Ko e ʻOné

ʻI he taʻu 12 ʻa ʻEletā Teili G. Lenilaní ne nofo honau fāmilí ʻi Sueteni. ʻI ha Sāpate ʻe taha, ne ʻomi ʻe Setefano ko e kaungāmeʻa ʻo Teilí ha foʻi ʻone lahi mo ha masi ki he falelotu ʻo e Siasí. Naʻe fiefia ʻa Teili. Naʻe toʻo e Teili e foʻi ʻoné ʻo tutu e filó. Naʻe ʻai ke ne tāmateʻi e afó, ka ne vela hono tuhú pea homo ai e foʻi ʻoné! Naʻe sio pē ʻa Teili mo Setefano ʻi he ilifia ʻi he totolo e ulo ʻa e foʻi afó.

Ne pā e foʻi ʻoné! Ne namu faikehe e falelotú. Ne hiko fakatovave ʻe Teili mo Setefano e ngaahi kongokonga ʻo e ʻoné pea fakaavaava e luvá ke tukuange e ʻeá. Naʻá na ʻamanaki ne ʻikai fakatokangaʻi ʻe ha taha.

ʻI he omi ʻa e kakaí ki he houalotu sākalamēnití, ne nau fakatokangaʻi. Ne ʻikai lava ke tokanga e kakaí ki he fakatahá ʻi he fuʻu mālohi e nanamú. Ne ongoʻi mā ʻaupito ʻa Teili. Naʻá ne ʻilo ne fakatupu houhau ki he Tamai Hēvaní ʻa e meʻa naʻá ne faí.

Hili e lotú, ne kole ange ʻe Palesiteni Linipeka kia Teili ke ʻalu ange ki hono ʻōfisí he naʻe lava ke ne tala ʻoku ʻi ai e meʻa ʻoku hoko. Ne kole fakamolemole ange ʻa Teili kia Palesiteni Linipeka koeʻuhí ko e ʻoné.

Ne angaʻofa ʻa Palesiteni Linipeka. Naʻá ne fakaava e folofolá pea kole ange kia Teili ke lau ha ngaahi veesi ne laineʻi. Naʻe lau ʻe Teili, “Vakai, ko ia ia kuó ne fakatomala mei heʻene ngaahi angahalá, ʻoku fakamolemoleʻi ia pea ko au ko e ʻEikí ʻoku ʻikai te u toe manatu ki ai. Te mou ʻilo ʻi he meʻá ni ʻo kapau ʻoku fakatomala ha tangata mei heʻene ngaahi angahalá—vakai, te ne vete ia pea liʻaki ia” (T&F 58:42–43).

ʻI he ʻosi e lau ʻa Teilí naʻá ne sio ʻoku malimali ʻa Palesiteni Linipeka. Naʻá ne ongoʻi kuo fakamolemoleʻi ia. ʻI he mavahe ʻa Teili mei he ʻōfisí, naʻá ne ongoʻi fiefia.

Naʻe ako ʻe ʻEletā Lenilani ʻe lava ke fakamolemoleʻi ia ʻi he taimi te ne fai ai ha meʻa hala. Naʻe lava ke ne ongoʻi fiefia ʻi heʻene fakatomalá pea tauhi e ngaahi fekau ʻa e Tamai Hēvaní.