Ko e Palani ʻo e Fiefiá

Valivali e ngaahi fakatātā ko ʻení ke ke ako fekauʻaki mo e palani ʻo e fiefia ʻa e Tamai Hēvaní maʻaú! Te ke lava foki ʻo kosi kinautolu, fakapipiki fakataha e tuʻa fakatātaá pea fakamaʻu e ngaahi tafaʻakí ke faʻu ha kiʻi tohi.

Kimuʻa pea fanauʻi aú, naʻá ku moʻui ko ha laumālie fakataha mo ʻeku Ongomātuʻa Fakalangí. Naʻe folofola mai ʻe he Tamai Hēvaní ʻoku ʻi ai ʻEne palani ke tokoni kiate au ke u ako mo tupulaki. Naʻá ku fiefia ʻaupito!

Naʻe loto fiemālie ʻa Sīsū Kalaisi ke hoko ko hoku Fakamoʻuí. Naʻá Ne hāʻele mai ki he māmaní ke tā ha sīpinga haohaoa maʻaku. Naʻá Ne fua ʻeku ngaahi angahalá. ʻOkú Ne ʻafioʻi ʻeku ngaahi faingataʻaʻiá pea ʻe lava ʻo tokoni mai. ʻOku ou ʻofa ʻia Sīsū!

Naʻe fanauʻi au ʻi he māmani fakaʻofoʻofa ko ʻení. ʻOku ou maʻu ha sino! ʻOku ngāue fakataha hoku laumālié mo e sinó ʻi heʻeku akó. ʻOku ou feinga he ʻaho kotoa ke u muimui kia Sīsū ʻaki ʻeku angaʻofa.

ʻOku ou muimui kia Sīsū ʻaki ʻeku papitaiso. ʻOku ou palōmesi ke tauhi e ngaahi fekaú. Naʻe talaʻofa mai ʻe he Tamai Hēvaní ʻe tokoniʻi au ʻe he Laumālie Māʻoniʻoní. ʻI heʻeku tōnounoú, ʻoku ou fakatomala pea feinga mālohi ange he taimi hokó. Ko e founga ʻeni ʻoku ou ako mo tupulaki aí!

Neongo pē ʻoku ou mamaʻo mei heʻeku Ongomātuʻa Fakalangí mo Sīsū Kalaisí, ʻoku ou kei lava pē ʻo ongoʻi vāofi mo Kinautolu. Te u lava ʻo lotu ki he Tamai Hēvaní ʻi ha faʻahinga taimi pē. Te u lava ʻo lau e folofolá Te u lava ʻo ʻalu ki he temipalé ʻi ha ʻaho ʻo ako lahi ange ai fekauʻaki mo e palani ʻa e ʻOtuá maʻakú. Ko ha feituʻu nonga mo fakafiefia ia.

Ko e maté ko ha konga pē ia ʻo e moʻuí. ʻI he taimi te u mate aí, ʻe nofo hoku sinó ʻi he māmaní pea ʻe mavahe hoku laumālié ki he maama tataliʻanga ʻo e ngaahi laumālié. Te u fakataha ai mo hoku fāmilí mo e ngaahi kaungāmeʻá.

ʻE toe fakataha hoku sinó mo e laumālié ʻi ha ʻaho. Te u toe mamata kia Sīsū! Te u lava ʻo nofo mo hoku fāmilí mo ʻeku Ongomātuʻa Fakalangí ʻo taʻengata. ʻOku ou houngaʻia ʻaupito he palani ʻo e fiefiá!