Loto-toʻa pea Vahevahe!
Fai ʻe ʻEletā Paul B. Pieper
ʻO e Kau Fitungofulú
Kuo nofo homau fāmilí ʻi ha ngaahi feituʻu lahi ʻi he māmaní Kuo mau feʻiloaki mo ha kakai kehekehe tokolahi pea maʻu mo ha ngaahi faingamālie lahi ke vahevahe e ongoongoleleí. Kuo faitāpuekina ʻe heʻema fānaú ha niʻihi kehe ʻaki e vahevahe ʻo ʻenau fakamoʻoní.
ʻI he kei iiki ʻema fānaú, ne mau nofo ʻi he fonua ko Kasakisitaní. Ne ʻikai ʻi ai ha kau faifekau ʻi ai ʻi he taimi ko iá. ʻI he taimi ne fie fanongo ai ha ngaahi kaungāmeʻa pe kaungāʻapi ki he ongoongoleleí, ne pau ke mau hoko ko e kau faifekau!
Ne vahevahe ʻe heʻema ʻōfefine ko Mainé e ongoongoleleí mo hono kaungāmeʻa ko ʻAlioná. Ne fili ʻa ʻAliona ke papitaiso hili hono fakangofua ʻe heʻene faʻeé, ʻa ia ne papitaiso ki mui ange mo e tokoua siʻisiʻi ʻo ʻAlioná. Ki mui ni mai ne toki mali ʻa ʻAliona mo ha talavou angatonu ʻi he temipale Meniheiteni Niu ʻIoké, pea ne pau ke ʻi ai ʻa Maine! Naʻá ne fiefia ʻi heʻene tokonia hono kaungāmeʻá ke ako fekauʻaki mo Sīsū Kalaisi.
ʻI he taimi ne mau nofo ai ʻi Visinia, USA ne ʻi he Palaimelí homa foha ko Kulisí. Ne kamata ke talanoa ʻa e taha ʻo e ngaahi kaungāmeʻa ʻa Kulisí mo hono fāmilí ki he ongo faifekaú. Ne tokoni ʻa Kulisi ke akoʻi e fāmilí. Naʻá ne teuteu kimuʻa ʻi he lēsoni takitaha pea tokoni hono tali ʻenau ngaahi fehuʻí. Ne fili ʻa e fāmilí ke nau papitaiso. Hili iá, ne ʻikai ke toe hohaʻa ʻa Kulisi pe te ne malava ke ngāue fakafaifekau. Naʻá ne ʻilo te ne lavaʻi ia!
Ko ha taimi ʻe taha ne haʻu ai ha tangata ke ngāue ʻi homa falé. Ne fakamālō ange hoku hoá ʻi he ʻosi ʻene ngāué. Naʻá ne pehē ange, “ʻOkú ma fie ʻoatu ha meʻaʻofa.” Naʻá ne foaki ange ha tatau ʻo e Tohi ʻa Molomoná.
Ne kamata ke ʻita e tangatá. Ne ʻikai mahino ki ai e meʻa ʻoku tau tui ki aí. Naʻe fakakaukau ia ʻoku ʻikai ke tau tui kia Sīsū Kalaisi.
Ne loto-toʻa ʻa Kulisi peá ne vahevahe ʻene fakamoʻoní mo e tangatá. Ne pehē ange ʻe Kulisi ko iá ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻá ne pehē ange ʻokú ne tui kia Sīsū.
ʻOku tokolahi ha fānau ʻo e Tamai Hēvaní ʻoku ʻikai ke nau ʻilo ki he ongoongoleleí. ʻOku ʻikai fakatokangaʻi ʻe ha niʻihi ʻoku tau tui kia Sīsū. ʻOku fie maʻu ʻe he kakai ko ʻení ha taha ʻe angaʻofa pea talanoa kiate kinautolu. ʻE lava ke tau loto-toʻa mo vahevahe ʻetau fakamoʻoní. Te tau lava ʻo tokonia e niʻihi kehé ke nau ako fekauʻaki mo Sīsū Kalaisi!