Tali mei he Kau Taki ʻo e Siasí
Founga ke Ongoʻi ai e Laumālie Totonu ʻo e Kilisimasí
Fai ʻe Palesiteni Thomas S. Monson
Mei he Fakataha Lotu Faka-Kilisimasi ʻa e Kau Palesitenisī ʻUluakí ʻi he 2013.
Ko e Kilisimasí ko e faʻahitaʻu nāunauʻia ia ʻo e taʻú. Ko ha taimi femoʻuekina foki ia kiate kitautolu. ʻOku ou fakatauange mo lotua he ʻikai ke tau moʻunofoa he femoʻuekina ʻo e faʻahitaʻú pea tō ai ʻetau fakamamafá ki he ngaahi meʻa halá kae mole meiate kitautolu ʻa e fiefia mahinongofua ko hono fakamanatua e ʻaloʻi ʻo e Tokotaha Māʻoniʻoni ʻo Pētelihemá.
ʻOku ʻikai maʻu e fiefia moʻoni ʻo e Kilisimasí ʻi he fakatovave holo ke fai ha meʻa ʻoku lahi angé. ʻOku tau maʻu ʻa e fiefia moʻoní he taimi ʻoku fakatefito ai ʻetau tokangá ʻi he Fakamoʻuí ʻi he faʻahitaʻu ko ʻení.
ʻOku totonu ke hoko ʻetau fakamanatua ʻo e Kilisimasí ko hano fakafōtunga atu ia ʻo e ʻofa mo e moʻui taʻesiokita naʻe akoʻi mai ʻe he Fakamoʻuí. ʻOku ʻomi kakato ʻa e laumālie ʻo e Kilisimasí ʻe he foaki atú, kae ʻikai ko e maʻu maí. ʻOku tau ongoʻi angaʻofa ange ai ki he niʻihi kehé. ʻOku tau ala atu ʻi he ʻofa ke tokoni ki he niʻihiʻ oku fakaʻofá. ʻOku fakavaivaiʻi ai hotau lotó. ʻOku fakamolemoleʻi ai hotau ngaahi filí, manatua ai hotau ngaahi kaungāmeʻá pea talangofua ai ki he ʻOtuá. ʻOku hoʻatā mei he laumālie ʻo e Kilisimasí ʻa e meʻa ko ia ʻi hotau lotó, pea ʻoku tau vakai atu ki he māmani femoʻuekina ko ʻení pea tau toe mahuʻinga ange ai ʻi he kakaí kae ʻikai ko e koloá. Ke maʻu e ʻuhinga totonu e laumālie ʻo e Kilisimasí, ʻoku fie maʻu ke tau fekumi ki he Laumālie ʻo Kalaisí.
ʻOfa ke tau foaki ʻo hangē ko e foaki ʻa e Fakamoʻuí. Ko e foaki ʻo ʻete moʻuí ko ha meʻaʻofa māʻoniʻoni ia. ʻOku tau foaki ko ha fakamanatu ʻo e meʻa kotoa pē ne foaki mai ʻe he Fakamoʻuí. ʻOfa ke tau foaki ʻa e meʻaʻofa ʻoku taʻengata hono mahuʻingá, fakataha mo ʻetau ngaahi meʻaʻofa ʻe iku e maumau pe fakangaloʻí. ʻE toe lelei ange ʻa e māmaní ʻo kapau te tau foaki kotoa pē ʻa e meʻafoaki ʻo e loto mahinó mo e manavaʻofá, ʻo e tokoni mo e feohi mo e feohi fakakaungāmeʻá kae pehē ki he angaʻofá mo e angavaivaí.
ʻE hono ʻākilota kitautolu ʻe he faʻahitaʻu Kilisimasí mo hono ngaahi naunaú ʻofa ke tau hangē ko e Kau Potó, ʻo fekumi ki he fetuʻu ngingila mo makehé ke ne tataki kitautolu ʻi heʻetau kātoangaʻi fakamanatua e ʻaloʻi ʻa e Fakamoʻuí. ʻOfa ke tau fononga fakalaumālie ki Pētelihema pea tau ʻave mo kitautolu ha loto anga vaivai mo angaʻofa ko ʻetau meʻaʻofa ki he Fakamoʻuí.