sa atong mga kaugalingon kay sa ihatag kini ngadto sa uban, lakip ang Ginoo. Ang garbo sa kasagaran makigkompetensya; kini may purohan sa pagpaningkamot aron makaangkon og mas daghan pa ug maghunahuna nga mas maayo pa kita kay sa uban. Ang garbo sa kasagaran moresulta sa mga pagbati nga kasuko ug kasilag; makahimo kini sa usa ka tawo sa pagbaton og kasuko o sa pagpugong sa pagpasaylo. Ang garbo, hinoon, mahimo nga tunlon sa Kristohanong hiyas sa pagkamapainubsanon.
Ang mga relasyon, bisan sa suod nga pamilya ug mga minahal, ilabi na sa suod nga pamilya ug mga minahal—bisan tali sa mga bana ug mga asawa—giamuma sa pagkamapainubsanon ug gibabagan pinaagi sa garbo.
Daghang katuigan ang milabay, usa ka tagdumala sa dakong tigbaligya og minudo mitawag kanako sa pagpakigsulti mahitungod sa iyang kompaniya, nga gipalit sa usa sa mga ka kompetensya niini. Siya ug daghang ubang mga empleyado sa punoang buhatan nabalaka kaayo nga mawad-an tingali sila sa ilang trabaho. Nahibalo nga ako nakaila og maayo sa senior management sa mopalit nga kompaniya, mihangyo siya kon uyon ba ako sa pagpaila-ila kaniya ug sa paghatag og bug-at nga pasalig alang sa iyang kaugalingon, gani sa paghimo og miting alang kaniya. Niana gitapos niya sa mosunod nga pahayag: “Nahibalo ka unsay ilang gisulti? ‘Ang maaghup mamatay!’”
Nasabtan ko ang iyang komentaryo nga mas gituyo isip usa ka pahimuot. Nasabtan ko ang komedya. Apan dihay importanting baruganan nga gibati ko nga tingali sa katapusan magamit niya. Mitubag ako, “Sa tinuod, dili kana maoy ilang gisulti. Sa pagkatinuod, ang bali hinoon. ‘Ang maaghup … magapanunod sa yuta’15 mao ang ilang gisulti.”
Sa akong kasinatian sa Simbahan ingon man sa tibuok kong trabaho, ang pipila sa labing halangdon, labing epektibo nga mga tawo nga akong nailhan mao ang labing maaghup ug mapainubsanon.
Ang pagkamapainubsanon ug pagkamaaghup magkabagay. Unta atong hinumduman nga “walay madawat sa atubangan sa Dios, gawas sa maaghup ug sa mapainubsanon nga kasingkasing.”16
Nag-ampo ako nga kita maninguha sa paglikay sa espiritwal nga eklipse sa garbo pinaagi sa paggakos sa hiyas sa pagkamapainubsanon.
Panapos
Agi og panapos, ang eklipse sa adlaw maoy sa pagkatinuod usa ka talagsaong hitabo sa kinaiyahan atol diin ang kanindot, kainit, ug kahayag sa adlaw hingpit nga masalipdan pinaagi sa walay hinungdang ikatandi nga butang, naghimo og kangitngit ug katugnaw.
Usa ka susamang hitabo mahimong mausab sa espiritwal nga pagsabut, kon sa laing paagi gagmay ug walay hinungdang mga butang gitugutan sa pagduol og maayo ug pagsalipod sa kanindot, kainit, ug langitnong kahayag sa ebanghelyo ni Jesukristo, naghulip niini og bugnaw nga kangitngit.
Ang antipara nga gidesenyo sa pagpanalipod sa panan-aw niadtong anaa dapit sa eklipse sa adlaw makapugong sa permanenting kadaot ug gani sa pagkabuta.17 Ang antipara sa ebanghelyo naglangkob sa kahibalo ug pagpamatuod sa mga baruganan ug mga ordinansa sa ebanghelyo naghatag og panglantaw sa ebanghelyo nga susamang makahatag og mas dakong espiritwal nga proteksyon ug katin-aw alang sa usa ka tawo nga nabantang ngadto sa usa ka espiritwal nga eklipse.
Kon madiskubrihan ninyo ang bisan unsang butang nga ingon og misalipod sa kahayag ug hingpit nga kalipay sa inyong kinabuhi, dapiton ko kamo sa pagbutang niini sa paglantaw sa ebanghelyo Tan-aw sa mga lente sa ebanghelyo ug pagbantay nga dili motugot sa walay hinungdan ug walay katarungan nga mga butang sa kinabuhi nga mosalipod sa inyong mahangturon nga talan-awon sa talagsaong plano sa kalipay. Sa laktud, ayaw itugot nga ang mga kalinga sa kinabuhi mosalipud sa kahayag sa langit.
Pagpamatuod
Ako magpamatuod nga bisan og may nag-ali nga mahimong mosalipod sa atong panan-awon sa kahayag sa ebanghelyo, ang kahayag anaa gihapon diha. Kanang tinubdan sa kainit, kamatuoran, ug kahayag mao ang ebanghelyo ni Jesukristo. Magpamatuod ako sa usa ka mahigugmaong Langitnong Amahan; sa Iyang Anak, si Jesukristo; ug sa tahas sa Anak isip atong Manluluwas ug Manunubos. Sa pangalan ni Jesukristo, amen.