Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko Hono Vahevahe e ʻOfa ʻa e Fakamoʻuí ʻi he Kilisimasí
Tā fakatātaaʻi ʻe Julie Rogers
Ne u vēkeveke ke kau ki he kemipeini ʻa e Siasí ke “Fakamaama e Māmaní” ʻi he 2016. ʻOku ou hanganaki atu ki hono fakakakato ʻo e ngaahi tukupā fakaʻahó, kae tautefito ki he ʻaho hono nimá: “Ne faitokonia ʻe Sīsū e mahakí, pea te ke malava foki ia.”
Ko e ʻaho ia ne u mavahe ai mei he ngāué ʻo lue atu ʻi he hala ʻo e koló ke ʻaʻahi ki heʻeku ongo kuí. Ne u ongoʻi fiefia. Ko e taimi Kilisimasí ʻeni pea ne fakaʻofoʻofa e māmaní. Ne ongona e tā ʻo e fafangu ʻofá ʻi he ʻeá. ʻI heʻeku fakaofiofi atu ki he halanga lēlué, ne ʻikai kei ongona e fafangú ʻi he kaikaila ʻa ha fefine tukuhāusia ki he tokotaha tā fafangú.
Naʻá ne kaila, “Ko ha mālualoi koe!” “ʻOku ou fiekaia, ʻoku ou mokosia, pea ʻokú ke siokita! Ko ha mālualoi koe!”
Ne ʻikai tokanga ki ai ha tokolahi, pea ne hokohoko atu pē ʻe he tā fafangú ʻene taá. Ne u tui ʻeku meʻa fanongó, ka ne u kei ongona pē kaila ʻa e fefiné, “Ko ha mālualoi koe! ʻOku ou fiekaia. ʻOku ou mokosia.”
Ne u manatuʻi hake ne ʻi ai e paʻanga ʻe 20 ʻi hoku kató. Ne u fakakaukau ke foaki ia ki he fefiné. Ne u pehē, “ʻIkai.” “Kapau te u foaki ʻeni ki ha taha, ʻoku totonu ke u foaki ia ki ha taha ʻoku angalelei.” Pea ne fakamanatu mai ʻe he Laumālié kiate au ʻeku tukupaá pea mo e tokotaha ʻoku ou feinga ke fakatatau ki aí. Ne hoko ʻa Sīsū ko e Tuʻi ʻo e ngaahi tuʻí, ka naʻá Ne tokoni ki he maʻulalo tahá. Naʻá ku ʻiloʻi e meʻa naʻe pau ke u faí.
Ne u lue atu ki he fefiné. Ne ʻikai ke kei kaikaila, ka naʻe kuikui pea tafe hifo hono loʻimatá ʻi hono kouʻahé. Ne u toʻo hake e paʻanga ʻe 20 mei hoku kató pea ʻoange ki ai.
“ʻAho faingataʻa?” ne u ʻeke ange.
Naʻá ne sio hake kiate au. Naʻá ne tali mai, “ʻIo.”
Naʻá ku pehē ange, “Kātaki pē.” Ne u fāʻofua ki ai, peá ne tangi ʻi hoku umá kae ʻoua kuo aʻu mai ʻa e lēlué.
Ne pehē mai ʻa e fefiné ʻi heʻema fakamāvaé “Mālō.” “Pea ʻoku ʻikai koeʻuhí ko e paʻangá pē. Fakamālō atu hoʻo fāʻofua maí. Ne u fie maʻu ia.”
Ne ʻikai ke u palani ke fāʻofua ki ha faʻahinga taha pē ʻi he halá, ka ʻoku ou ʻilo ko ha meʻa ia ne mei fai ʻe Sīsū. ʻOku ou houngaʻia ne tuku mai ʻe he ʻEikí ha faingamālie ke u fai ʻo hangē ko ia naʻá Ne mei fakahokó. Ne faitokonia ʻe Sīsū e mahakiʻiá, ʻa e masivá, mo e tukuhāusiá. Te u lava foki mo au.