Mga Miting sa Ikaupat nga Dominggo
Sa ikaupat nga Dominggo sa matag bulan ang mga korum, mga grupo, ug mga Relief Society maghisgot og hilisgutan nga gipili sa Unang Kapangulohan ug sa Korum sa Napulog Duha ka mga Apostoles. Kini nga mga hilisgutan bag-uhon kada kinatibuk-ang komperensya. Ang hilisgutan hangtud sa sunod nga kinatibuk-ang komperensya mao ang Igpapahulay nga adlaw. Ang mga lider o mga magtutudlo mahimong mopili gikan sa mga doktrina ug sa mga kalihokan sa pagkat-on nga gisugyot sa ubos, tipuna ang pipila niini, o maghimo sa ilang kaugalingon sumala sa mga panginahanglan sa mga miyembro.
Ang Igpapahulay mao ang adlaw sa paghinumdom unsay nabuhat sa Dios kanato.
Sa tibuok kasaysayan, ang Dios miapil sa dagkong mga buhat uban sa Igpapahulay. Kining dagko nga mga buhat naglakip sa Paglalang (tan-awa sa Genesis 2:1–3), ang exodo sa mga anak ni Israel gikan sa Ehipto (tan-awa sa Deuteronomio 5:15), ug sa Pagkabanhaw sa Manluluwas (tan-awa sa Juan 20:1–19; Mga Buhat 20:7). Dapita ang mga miyembro sa pagribyu niini nga mga tudling ug paghisgot kon sa unsa nga paagi nga ang paghinumdom niini nga mga hitabo makatabang nato nga motahud sa adlaw nga Igpapahulay. Unsa ang pipila ka dagko nga mga buhat nga nahimo sa Dios kanato? Unsaon nato sa paghinumdom kining mga butanga sa adlaw nga Igpapahulay? Kon mahimo, dapita ang mga miyembro sa paghisgot sa mga pangutana nga sama niini sa ilang mga pamilya.
Si Jesukristo mao ang Ginoo sa Igpapahulay.
Ang Igpapahulay gitawag usab og ang adlaw sa Ginoo (tan-awa sa Pinadayag 1:10). Ngano sa inyong hunahuna nga si Jesukristo gitawag nga ang Ginoo sa Igpapahulay? (tan-awa sa Mateo 12:8). Ribyuha ang pipila ka mga bersikulo nga makatabang sa pagdasig sa mga miyembro sa paghunahuna og mga paagi sa pagsentro sa ilang mga kasinatian sa adlaw nga Igpapahulay diha kang Jesukristo (pananglit, Helaman 5:12; Ether 12:41; Moroni 10:32; ug DP 6:36–37). Unsa ang ubang mga bersikulo nga mahimong ipakigbahin sa mga miyembro nga makatabang kanila sa paghimo sa Igpapahulay nga mas masentro ni Kristo? Unsa nga mga tumong ang atong mahimo sa pagtabang nato nga maka-focus sa Manluluwas sa tibuok adlaw nga Igpapahulay?
Si Jesukristo mao ang atong ehemplo sa pagtahud sa Igpapahulay.
Atol sa Iyang mortal nga pangalagad, ang Manluluwas mipahimulos sa mga oportunidad sa pagtudlo bahin sa adlaw nga Igpapahulay. Hangyoa ang mga miyembro sa pagbasa sa mosunod nga mga istorya ug paghimo og lista sa mga butang nga gihimo ni Jesus sa Igpapahulay ug sa mga baruganan nga Iyang gitudlo: Lucas 6:1–11; 13:11–17; Juan 5:1–20; 9:1–16. Unsa pa ang ubang mga baruganan bahin sa Igpapahulay ang atong makat-unan gikan sa mosunod nga mga bersikulo? Exodo 20:8–11; 31:12–18; Isaias 58:13–14; ug DP 59:9–19. Dapita ang mga miyembro sa pagpakigbahin unsay ilang mabuhat sa pagsunod sa ehemplo sa Manluluwas.
Tan-awa usab sa Russell M. Nelson, “Ang Igpapahulay usa ka Kahimut-an,” Ensign o Liahona, Mayo 2015, 129–32.
Ang Igpapahulay mao ang adlaw sa pagsimba.
Isulat ang pulong pagsimba diha sa pisara ug hangyoa ang mga sakop sa klase sa pagsulat sa mga pulong nga may kalabutan tupad niini. Dayon paghimo og tulo ka mga kolum nga dunay mga pulong nga sa wala pa, atol, ug human sa ibabaw sa matag kulom. Unsay atong mahimo sa wala pa, atol, ug human sa pagsimba sa Ginoo sa Iyang balaan nga adlaw? Ang mga sakop sa klase mobasa pagdungan sa Mosiah 18:17–29 ug Moroni 6 alang sa mga ideya. Dapita ang mga miyembro sa pagpamalandong sa unsa nga paagi nga ang ilang mga kinaiya ug mga aksyon sa adlaw ng Igpapahulay makatabang nila sa pagsimba sa Ginoo nianang adlawa (tan-awa sa Exodo 31:16–17). Unsay atong mahimo sa pagtabang nga molambo ang kasinatian sa pagsimba sa atong mga pamilya ug sa mga miyembro sa ward atol sa mga miting sa Simbahan?
Ang pag-ambit sa sakrament makatugot nato nga makabaton sa Espiritu kanunay.
Isulat ang mosunod nga pangutana diha sa pisara: Sa unsa nga paagi nga ang sakrament makaapekto sa inyong kinabuhi? Sa pagtubag niini nga pangutana, dapita ang mga miyembro nga magparis-paris sa pagpili ug paghisgot sa mga pulong gikan sa mga pag-ampo sa sakrament sa Doktrina ug mga Pakigsaad 20:77, 79 ug sa tambag sa Doktrina ug mga Pakigsaad 59:9. Hatagi og panahon ang matag parisan sa pagpangita sa mga kasulatan nga makatabang nila nga mas makasabut sa ilang mga pulong ug sa paghisgot unsaon nila sa pagtubag ang pangutana sa pisara. Mahimo usab nga imong dapiton ang mga sakop sa klase sa pagpili og paborito nga mga himno sa sakrament ug kantahon kini nila pagdungan.
Tan-awa usab sa Cheryl A. Esplin, “Ang Sakrament—Pagbag-o sa Kalag,” Ensign o Liahona, Nob. 2014, 12–14.
Ang Igpapahulay mao ang adlaw sa pagserbisyo sa uban.
Unsay atong makat-unan bahin sa pagserbisyo sa uban sa Igpapahulay gikan sa mga pamaagi sa Manluluwas nga miserbisyo ug mipanalangin niadtong anaa sa Iyang palibut? Awhaga ang mga miyembro sa pagribyu ug paghisgot sa Mateo 9:10–13; Lucas 19:1–9; Juan 11:32–46; 13:1–5, 12–17; ug 3 Nephi 17:5–10. Hangyoa ang mga miyembro sa paghunahuna niini nga mga kasulatan sa ilang pagkonsiderar unsaon nila nga makaserbisyo sa Igpapahulay. Pananglitan, makaserbisyo sila sa mga miyembro sa pamilya, pagtabang sa mga indibidwal ug mga pamilya nga ilang gialagaran isip mga home ug visiting teacher, motrabaho sa family history, mobisita sa masakiton, o mopakigbahin sa ebanghelyo. Tingali ang mga miyembro maghimo og family council sa pagplano og mga paagi nga sila makaserbisyo sa uban sa Igpapahulay.