Ngaahi Fehuʻi mo e Tali

“Naʻá ku lotua ha faʻahinga meʻa mahuʻinga, ka ʻoku ʻikai ke u ʻiloʻi pe kuó u mau ha tali. Te u ʻiloʻi fēfē ia?”

Kuo fakamatalaʻi ko ha founga e maʻu ko ia ha tali ki he ngaahi lotú: ko hono ʻuluakí ke ke fakakaukauʻi e fehuʻí; peá ke fehuʻi ki he ʻOtuá pe ʻoku tonu hoʻo talí. Kapau ʻoku tonu ho talí, ko e ʻEikí te ne “lea ʻaki ʻa e fiemālie ki hoʻo ʻatamaí” (T&F 6:23).

Ka ʻoku fēfē kapau he ʻikai te ke ongoʻi ha ongo lōmekina ʻo e fiemālié? Pe ʻe fēfē kapau te ke ongoʻi ʻokú ke maʻu ha tali, ka ʻoku ʻikai ke ke fakapapauʻi pe ko koe pe ko e Laumālie Māʻoniʻoní ia?

Fakatatau kia ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá: “Ko e taimi lahi ʻoku ʻomi fakakongokonga e fakahaá ʻo fakatatau ki heʻetau fakaʻamú, moʻui tāú, mo e mateuteú.”¹ ʻOku ʻikai ʻomi fakafokifā ia; ko e taimi lahi ʻoku maʻu ia ʻi he “ʻotu lea ki he ʻotu lea, ʻa e akonaki ki he akonaki” (2 Nīfai 28:30), pea ko e taimi lahi kuo pau ke ke ʻunu ki ha tafaʻaki ʻe taha kimuʻa peá ke ongoʻi kuó ke maʻu ha tali kakato. Ko e taimi ʻe niʻihi ʻe ʻikai te ke maʻu ha tali—ko e taimi ia ʻoku fie maʻu ai ke fai pē ia ʻi he tui ʻe tali mai ʻe he ʻOtuá ʻi he taimi totonu.

Kapau ʻokú ke hohaʻa pe ko hoʻo talí ne haʻu ia meiate koe pe mei he Laumālie Māʻoniʻoní, manatu ko e tali lelei tahá te ne “fakaafeʻi mo poupouʻi [koe] ke failelei, mo ʻofa ki he ʻOtuá, pea tauhi kiate ia” (Molonai 7:13).

Maʻuʻanga Fakamatalá

1. David A. Bednar, “Ko e Laumālie ʻo e Fakahaá,” konifelenisi lahi ʻo ʻEpeleli 2011.

Fili pea Talitali ki he Laumālié

ʻI ha faʻahitaʻu māfana ʻe taha ne u ongoʻi kuo ʻikai tuku mai ʻe he ʻEikí ha tali ki ha fili mahuʻinga. Ne u lotu ʻi he loto-fakatōkilalo he ʻaho kotoa ke ʻilo ʻEne finangalo moʻokú, pea ne u fakahoko kiate Ia ʻa e meʻa ʻoku ou loto ke faí. Ne u fai ʻeku filí, neongo ne ʻikai maʻu ha tali mahino. Ne u ongoʻi he taimi pē ko iá ʻa e fakamoʻoni mai ʻa e Laumālié te u tupulaki ʻi he fili ne u faí pea hoko lahi ange ʻo hangē ko ʻeku Tamai ʻi Hēvaní. ʻI he taimi ʻe niʻihi ʻe fie maʻu ke tau ngāue ke maʻu ha tali—ʻoku fakaʻapaʻapaʻi ʻe he Tamai Hēvaní ʻetau filí mo ʻetau ngaahi holi angatonú. Kapau ʻoku tau moʻui taau, ʻe tataki kitautolu ʻe Hono Laumālié koeʻuhí ʻe fakafenāpasi ia mo Hono finangaló.

Amanda H., taʻu 16, ʻIutā, USA

Faʻa Kātaki pea Matapoto

Ne ʻikai fuʻu fuoloa mei heni, ne u fai ha tukupā ke u lotua ha ngaahi faingamālie ke tokoni. Ne u fakakaukau ki ha ngaahi founga ke tokoni ai ki he niʻihi kehé, ka naʻe ʻikai ke u tui ne u maʻu ha ueʻi. Ne kamata ke u lotosiʻi, ka naʻe vahevahe mai ʻe heʻeku faʻeé ʻa e ʻAlamā 5:40: “ʻIlonga ha meʻa ʻoku lelei ʻoku tupu ia mei he ʻOtuá.” Ne u fakatokangaʻi ko e ngaahi fakakaukau ʻo e ngāue tokoni ne u maʻú ko ha ngaahi ueʻi ia mei he Laumālie Māʻoniʻoní. ʻOku ou ʻilo ʻoku tali maʻu pē ʻetau ngaahi lotú; ʻoku fie maʻu ke tau faʻakātaki, matapoto, pea falala ki he ʻEikí.

Lybee B., taʻu 16, ʻOlikoni, USA

Lotua ha Tokoni

Kuó u lotu mo maʻu ha tali ki ha ngaahi meʻa lahi, ka ko e ngaahi meʻa ʻoku hā makehé ʻa e ngaahi lotu fekauʻaki mo e ngaahi meʻa fakaakó. Kimuʻa pea fai ha sivi, te u lotu ke u nonga pea malava ke u manatua e ngaahi meʻa ne u akó. Ko e taimi lahi te u manatuʻi ha palakalafi kakato ʻe taha ʻo ha fakamatala ʻoku ou ʻiloʻi ne ʻikai mei malava ke u manatuʻi ia ka naʻe taʻeʻoua ʻEne tokoní. Kuó Ne faitāpuekina moʻoni ʻeku moʻuí, pea ʻoku ou mahuʻingaʻia ʻi he mālohi ʻo e lotú pea mo ʻEne tākiekina ʻoku ou ongoʻi ʻoku fakafou mai aí.

Emily B., taʻu 18, Kuinisilani, ʻAositelēlia

ʻAhiʻahiʻi Ia pea Sio!

Ko e taimi ʻe niʻihi ʻoku fie maʻu ʻe he ʻEikí ke tau tomuʻa ngāueʻi ʻetau tuí kimuʻa pea tau toki maʻu ha tali kakato. ʻOkú ke fie ʻilo nai pe ko e Lea ʻa e Potó ko ha fekau moʻoni ia ʻa e ʻOtuá? Pea moʻui ʻaki ia! ʻOkú ke fie ʻilo nai pe ʻoku moʻoni e Tohi ʻa Molomona? Lau ia! Falala ki he talaʻofa ʻi he Sione 7:17: “Pea ko ia ia ʻe fai ki hono finangaló, te ne ʻilo ʻa e akonakí, pe ʻoku ʻi he ʻOtuá ia pe ko ʻeku lea ʻiate au pē.”

Pelesitoni O., taʻu 19, ʻIutā, USA

Falala ki he Laumālié

ʻI he taimi te ke ako ai ke falala ki he Laumālie Māʻoniʻoní mo fakatupulaki hoʻo malava ko ia ke ʻiloʻi e founga ʻoku tali atu ai ʻe he Tamai Hēvaní kiate koé, te ke fakatokangaʻi e faingofua e malava ko ia ke ke fetuʻutaki mo e Laumālié. ʻOku vanavanaiki mai ʻa e ueʻi ʻo Hono leʻó pea kapau te tau femouʻekina ʻi he ngaahi meʻa ʻo e māmaní, he ʻikai ke tau fakatokangaʻi e vanavanaiki ʻo e fanafana mo e ngaahi ongo ʻoku haʻu mei ʻolungá. Ka ʻo kapau ʻoku tau moʻui ʻi he founga totonú, te tau maʻu maʻu pē e talaʻofa ko ia te tau ʻilo ʻi hotau lotó ʻa e meʻa ʻoku lea mai ʻaki ʻe he Laumālié ko ha tali ia ki heʻetau ngaahi fie maʻú.

Sisitā Lipailo, taʻu 24, Misiona Poloto ʻAlikali Tonga Palāsilá

ʻI he mālohi ʻo Kalaisí

Naʻá ku sio ʻi he fakamafola Mata ki he Mata ʻa ʻEletā Lasipeni mo Sisitā ʻOsikasoní ʻi hono ʻeke ʻe ha talavou e fehuʻi tatau pē ko ʻení ʻo kau ki hono maʻu ko ia ʻo ha tali. Ne lau ʻe Sisitā ʻOsikasoni mei he Molonai 7:16, “ʻOku ʻomai ia ʻi he mālohi mo e foaki ʻa Kalaisí … te mou faʻa ʻiloʻi ai ʻi ha ʻilo haohaoa ʻoku tupu ia mei he ʻOtuá.” ʻOku fakahā mai ʻe he folofola ko iá te tau lava ʻo ʻiloʻi maʻatautolu ʻi ha ʻilo haohaoa e finangalo ʻo e ʻOtuá moʻotautolú. Fakaongoongo ki he Laumālié pea te ke ʻilo ʻa e talí.

Sala S., taʻu17, Sanita Katalina, Palāsila

ʻOku fakataumuʻa ʻa e ngaahi talí ko ha tokoni mo ha fakakaukau, ka ʻoku ʻikai ko hano fakahaaʻi ʻo ha tokāteline ʻo e Siasí.

ʻOku maʻu Fakakongakonga e Fakahaá

“ʻI heʻetau fekumi ki ha ueʻi fakalaumālie ke tokoni ʻi hono fai ha fili, ʻoku ʻomi ʻe he ʻEikí ha ngaahi ueʻi ongo vaivai. ʻOku fie maʻu ai ke tau fakakaukau, ke ngāueʻi e tui, ngāue, pea fāifeinga he taimi ʻe niʻihi, pea fakahoko ia. ʻOku tātātaha pē hono maʻu ha tali kakato ki ha meʻa mahuʻinga fau pe palopalema faingataʻa he taimi pē ko iá. Ko e taimi lahi, ʻoku hoko fakakongokonga mai ia, ʻo ʻikai ʻilo e olá.”

ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá, “Learning to Recognize Answers to Prayer,” Oct. 1989 general conference.

Fehuʻi Ka Hokó

“ʻOku ou ongoʻi ʻi he taimi ʻe niʻihi ʻoku ʻikai ke u taau ke ʻofeina au ʻe he Fakamoʻuí. Te u ikunaʻi fēfē e ongo ko ʻení pea fakatokangaʻi hoku mahuʻingá?”

ʻOmai hoʻo talí, pea kapau te ke loto ki ai, mo ha laʻi tā ʻata lelei kimuʻa he ʻAho 15 ʻo Sanuali, 2018, ki he liahona.lds.org (lomiʻi ʻa e “Submit an Article”).

ʻE lava ke ʻētitaʻi ʻa e ngaahi talí koeʻuhí ke lōloa feʻunga pe mahino.