Elder Patrick Kearon

Kapangulohan sa Seventy

Samtang nagserbisyo isip Presidente sa Europe Area, si Elder Patrick Kearon nakasaksi sa panaw sa duha ka milyon ka refugee gikan sa Middle East nga nagun-ob sa gubat ngadto sa kasiguroan sa Europe. “Human ko makakita sa ilang mga mata ug makadungog sa ilang mga istorya sa kalisang nga ilang gilayasan ug sa ilang makuyaw nga biyahe aron mangita og kadangpan, natandog kaayo ko,” miingon siya. “Makadasig ang pagsaksi sa daghang nahatag sa mga miyembro sa Simbahan gikan sa tibuok kalibutan aron itabang niining mga indibidwal ug mga pamilya nga nawad-an og daghan.”

Si Elder Kearon, kinsa gipaluyohan isip General Authority Seventy niadtong Abril 3, 2010, gitawag ngadto sa Kapangulohan sa Seventy niadtong Agosto 1, 2017.

Si Elder Kearon natawo sa Carlisle, Cumberland, England, niadtong Hulyo 1961, ngadto kang Paddy ug Patricia Kearon. Ang iyang amahan nagserbisyo sa British Royal Air Force, si Elder Kearon naedukar sa Middle East ug sa United Kingdom.

Samtang nag-imbestigar sa Simbahan, nakasugat siya og kasulatan diha sa Basahon ni Mormon nga mabasa, “Ang mga tawo naingon, nga unta sila makabaton og hingpit nga kalipay” (2 Nephi 2:25). “Kadto nga kasulatan mibagting sa akong mga dunggan,” miingon si Elder Kearon. “Niadtong akong nahimamat, nakita nako sa unsang paagi nga ang among kinabuhi mapanalanginan pag-ayo pinaagi sa pagsunod sa tambag sa Manluluwas nga magmaya.” Nagpamiyembro siya sa Simbahan sa Bisperas sa Pasko sa 1987.

Iyang nahimamat si Jennifer Carole Hulme samtang nagtuon sa Brigham Young University sa England. Naminyo sila sa Oakland California Temple niadtong 1991 ug mipuyo didto sa England hangtud sa iyang pagkatawag niadtong 2010. Mga ginikanan sila sa upat ka mga anak.

Nakapuyo ug nakatrabaho siya sa United Kingdom, Saudi Arabia, ug sa Estados Unidos sa lain-laing mga industriya, apil ang health care, pagkaon, transport, ug automotive, ug midumala siya sa iyang kaugalingong communications consultancy. Ang iyang pagkalambigit sa sibiko ug komunidad naglakip sa pagserbisyo diha sa mga board of charities, eskwelahan, usa ka enterprise agency, ug usa ka kolehiyo.

Si Elder Kearon nakaserbisyo og daghang mga calling sa Simbahan, lakip ang assistant ward clerk, ward Young Men president, counselor sa bishopric, branch president, stake president, ug Area Seventy.