ʻOku Fie Maʻu ʻe he Tokotaha Kotoa ha Kaungāmeʻa

Tim Overton

Arizona, USA

Naʻá ku fakaofi atu ki he matapā ʻo e ʻapisiasí mo ha fakakaukau mahino ʻe taha ʻi hoku ʻatamaí; “Kapau he ʻikai te u maʻu ha kaungāmeʻa ʻi he lotú he ʻahó ni, he ʻikai ke u toe foki mai.” Naʻá ku faʻa maʻulotu mo haku kaungāmeʻa kimuʻa, ka ko e fuofua taimi ʻeni ke u maʻulotu ai ko ha fie fanongo ʻiate au pē pea maʻaku pē. Naʻá ku ongoʻi naʻe fie maʻu ke u kau ki he Siasí, ka naʻe ʻi ai ha ngaahi meʻa naʻá ku tailiili mo hohaʻa ki ai.

ʻI heʻeku hū atu ki he fale lotú, naʻe fakafeʻiloaki mai ha tokotaha kei talavou kiate au pea malimali mo lulululu fiefia mai. Naʻá ne fakafeʻiloaki mai ia ko Teini MaKātenī. Naʻá ku ʻosi fakatokangaʻi ʻa Teini kimuʻa, ʻi he taimi naʻe feinga ai ke hū ki he timi ʻakapulu ʻa e kolisi naʻá ku vaʻinga ki aí. Naʻe mole hoku loto-hohaʻá ʻi heʻene fakaafeʻi au ke ma tangutu lolotonga e ngaahi houalotú. Naʻá ne fakaafeʻi foki au ke mau maʻu meʻatokoni efiafi ʻi he ʻapi ʻo ʻene ongomātuʻá ʻi he tukú. Naʻe teʻeki ke u ongoʻi tuenoa ʻi he ʻaho ko iá. Naʻe alanima mai e fāmili ʻo Teiní kiate au mo tokoni ke tali ha konga lahi ʻo ʻeku ngaahi fehuʻí. Naʻá ku kau ki he Siasí hili ha ngaahi uike siʻi mei ai.

Ka naʻe ʻikai ke fakakaungāmeʻa mai ʻa Teini ʻi he ʻaho ko iá, mahalo naʻá ku mei foki mo ha loto foʻi mei he lotú hili e sākalamēnití, ʻo fakakaukau kuó u ʻosi feinga ka ʻoku ʻikai tonu e siasi ia ko iá kiate au. Neongo ʻoku mahuʻinga ke te anga fakakaungāmeʻa, ka ʻoku mahulu hake e ngaahi fie maʻu ke te hoko ko ha kaungāmeʻá ʻi he fakamahení peé. Naʻe mahuʻinga e ʻofa mo e poupou ʻa e fāmili MaKātenī ki hoku fakauluí.

Ko e taʻu ia ʻe 14 kuohilí. Kuó u ngāue fakafaifekau taimi kakato ʻeni, mali ʻi he temipalé, mo tāpuekina ʻaki au ha fānau fakaʻofoʻofa ʻe toko nima. Kuó u hoko foki ko ha pīsope mo ha palesiteni fakasiteiki. Kuó u faleʻi ha kāingalotu naʻe ʻikai ke nau toe omi ki he lotú koeʻuhí ne nau ongoʻi tuenoa pea ʻikai hanau ngaahi kaungāmeʻa ʻi he lotú. ʻOku mafasia hoku lotó maʻanautolu. ʻOku ou fakaʻamu naʻe ʻi ai ha taha ʻe alanima atu kiate kinautolu ʻo hangē ko ia naʻe fai mai ʻe he fāmili MaKātenií.

ʻOku ou fakamālō ki heʻeku Tamai Hēvaní ko e fakamaheni mai ʻa Teini ʻi he ʻaho ko iá. Fakatauange te tau loto-toʻa kotoa ke tau fakakaungāmeʻa kiate kinautolu ʻoku nau fie ʻilo ki he Siasí, ʻoku nau foʻoú, pe foki mai ki aí.