Ngaahi Meʻa ʻe Tolu ke Manatuʻí

ʻOku tuʻo lahi e toutou ʻasi ʻa e foʻi lea manatuʻí ʻi he Tohi ʻa Molomoná. Naʻe poupouʻi ʻe Nīfai hono ngaahi taʻoketé ke nau manatuʻi hono fakahaofi kinautolu ʻe he ʻOtuá mo ʻenau ngaahi kuí. Naʻe kole ʻa e Tuʻi ko Penisimaní ki hono kakaí ke nau manatuʻi e māfimafi ʻo e ʻOtuá. Pea naʻe fakahinohinoʻi ʻe Molonai ʻene kau laukongá ke nau manatuʻi e ʻaloʻofa ʻa e ʻEikí.

ʻI heʻetau manatuʻi ʻoku mahuʻinga ʻa e Fakamoʻuí—ʻoku tau fuakava foki ai ke tau manatuʻi maʻu pē Ia ʻi he taimi kotoa pē ʻoku tau maʻu ai e sākalamēnití. ʻOku fakaafeʻi kitautolu ʻe Palesiteni Eyring ke tau manatuʻi e ngaahi meʻa ʻe tolu ko ʻení lolotonga ʻa e sākalamēnití:

Manatu kia Sīsū Kalaisi: Lau e ngaahi veesi folofola fekauʻaki mo e founga naʻe tokoniʻi mo fakahaaʻi ai ʻe he Fakamoʻuí ʻEne ʻofa ki he niʻihi kehé. ʻOkú ke ongoʻi fēfē ʻEne ʻofá? Te ke lava fēfē ke tokoniʻi mo fakahaaʻi hoʻo ʻofá ki he niʻihi kehé ʻo hangē ko ia naʻe fai ʻe he Fakamoʻuí?
Manatuʻi e ngaahi meʻa ke fakaleleiʻí: Fakakaukau ki he uike naʻe toki ʻosí mo ha loto fakatomala. Fili ha meʻa ʻe taha ʻe lava ke ke liliu, pea hiki hifo e founga te ke ngāueʻi ai e fakalakalaka ko iá. Tuku hoʻo taumuʻá ʻi ha feituʻu te ke sio maʻu pē ki ai.
Manatuʻi e fakalakalaka ʻokú ke fakahokó: Tautapa ki he ʻOtuá ke tokoni atu ke ke vakai ki he fakalakalaka lelei ʻokú ke fakahokó. Lekooti e ongo ʻokú ke maʻú.

ʻOku ʻikai ke tau haohaoa, ka ʻoku ʻafioʻi ia ʻe he Fakamoʻuí. Ko e ʻuhinga ia ʻokú Ne kole mai ai ke tau manatuʻi Iá. ʻOku ʻomi ʻe heʻetau manatuʻi Iá ha ʻamanaki lelei mo ne tokoniʻi kitautolu ke tau fie fakalakalaka. Naʻa mo e ngaahi taimi ʻoku ʻikai ke tau manatuʻi ai Iá, ʻoku pehē ʻe Palesiteni Eyring, “ʻOkú Ne manatuʻi maʻu pē koe.”