Makabaton sa Pagsalig sa Ginoo ug sa Imong Pamilya

Ni Elder Richard J. Maynes

Sa Seventy

Ang kalalakin-an nga dunay “kaligdong sa kasingkasing” mao ang kalalakin-an nga masaligan—kay ang pagsalig gipasikad sa kaligdong.

Kaigsoonan, tingali wala nay molabaw sa komplimento nga atong madawat sa Ginoo kay sa masayud nga misalig Siya kanato nga mahimong takus nga mga tighupot sa priesthood ug talagsaong mga bana ug mga amahan.

Usa ka butang nga sigurado: ang makabaton sa pagsalig sa Ginoo usa ka panalangin pinaagi sa atong talagsaong paningkamot. Ang pagsalig mao ang usa ka panalangin nga gibase sa pagkamasulundon sa mga balaod sa Dios. Ang makabaton sa pagsalig sa Ginoo moabut isip resulta sa pagkamatinuoron sa atong gihimo nga mga pakigsaad sa bunyag ug diha sa balaan nga templo. Kon atong tumanon ang atong mga saad sa Ginoo, ang iyang pagsalig nato molambo.

Ganahan ko sa karaan ug sa modernong kasulatan nga naggamit sa mga pulong “kaligdong sa kasingkasing” kon maghulagway og kinaiya sa matarung nga tawo.¹ Ang kaligdong o kulang sa kaligdong usa ka sukaranang elemento sa kinaiya sa tawo. Ang kalalakin-an nga dunay “kaligdong sa kasingkasing” mao ang kalalakin-an nga masaligan—kay ang pagsalig gipasikad sa kaligdong.

Ang tawo nga may kaligdong nagpasabut lang nga ang imong tumong, ingon man ang lihok, putli ug matarung sa tanang aspeto sa imong kinabuhi, mapubliko man o pribado. Sa matag desisyon nga atong himoon, mahimong makapadugang o makapakunhod sa pagsalig sa Dios. Kining baruganan tingali makita kaayo sa atong balaanong responsibilidad nga gihatag isip mga bana ug amahan.

Isip mga bana ug amahan, nakadawat kita og balaang sugo gikan sa modernong propeta, manalagna ug tigpadayag sa dokumento sa “Ang Pamilya: Usa ka Pamahayag ngadto sa Kalibutan.” Kining dokument nagtudlo kanato nga (1) “ang mga amahan mao ang mangulo sa ilang mga pamilya diha sa gugma ug sa pagkamatarung,” (2) ang mga amahan “may kapangakohan sa pagsangkap sa mga kinahanglanon sa kinabuhi,” ug (3) ang mga amahan responsable sa pagpanalipod sa ilang mga pamilya.²

Aron makabaton kita sa pagsalig sa Dios, kinahanglan natong matuman kining tulo ka balaanong responsibilidad sa atong mga pamilya sa pamaagi sa Ginoo. Sigun sa giingon diha sa pamahayag sa pamilya, ang pamaagi sa Ginoo mao ang pagtuman niining mga responsibilidad uban sa atong asawa “ingon nga magkauban.”³ Para nako, nagpasabut kini nga dili kita makapadayon sa bisan unsang desisyon bahin niining tulo ka responsibilidad kon walay hingpit nga panaghiusa sa atong asawa.

Ang unang lakang sa atong panimpalad sa pagbaton sa pagsalig sa Ginoo mao ang mosalig Kaniya. Si propeta Nephi mipakita niining matang sa pasalig dihang nag-ampo siya: O Ginoo, ako misalig kanimo, ug ako mosalig kanimo sa kahangturan. Ako dili mobutang sa akong pagsalig diha sa gahum sa tawo”⁴ Si Nephi hingpit nga masaligon sa pagbuhat sa kabubut-on sa Ginoo. Agig dugang sa pag-ingon nga siya “mobuhat sa mga butang nga ang Ginoo nagsugo,” si Nephi walay pagduha-duha sa iyang pasalig sa pagtuman sa iyang tahas, sumala sa gipamahayag: “Ingon nga ang Ginoo buhi, ug samtang kita buhi, kita dili mobalik ngadto sa atong amahan sa kamingawan hangtud matuman ang butang nga gisugo sa Ginoo kanato ”⁵

Tungod kay si Nephi unang misalig sa Dios, dako ang pagsalig sa Dios kang Nephi. Ang Ginoo mibubo kaniya sa Espiritu nga mipanalangin sa iyang kinabuhi, sa kinabuhi sa iyang pamilya, ug sa iyang katawhan. Tungod kay si Nephi midumala diha sa gugma ug sa katarung ug mihatag ug mipanalipod sa iyang pamilya ug katawhan, siya miingon, “Kami mipuyo subay sa matang sa pagkamalipayon”⁶

Aron ipresentar ang panlantaw sa usa ka babaye bahin niini, mihangyo ko og tabang sa akong duha ka anak nga babaye nga minyo na. Mihangyo ko kon makahatag ba sila og usa o duha ka sentence kon unsay ilang panlantaw sa kaimportante sa pagsalig ingon nga nakaapekto kini sa ilang kaminyoon ug kinabuhi sa pamilya. Ania ang mga hunahuna nilang Lara Harris ug Christina Hansen.

Una, si Lara: “Importante kaayo nako nga makahibalo nga ang akong bana mohimo sa iyang buluhaton sa adlaw, naghimo siya og mga pagpili nga nagpakita og pagrespito ug paghigugma ngari kanako. Kon makasalig kami sa usag usa niining paagiha, makahatag kini og kalinaw sa panimalay, diin ikalipay namo ang pagmatuto sa among pamilya.”

Karon ang hunahuna ni Christina: “Ang pagbaton og pagsalig sa usa ka tawo sama ra sa pagbaton og pagtuo sa usa ka tawo. Kon wala kanang pagsalig ug pagtuo, anaa ang kahadlok ug pagduhaduha. Para nako, usa sa labing dakong panalangin nga moabut tungod kay hingpit akong makasalig sa akong bana mao ang kalinaw—kalinaw sa hunahuna nga masayud nga buhaton niya ang iyang gisulti. Ang pagsalig makahatag og kalinaw, gugma, ug palibut diin ang gugma molambo.”

Sila si Lara ug Christina wala makakita unsay gisulat sa usa. Nakapaikag kaayo kini kanako nga matag usa nila naghunahuna sa panalangin sa sa kalinaw sa panimalay nga sangputanan sa pagbaton og bana nga ilang masaligan. Sama sa gihulagway sa akong mga anak, ang baruganan sa pagsalig adunay importante kaayong papel sa pagpalambo sa panimalay nga nakasentro kang Kristo.

Natagamtaman na usab nako kanang kultura nga nagdako sa usa ka panimalay nga nakasentro kang Kristo diin ang akong amahan mipasidungog sa iyang priesthood ug nakaangkon og pagsalig sa tibuok pamilya tungod “sa kaligdong sa iyang kasingkasing.”⁷ Ipaambit nako ninyo ang kasinatian sa batan-on pa ko nga nagpakita og malungtarong positibo nga epekto sa usa ka amahan nga nakasabut ug nagsunod sa baruganan sa pagsalig nga pinasikad sa kaligdong diha sa iyang pamilya.

Sa bata pa kaayo ako, ang akong amahan nagtukod og kompanya nga nag-specialize og factory automation. Kini nga negosyo nangingener, nagpabrika, ug nanginstalar og automated production lines sa tibuok kalibutan.

Dihang nag-middle-school nako, gusto sa akong amahan nga makat-on ko unsaon sa pagtrabaho. Gusto usab niya nga makat-on ko sa negosyo gikan sa ubos pataas. Ang akong unang trabaho naglakip sa pagmentinar sa nataran ug pagpamintura sa mga dapit sa pasilidad nga dili makita sa kadaghanan.

Dihang nag-high school nako, gi-promote ko sa pagtrabaho sa pagamaan. Nagsugod ko sa pagkat-on kon unsaon sa pagbasa sa mga blueprint ug mopadagan sa dagkong makinarya sa paggama og mga puthaw. Paggradwar sa highschool, nag-eskwela ko sa unibersidad ug dayon nagmisyon. Pag-uli gikan sa misyon, mibalik dayon ko sa trabaho. Nagkinahanglan ko nga makakwarta para sa galastuhan sa eskwelahan sa sunod nga tuig.

Usa ka adlaw niana human sa akong misyon, nagtrabaho ko sa factory dihang gipatawag ko sa akong amahan ngadto sa iyang opisina ug nangutana kon ganahan ba ko nga mo-uban niya sa usa ka biyahe sa negosyo sa Los Angeles. Mao kini ang unang higayon nga ang akong amahan midapit nako sa pag-uban niya sa usa ka biyahe sa negosyo. Sa pagkatinuod gitugutan ako niya nga moadto sa publiko aron motabang sa pagresentar sa kompanya.

Sa wala pa kami mobiyahe, giandaman ko niya og pipila ka mga detalye bahin niining potensyal nga bag-ong kliyente. Una, ang kliyente usa ka multinational nga korporasyon. Ikaduha, nag-upgrade sila sa ilang produksyon sa tibuok kalibutan uban sa labing bag-ong automation technology. Ikatulo, ang among kompanya wala pa sukad maka-supply nila og mga engineering services o sa teknolohiya. Ug katapusan, ang ilang labaw nga tigdumalang opisyal sa pagpamalit mipatawag niining miting aron sa pagribyu sa among quotation sa usa ka bag-ong proyekto. Kining miting nagpakita og usa ka bag-o ug potensyal nga oportunidad alang sa among kompanya.

Pag-abut sa Los Angeles, ang akong amahan ug ako miadto sa hotel sa executive para sa miting. Ang unang han-ay sa panaghisgutan mao ang paghisgut ug pag-analisar sa mga engineering design specification sa proyekto. Ang sunod item nga gihisgutan kalabut sa mga detalye sa pagpadagan, lakip ang mga lohistika ug mga petsa sa pagdeliber. Ang panapos nga item sa agenda gitutokan ang pagpresyo, mga termino, ug mga kondisyon. Dinhi na nahimong kulba hinam ang mga butang.

Kining opisyal sa korporasyon mipasabot ngari kanamo nga ang among gitanyag nga presyo mao ang kinaubsan sa mga misumiter og mga bid sa proyekto. Unya siya, nakuryuso, gisultihan kami niya sa presyo sa sunod nga kinaubsan nga bid. Unya nangutana siya kanamo kon andam ba kami nga usbon ang among gitanyag ug mosumiter niini pag-usab. Mipahayag siya nga ang bag-o namong presyo kinahanglan mopuhal lang og gamay sa sunod nga kinatas-an nga bid. Mipasabut dayon siya nga among tungaon og 50-50 ang bag-ong gipatong nga dolyares. Mirason siya pinaagi sa pag-ingon nga modaug ang tanan. Modaug among kompaniya kay mokita og mas dakong kwarta kay sa orihinal nga bid nga gihatag. Modaug ang iyang kompaniya kay nakigsabut gihapon sila sa labing ubos nga tig-bid [bidder]. Ug, dayag lang, modaug siya kay makakuha siya og dakong bahin kay maayo kaayo siya nga nakigsabut.

Gihatag dayon niya namo ang numero sa post office box kon asa ipadala ang kwart nga iyang gipangayo. Human niining tanan, mitan-aw siya sa akong amahan ug nangutana, “Unya, may kasabutan naba kita?” Nakuyawan kaayo ko nga, mitindog ang akong amahan, milamano sa iyang kamot, ug miingon ngadto kaniya, balikan ka namo.

Pagbiya na sa miting, misakay kami sa giabangan nga sakyanan, ug ang akong amahan miatubang nako ug nangutana, “Unya, unsay imong hunahuna nga atong buhaton?”

Miingon ako nga sa akong hunahuna dili kita modawat niini nga tanyag.

Nangutana dayon ang akong amahan, “Nakahunahuna ka ba nga duna tay responsibilidad sa tanan natong trabahante sa pagmentinar og usa ka maayong subay sa kantidad sa atong trabaho?”

Samtang namalandong ko sa iyang pangutana, ug sa wala pa ko motubag, gitubag niya ang iyang pangutana. Miingon siya, “Paminaw, Rick, sa higayon nga dawaton nimo ang suburno o ikompromiso ang imong kaligdong, lisud na kaayo kining makuha og balik. Ayaw gayud kini buhat, bisan kausa.”

Sa ngan nga mipaambit ako niining kasinatian nagpasabut nga wala gayud nako hikalimti unsay gitudlo sa akong amahan ngari kanako nianang unang biyahi sa negosyo uban niya. Akong gipaambit kining kasinatian sa paghulagway sa malungtarong impluwensya nga atong maangkon isip mga amahan. Mahunahunaan ninyo ang akong pagsalig sa akong amahan tungod sa kaligdong sa iyang kasingkasing. Gisunod niya kining samang baruganan sa iyang pribado nga kinabuhi uban sa akong inahan, sa iyang mga anak, ug sa tanan niyang gikauban.

Kaigsoonan, nag-ampo ako karong gabhiuna nga unta unahon nato ang pagsalig sa Ginoo, sama sa gipakita ni Nephi, ug dayon, pinaagi sa kaligdong sa atong mga kasingkasing makaangkon sa pagsalig sa Ginoo, ingon man ang pagsalig sa atong mga asawa ug mga anak. Kon atong sabton ug gamiton kining sagradong baruganan sa pagsalig nga pinasikad sa kaligdong, kita magmatinuoron sa atong sagrado nga mga pakigsaad. Magmalampuson usab kita sa pagdumala sa atong mga pamilya uban sa gugma ug katarung, sa pagsangkap sa mga panginahanglan sa kinabuhi, ug sa pagpanalipod sa atong pamilya gikan sa kadautan sa kalibutan. Niining mga kamatuoran mapaubsanon kong mopamatuod sa pangalan ni Jesukristo, amen.