Ko e Fakaafe ki he Efiafi Kimuʻa he Kilisimasí
ʻOku nofo ʻa e tokotaha naʻá ne faʻú ʻi ʻAitahō, USA.
Ko e pō lelei taha maʻu pē ia ʻi he taʻú. Ka ko ʻeni ʻe maumauʻi ia!
“Hivaʻi e ngaahi hiva ʻo e Kilisimasí: ʻAi ke ʻilo ʻe hoʻo kaungāʻapí ʻokú ke tokanga ange” (Children’s Songbook, 51).
Ne saiʻia ʻa Kelela ʻi he ngaahi tukufakaholo ʻa hono fāmilí ʻi he Efiafi Kimuʻa ʻi he Kilisimasí. Ne nau kamataʻaki e meʻatokoni efiafí ʻaki ha ika ne taʻo pea fakaneifua ʻaki ha pisikete Kilisimasi. Pea nau ʻaʻahi leva ki he māketi Kilisimasí. ʻI heʻenau aʻu ki ʻapí, ne nau lau fakataha e talanoa ʻo e Kilisimasí mei he Tohi Tapú. Kimuʻa pea nau mohé ko e fuofua taimi ia ke fakaulo ai ʻenau fuʻu ʻakau Kilisimasí pea takitaha fakaava ʻenau meʻaʻofa ʻe taha. Ko e pō lelei taha ʻeni ʻo e taʻú kia Kelela. Ne ʻikai ke kei lava ʻo tatali!
Ka naʻe fakahoko ʻe Mami ha fanongonongo.
“ʻOku ʻi ai haʻatau fakaafe makehe ki he Efiafi Kimuʻa ʻi he Kilisimasi ʻi he taʻu ní. Manatuʻi ʻa Misi Laina?”
Ne ngulungulu ʻa Kelela. “ʻA e kaungāʻapi ne fakaafeʻi ʻe Teti ki he lotú ʻi he uike kuo ʻosi?”
“Ko ia. ʻOku ʻalu ʻa Teti ke ʻomi ia ʻi he taimí ni.”
Ne tō tangutu hifo ʻa Kelela ki ha sea. ʻE fēfē haʻá ne mālōlō mo fiefia ʻo ka ʻi ai ha taha kehe? Kuo maumauʻi e Efiafi Kimuʻa ʻi he Kilisimasí! Ne ʻikai ke haʻu ʻa Misi Laina ki he lotú ʻi hono fakaafeʻi ia ʻe Tetí. Mahalo pē he ʻikai lava mai ki heni foki.
Ka ʻi he hū mai ʻa Teti ʻi he matapaá, ne hū fakataha mai mo e “fakaafe makehé”. Ne fofonga helaʻia mo ngali loto-mamahi ʻa Misi Laina. Ne fakafeʻiloaki atu ʻa Kelela. Ka naʻe ʻikai ke ne toe fie lea ʻaki ha meʻa kehe. Naʻe tukutaha ʻene tokanga he maʻu meʻatokoní ki heʻene meʻakaí lolotonga e talanoa ʻa Mami mo Teti kia Misi Lainá.
“Kuó ke ʻosi toʻo nai ha kalasi tauʻolunga?” ko e fehuʻi ia ʻo ha leʻo vaivai. Ne vakai atu ʻa Kelela ne talitali mai ʻa Misi Laina pe ko e hā ʻene talí. Naʻá ne kamokamo pē mo punou ʻo sio ki lalo ki heʻene peletí.
Naʻe pehē ange ʻe Misi Laina, “Mo au pē foki,” mo kei vaivai pē hono leʻó. “Ko e hā e faʻahinga tauʻolunga ʻokú ke saiʻia taha ai?”
Ne fakamahiki ʻe Kelela hono umá mo tekeʻi holo e vesitapolo ʻi heʻene peletí.
Naʻe pehē ange ʻe Misi Laina, “ʻOku ou saiʻia au ʻi he pāleí.” “Naʻá ku kau ki ha timi tauʻolunga ʻi he ʻunivēsití. Ne mau folau takai ʻi ʻIulope ʻi ha taʻu ʻe taha. Naʻe fakaʻofoʻofa ʻaupito.”
Ne sio hake ʻa Kelela. Naʻe ongo fakaʻofoʻofa ʻaupito ia.
Ne fehuʻi ange ʻe Kelela, “Ko e hā mo ha toe meʻa ʻokú ke saiʻia ai?”
Naʻe kiʻi malimali ʻa Misi Laina. “Tā e pianó. Mo e fiká.”
Ne fakaofoofo ʻa Kelela. “Moʻoni? Ko e fiká ʻa e lēsoni ʻoku ou manako taha aí!”
Ne talanoa ʻa Kelela kia Misi Laina ʻi he toenga ʻo e maʻu meʻatokoni efiafí. Naʻá ne ʻilo ai ʻoku ʻi ai ha mataʻitohi ʻa Misi Laina ʻi he fiká pea naʻe ako ke hoko ko ha palōfesa fika ʻi heʻene fetaulaki mo hono husepānití. Naʻá ne fai ha ngaahi fili taʻefakapotopoto pea ʻoku lolotonga ʻi he pilīsoné.
Hili e maʻu meʻatokoni efiafí ne nofomaʻu ʻa Kelela ʻi he tafaʻaki ʻo Misi Lainá ʻi heʻenau lue takai ʻi he māketi Kilisimasí. Pea ʻi heʻenau lau e talanoa ʻo e Kilisimasí, naʻá ne vahevahe ʻene folofolá mo Misi Laina kae lava ke ne muimuiʻi ʻenau laú.
Ne ofi mai e taimi ke fakaava ai e ngaahi meʻaʻofá. Ne maʻu ʻe Kelela ha vala mohe māfana lanu vāleti. Ne ʻikai ke ne kei faʻa tatali ke tui ia! Ka naʻá ne kiʻi ongoʻi mamahi ʻi he ʻikai ke ʻi ai ha meʻaʻofa maʻa Misi Lainá.
ʻI he taimi pē ko iá ne mono ange ʻe Mami ha meʻaʻofa kia Misi Laina. Naʻe malimali fakamāmā pē ʻa Misi Laina mo vete hake ha ongo sitōkeni lanu pulú mālohi. Naʻá ne hanga hake kia Mami mo fakatē loʻimata pē. “Mālō. Ne ʻikai fie maʻu ia ke ke ʻomi ha meʻa maʻaku.”
Naʻe ʻalu ʻa Kelela ia ki hono lokí ʻo tui hono vala mohe foʻoú. Ne ʻikai lava ke matoʻo mei heʻene fakakaukaú ʻa Misi Laina. Naʻe ngali ʻokú ne houngaʻia ʻaupito ke maʻu ha sitōkeni ʻi he Kilisimasí!
ʻI he tui ʻe Kelela hono sitōkení, naʻá ne fanongo kuo kamata ke tā ha fasi fakaʻofoʻofa. Naʻá ne lele hifo ʻo ʻiloʻi ʻoku hiva ʻa Mami mo Teti kae tā ʻe Misi Laina e pianó. Ne kau atu leva mo Kelela. Ne tupu ha ongo fakamāfana ʻi hono lotó ʻi heʻene hivá. Naʻá ne fakakaukau, “Mahalo pē ʻoku ʻikai ko ha meʻa kovi ke ʻi ai ha fakaafe ʻi he Efiafi Kimuʻa ʻi he Kilisimasí.”
ʻI he Sāpaté, ne haʻu ʻa Misi Laina ki he lotú ʻo nofo fakataha mo e fāmili ʻa Kelelá ʻi he houalotu sākalamēnití. Naʻá ne fotu fiefia ʻaupito. Naʻe malimali ʻa Kelela ʻi heʻene vahevahe ʻene himí mo Misi Lainá. Mahalo pē kuo taimi ke fokotuʻu ha tukufakaholo foʻou ki he Efiafi Kimuʻa ʻi he Kilisimasí.