Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko e Kilisimasí ʻi he Fofonga Hoku ʻOfefiné
Tā fakatātā ʻa Allen Garns
Ne maʻu ʻe hoku fāmilí ha ongoʻi heʻemau hū atu ki ha fale tauhiʻanga monumanu ke sio ʻi hano fakatātaaʻi e ʻaloʻi ʻo Sīsū Kalaisí. Ne laine e fanga manú ʻi he ngaahi lokí, pea ne teuteu ha tangata mo ha fefine ko Siosefa mo Mele, ʻo na tuʻu mo ha pēpē ʻoku fua ʻe he fefiné. Naʻá na fakalongolongo mo tukutaha ʻena tokangá ki he pēpeé. Ne nonga e meʻa hono kotoa pē.
Ne u tuʻu mo hoku uaifí mo ʻeku fānau lalahí kae tangutu hoku ʻofefine siʻisiʻi tahá ʻi ha haʻinga saafa (hay) ʻi muʻa ʻiate kimautolu. Naʻá ne fakalongolongo mo tangutu maʻu, pea ne sio fakamamaʻu ki he kiʻi pēpeé. ʻI he taimi ne maau ai e toenga ʻo hoku fāmilí ke mavahé, ne u ala hifo ki he uma hoku ʻōfefiné pea fanafana ange kuo taimi ke mau ō. Naʻá ne talamai ʻoku fie nofo ia mo e pēpē ko Sīsuú. Ne ongo ʻene leá ki hoku lotó, pea ne u pehē ke u nofo mo ia.
Hili ha ngaahi mōmeniti siʻi, ne u ala fakalelei atu ki he nima hoku ʻofefiné pea talaange ʻoku fie maʻu ke ma ō. Naʻá ne talamai ʻoku kei fie nofo pē ia. Ne u takaiʻi hoku umá ʻiate ia pea tūʻulutui hifo ʻi hono tafaʻakí.
Naʻe ʻikai fuoloa peá u ongoʻi ʻo hangē kuó u foki ki he taimi ʻo Mele mo Siosefá. Ne mahino leva kiate au e ʻuhinga ne fie nofo ai hoku ʻofefiné. Ne u ongoʻi hono lōmekina au ʻe he Laumālié. Ne u ongoʻi ʻi he feituʻu ko iá ʻoku ou ʻi he ʻao ʻo e Fakamoʻuí. Ne u fakatē-loʻimata ʻi heʻeku ongoʻi ʻEne ʻofá. ʻI he hokosia ko ia e taimi ke mau mavahe aí, ne u fua hake ʻeku kiʻi taʻahiné. ʻI heʻeku tafoki ki he hūʻanga ki tuʻá, ne u ongoʻi ʻene pōpoaki fakamāvae ki he pēpē ko Sīsuú pea talaange ʻene ʻofa lahi ʻiate Iá.
Ne u maʻu mo hoku ʻōfefiné he efiafi ko iá ha aʻusia ʻa ia te u fakahoungaʻi ʻi he toenga ʻo ʻeku moʻuí, pea ne mei mole ia meiate au. Ne u maʻu ha meʻaʻofa ʻi he pō ko iá. Ne u ongoʻi ofi ange ki he ʻOtuá pea ongoʻi ʻEne ʻofa maʻakú. ʻOku ou houngaʻia ʻi he Fakamoʻuí pea mo e faingamālie ke manatuʻi ai Iá. ʻOku ou ʻilo ʻoku ʻomi ʻe he moʻui ʻa e Fakamoʻuí, sīpingá, mo e Fakaleleí ha meʻaʻofa fakaʻofoʻofa ʻo e ʻofa taʻengatá mei he ʻOtuá ki Heʻene fānaú. Te u fakahoungaʻi maʻu pē e meʻaʻofa ko ʻeni ʻi hoku lotó.