Bag-ong mga Paghubad sa Kasulatan

Ang mga proyekto sa bag-ong mga paghubad sa kasulatan nga giaprubahan sa milabay nga pipila ka mga tuig naglakip sa Basahon ni Mormon sa Burmese, Efik, Georgian, Navajo, Pohnpeian, Sesotho, ug Tshiluba ug ang triple combination sa mga kasulatan sa American Sign Language, Afrikaans Amharic, Arabic, Bislama, Gresyanhon, Hiligaynon, Hindi, Hmong, Lao, Lingala, Malay, Persia, Polish, Serbian, Setswana, Sinhala, Slovak, Slovenian, Tahitian, Tamil, Telugu, Tok Pisin, Turkish, Twi, Urdu, ug Yoruba.

Sa usa ka sulat nga pinetsahan og Oktubre 9, 2017, ang Unang Kapangulohan milista niini nga mga proyekto ug mipaila og bag-ong proseso nga nagtugot sa mga indibidwal sa pagtuon sa pasiuna [draft] nga mga porsyon sa paghubad sa dili pa imantala ang kinatapusan [final] nga mga paghubad.

“Samtang magpadayon ang paghubad, ang nakompleto nga mga porsyon i-release sa pasunod nga han-ay matag karon ug unya,” nag-ingon ang sulat. “Kining pasunod nga mga porsyon, bisan og dili makonsiderar nga kinatapusan [final] hangtud ang hingpit nga paghubad makompleto, maanaa sa LDS.org ug sa Gospel Library mobile application.” Ang inisyal nga pag-release sa pipila ka pinili nga mga pinulongan magsugod sa Nobyembre 30, 2017. Samtang makompleto ang mga paghubad, uban sa gikinahanglan nga mga pagribyu ug pag-aprubar, ang nag-unang gipasunod nga pag-release mapulihan sa katapusan nga mga bersyon, nga pagasundan sa giimprinta nga mga edisyon.

Ang mga proyekto sa paghubad mokabat og pipila ka tuig tungod kay ang mga teksto sa kasulatan hubaron sa mainampingong paagi. Busa, ang mga proyekto anaa karon sa managlahing ang-ang. Ang inisyal nga pag-release sa giaprubahan nga draft nga mga paghubad maglakip sa mga sulod nga gihubad ug giribyu sa lokal nga mga lider. Ang dugang nga mga porsyon sa paghubad padayon nga i-release sa matag karon ug unya. Ang mga paghubad nga karon hapit na mahuman walay draft nga imantala.

Ang Unang Kapangulohan naghangyo nga samtang ang mga proyekto sa paghubad gitrabaho pa o naghulat pa, ang mga miyembro ug mga lider “mopadayon sa paggamit sa kasamtangang mga hubad sa Mga Artikulo sa Hugot nga Pagtuo, mga pag-ampo sa sakrament, ug pag-ampo sa bunyag hangtud nga ang bag-ong paghubad makompleto.”

Ang LDS nga mga edisyon sa mga kasulatan gihubad ug anaa sa mosunod nga gidaghanon sa mga pinulongan: ang Balaan nga Biblia, 3; pinili nga dili LDS nga edisyon sa Biblia, 95; ang Basahon ni Mormon, 90; Mga pinili gikan sa Basahon ni Mormon, 21; ug ang Doktrina ug mga Pakigsaad ug ang Perlas nga Labing Bililhon, 58.