Ko ʻEku Meʻaʻofa ki he Fakamoʻuí
ʻOku nofo ʻa e tokotaha naʻá ne faʻú ʻi ʻAitahō, USA.
Ne u ongoʻi taʻefeʻunga ʻi heʻeku hoko ko ha faifekaú. Ko e hā ʻe lava ke u fai ke tuku ʻeku tāfataha kiate au peé kae hanga taha ki he Fakamoʻuí?
Tā fakatātaaʻi ʻe Dinara Mirtalipova
ʻOku fuʻu momoko ʻa Lūsia ʻi he faʻahitaʻu momokó pea meimei ke fakapōpōʻuli, pea ʻoku fakataʻeoli ai e ngaahi ʻahó mo meimei fakataʻelata. Ko e fakaʻosinga ʻeni ʻo Nōvemá pea tānaki atu ki he taʻe-fakafiemālie ʻa e ʻeá, ne u ongoʻi taʻelata, taʻefeʻunga, mo ʻikai malava ke hoko ko ha faifekau lelei. Naʻe toki vaheʻi au ke akoʻi ha hoa foʻou, pea neongo ne lelei ʻaupito ʻa Sisitā Haati, ne ʻiate au ʻeni ʻa e kavenga ke ako vave e leá, hoko ko ha sīpinga lelei, pea kumi ha taha—ha faʻahinga taha pē—ke akoʻi.
Ne ma toki maʻu ha tala ʻe fai ha konifelenisi fakasouni ʻo ʻemau palesiteni misiona foʻoú ʻi ʻIekatālinipaʻake, ko ha houa ʻe nima mei homa ʻēliá ko Peʻema. Ne u ʻalu mo Sisitā Haati ʻi ha pongipongi momoko ʻi Tīsema ki he tauʻanga lēlué.
Lolotonga ʻema talí, ne u fakalaulauloto ki he ongo kuó u maʻú. Naʻá ku fakakaukau ki he ʻaho mālōlō ʻoku panaki maí mo ʻeku fie fakataha mo hoku fāmilí. Ne mōlia atu e fiefia ko ia ke u ʻi he ngāue fakafaifekaú pea kuó u ongoʻi ʻeni kuo teʻeki ai ke u lavaʻi ha meʻa ʻi he māhina ʻe hiva ko ʻeni ʻo ʻeku ngāué. Ne faifai pea fakaongo mai e tau mai ʻema lēlué, ko ia ne ma heka ʻo tangutu ʻi homa nofoʻangá. Ne u fakatokangaʻi ʻoku ou fakakaukau ki he Fakamoʻuí. Ne u kuikui mo lotu ke u lava ʻo ʻilo e founga ke toʻo atu ai e ngaahi ongo ko ʻení mo lelei ange ʻeku tokanga taha kiate Iá.
ʻI he konifelenisi fakasouni ʻi he ʻaho hono hokó, naʻe fakaʻofoʻofa mo fakamāfana e lea ʻa Palesiteni Lasí. ʻI he taimi ne tuʻu hake ai ʻa Sisitā Lasi ʻo leá, naʻá ne vahevahe ha talanoa angamaheni fekauʻaki mo e hoko ʻa e Fakamoʻuí ko e tauhi sipi ʻoku ʻalu ʻo fekumi ki he sipi ʻe toko taha kuo heé pea fakafoki mai e sipi ko iá ki he tākanga sipí. Naʻá ne lea fekauʻaki mo e ngaahi feilaulau kuo fakahoko ʻe he Fakamoʻuí maʻatautolú, pea fakaiku ʻaki haʻane fakamoʻoni mālohi ki he faingamālie ʻoku mau maʻu ko ha kau faifekau ke tokoni kiate Ia ʻaki hono fakafoki mai ʻEne sipi naʻe molé ki he tākanga sipí. Naʻe fakatukupaaʻi mautolu ʻe Sisitā Lasi ke fakakaukau pe ko e hā ha meʻaʻofa te mau lava ke foaki maʻá e Fakamoʻuí ʻi he Kilisimasí.
ʻI heʻene tuku mai ʻa e tukupā ko iá, ne u ongoʻi ha ueʻi mālohi ko e meʻaʻofa ʻoku totonu ke u foaki ki he Fakamoʻuí ko haʻaku talanoa ki ha kakai tokolahi ange. Ne aʻu mai pē ki he taimi ko iá mo ʻeku kei ilifia ke kamataʻi ha fepōtalanoaʻaki mo ha tokotaha foʻou—kae tautefito ʻi he lea faka-Lūsiá! Ne ʻikai ke u loto ke nau pehē ʻoku ou vale ʻi he ʻikai ke mau femahinoʻakí, ko ia ne faingofua ange ke ʻoua te u lea. Kae kehe, ne u ʻiloʻi ʻi he momeniti ko iá ʻa e meʻa totonu ne fie maʻu ke u faí. Naʻe fie maʻu ke tuku ʻeku fakakaukau kiate au peé pea kamata ke fakakaukau ki hoku ngaahi tuongaʻané mo e tokouá. Ne u fokotuʻu ha taumuʻa ke talanoa ki ha taha fekauʻaki mo e ongoongoleleí ʻi he meʻalele fefonongaʻaki kotoa pē te u heka ai ʻi he toenga ʻo e māhiná pea fakahoko ia ko ʻeku meʻaʻofa ki he Fakamoʻuí ʻi he Kilisimasí.
ʻI heʻeku heka mo Sisitā Haati ʻi ha lēlue ke foki ki Peʻema ʻi he pongipongi hokó, ne u kamata fakahoko ʻeku taumuʻa ke talanoa ki he kakai ne u tangutu ofi ki aí. Ne ʻikai ke nau fie fanongo ki he meʻa ne u vahevahé, kaekehe pē ne u feinga!
Ne faingataʻa e ʻaho kotoa pē ʻi heʻeku fāifeinga ke foaki ʻeku meʻaʻofa ki he Fakamoʻuí, ka ne māmālie ʻeku fakatokangaʻi ʻoku ou fiefia ange mo maʻu ha loto falala—ne u ongoʻi ne u fakahoko lelei ange hoku uiuiʻi ko e faifekaú. Ne hoko mai e Kilisimasí pea ʻosi, ka ne u fili ke hokohoko atu ʻeku talanoa ki he kakaí. Ne kamata ke ʻikai ngata pē ʻi heʻeku talanoa kiate kinautolu ʻi he ngaahi meʻalele fefonongaʻaki ne ma heka aí ka ʻi he halá foki, ʻi he falekoloá, ʻi he laipelí, mo e feituʻu kotoa pē ne ma ō ki aí.
Ne ʻikai ke ma maʻu ha taha ke akoʻi ʻi he lahi ange ʻeku talanoa ki he kakaí; kae kehe, ne u ongoʻi naʻá ku tō e ngaahi tenga ʻo e ongoongoleleí. Ne ma faka-kaungāmeʻa ki he fakaʻuli pasí, kakai ʻi he falekoloa fakalotofonuá, mo e ngaahi feituʻu kehe. Ka ko e meʻa lelei tahá ʻa e taimi te ma toe sio ai ki ha taha, ne nau faʻa malimali mai, pea ko kinautolu ʻe fua fakalea mai kiate kimauá. ʻOku ou tui ʻe ʻi ai ha ʻaho ʻe matala ai e ngaahi tengaʻi ʻakau ne ma toó ʻi ha toe ʻi ai ha ngaahi faingamālie foʻou maʻá e kakai ko iá ke ako fekauʻaki mo e ongoongoleleí. ʻOku ngāue ʻa e Tamai Hēvaní ʻi ha ngaahi founga iiki mo faingofua, pea ko e taimi ʻe niʻihi ʻoku kamata ʻaki pē ia ha kiʻi “fakafeʻiloaki.”
ʻI heʻeku fakakaukau atu he taimí ni ki he taimi ʻo ʻema ʻi he lēlue ki ʻIekatālinipaʻaké, ʻoku ou fakatokangaʻi naʻe tali ʻe he Tamai Hēvaní ʻeku lotú. Naʻá Ne tokonia au ke ʻiloʻi ʻoku ʻikai ʻuhinga e ngāue fakafaifekaú maʻaku—ʻoku maʻá e niʻihi kehé ia, pea ʻi he taimi ʻoku tau fakamuʻomuʻa ai e niʻihi kehé ʻiate kitautolu mo ʻetau ngaahi holí mo e mamahí, ʻoku tau maʻu ai e fiefia ʻoku tau fekumi kotoa ki aí. ʻOku fakaofo kiate au e founga foaki ki he Fakamoʻuí, he ʻoku aʻu pē ki heʻetau feinga ke foaki kiate Ia e meʻa kotoa te tau lavá, ʻokú Ne faitāpuekina kitautolu pea fakafoki mai ʻo taki teau.