Unsa Ang Kalainan?

Niining ulahing mga adlaw, ang Dios mipahiuli sa priesthood ug miorganisar sa mga korum sa priesthood ug sa Relief Society sa pagtabang sa pagtuman sa Iyang buhat (tan-awa sa Moises 1:39). Mao nga sa matag Dominggo kon magpundok ta diha sa mga miting sa Melchizedek Priesthood ug Relief Society, magpundok ta aron maghisgot ug magplano unsaon nato sa pagtuman sa Iyang buhat. Mao nga kini nga mga miting gikinahanglan kaayo kay sa mga klase. Mga oportunidad usab kini sa pagtinambagay bahin sa buhat sa kaluwasan, magkat-on gikan sa mga pagtulun-an sa mga lider sa Simbahan bahin niana nga buhat, ug mag-organisar sa pagtuman niini. Kini nga mga kausaban sa atong mga miting sa Dominggo makatabang nato sa pagtuman niini nga mga katuyoan.

Usa ka Binulan nga Iskedyul

Ang mga miting sa Dominggo alang sa Melchizedek Priesthood ug Relief Society magsunod niining binulan nga iskedyul:

Semana	Katuyoan
Unang Dominggo	Magtinambagay bahin sa lokal nga mga responsibilidad, mga oportunidad, ug mga hagit ug maghimo og mga plano sa pagbuhat niini
Ikaduha ug Ikatulong Dominggo	Magtuon sa bag-ong mga mensahe sa kinatibuk-ang komperensya nga gipili sa kapangulohan o mga lider sa grupo o, usahay sa bishop o presidente sa stake
Ikaupat nga Dominggo	Maghisgot og espesyal nga hilisgutan nga gipili sa Unang Kapangulohan ug sa Korum sa Napulog Duha ka mga Apostoles
Ikalimang Dominggo	Maghisgot og hilisgutan nga gipili sa bishopric

Usa ka Sumbanan alang sa Atong mga Miting

Sa matag miting sa atong Melchizedek Priesthood ug Relief Society, magsunod kita og sumbanan sa pagtuman sa buhat sa Dios.

Magpakigbahin og mga kasinatian resulta gikan sa mga impresyon ug mga imbitasyon nga nadawat gikan sa nangaging mga miting sa priesthood o Relief Society (gipangulohan sa kapangulohan o lider sa grupo).
Magtinambagay (unang Dominggo, gipangulohan sa kapangulohan o sakop sa grupo) o magkat-on og dungan (ikaduha, ikatulo, ug ikaupat nga mga Dominggo, gipangulohan sa gitawag nga magtutudlo).
Magplano sa pagbuhat isip usa ka grupo o isip mga indibidwal (gipangulohan sa kapangulohan o sakop sa grupo).